مغارة علي بابا..دفاع المخرج عمر زهران يطلب فواتير مجوهرات شاليمار الشربتلي

نظرت محكمة جنح قسم الجيزة ثاني جلسات محاكمة المخرج عمر زهران في اتهامه بسرقة مجوهرات شاليمار الشربتلي زوجة المخرج السينمائي خالد يوسف.
وطلب محمد حمودة دفاع عمر زهران بإلزام شاليمار الشربتلي بتقديم فواتير تثبت ملكيتها للمجوهرات التي ادعت سرقتها حتى يثبت الدفاع في حال تزويرها باتخاذ الاجراءات القانونية وطلب تفريغ الهاتفين المحمولين الخاصين بالمتهم المخرج عمر زهران وقال: "قالت على حاجات كتير أساور وماس عايزين فواتير ثبت ملكيتها ل مغارة علي بابا دي".
وأضاف ان النيابة طلبت منها الفواتير عدة مرات وكانت في كل مرة ترد:"مش معايا دلوقتي" مؤكدا أن تلك المجوهرات لا يمكن شراؤها دون فواتير.
وفي الجلسة الماضية سرد المخرج عمر زهران تفاصيل بداية الأمر حيث قال المخرج: خالد يوسف قالي فيه مجوهرات كتير ضايعة من مراتي قلتله مراتك مهملة وكلنا عارفين كده وانتا بتقول إن الحاجات دي كانت في شقة الفورسيزون دي شقة عبارة عن مخزن اكيد الحاجة دي ضايعة وسط الكركبة دور عليها كويس.
وأضاف: اتفاجئت ان شاليمار طلبت مني اروح ادور معاه رفضت وخالد يوسف كرر الطب رفضت للمرة الثانية مكنتش فاهم إصرارهم اني ادور معاهم على حاجات ضايعة في شقتهم الخاصة وروحت مرة دورت مع شاليمار ومعاها 2 شغالين معاها وساعتها خالد يوسف كان مصمم يعرف احنا دورنا فين بالظبط قلتله على كل الأماكن الا غرفة كانت مقفولة" .
ساعة الملكة فريدة
قرر خالد يوسف انه يدور في الغرفة دي بس أصر اني اروح ومش فاهم ليه وكلمني وانا بصلي الجمعة وبعد عدة اتصالات منه روحت وانا لابس جلابية الصلاة وبدأت أدور في الغرفة المقفولة لحد ما فتحت دولاب لقيت شنطة في وشي فتحناها كانت مليانة مجوهرات".
أضاف المخرج قائلا: ولما شاليمار شافت الحاجات دي طلعت غير الحاجات اللي قالت اتسرقت يعني أنا لو عايز اسرق حاجة ما الشنطة دي كانت قدامي وفيها ساعة الملكة فريدة اشترتها شاليمار من مزاد علني، وكمان شاليمار بتقول إني سرقت منها حاجات ب 250 مليون جنيه ولما معرفتش أبيعها عشان هي حاجات غالية ونادرة رجعتلها حاجات ب 200 مليون واحتفظت بمجوهرات ب 50 مليون. ووجه حديثه للقاضي قائلا: معلش يا فندم هو أنا حم.ار عشان أعمل كده ارجع حاجات سرقتها وأفضح نفسي طيب ما كنت رميتها في النيل"
شعوذة وكوتشينة ودجل
وأكد المخرج الشهير قائلا:"كل الناس واصحابنا عارفين ان شاليمار الشربتلي ماشية ورا المشعوذين والدجالين وهي قالتلي ان واحدة مشعوذة فتحت الكوتشينة وقالت لها ان انا اللي سرقتها وكانت عايزاني أفتح المندل وطلبت مني اجيب واحد مبروك يساعدنا في البحث عن مجوهراتها.. هو ده كلام يتهموني على أساسه واتحبس وأنا راجل مريض قلب وسكر وعجوز كمان يعني اتحبس بسبب مشعوذة وراجل مبروك".