فن التعامل مع الأنثى

أنا من قراء فضفضة المداومين وجوزي كمان.. وهوة عنده علم باني هعمل له مفاجأة لكن ما يعرفش عبارة عن ايه فانا اخترت ان المفاجأة تكون من خلالكم يمكن جوزي يستفيد حاجة هوة وكل اللي عندهم المشكلة دي .. أنا قررت اني أبعت له رسالة غير مباشرة وبالطريقة دي .. أنا شخصية رومانسية وحريصة على بقاء علاقتي بجوزي انها تكون مميزة عشان كدة أنا بقول له : ارجوك حاول تعمل مجهود وتفتكر مناسباتنا السعيدة ... بكلمة حلوة في فترة خطوبتنا ملكت قلبي وكنتلك زوجة انت نفسك بتشهد لها .. حاول تتعلم فن المجاملة والغزل أنا مش طمعانة في هدية تسوى فلوس كتير أنا طمعانه في كلمة حلوة منك .. زوجي العزيز .. الحياة الزوجية عبارة عن فن التعامل مع الأنثى .. زوجي العزيز .. حاول تتعلم تدير ديونك ازاي علشان ما تفضلش مضغوط مدة كبيرة .... من ناحيتي أنا اختصرت طلباتي لكن من ناحيتك لسة ما عملتش حاجة ... نفسي أشوفك بتضحك من القلب تاني .. اسأل علية من وقت للتاني وانت قاعد في شغلك عشان احس باهتمامك ... اعزمني مرة على ترمس يا سيدي ولا درة على كورنيش النيل أنا راضية لكن افتكرني ... أنا مش طالبة المستحيل أنا طالبة احسك واحس انك مشغول بية ... زي ما بخاف عليك من الزعل ومشاكل الدنيا خاف انت علية من النكد اللي ممكن يحتل حياتنا بانشغالك عني ... زوجي العزيز ... ارجوك خد بالك مني
ناريمان