إبن ضحية مستشفى شبرامنت: خدوا مني 35 ألف وأنا معايا قرار على نفقة الدولة| فيديو

قال إبن ضحية مصعد مستشفى شبرامنت المركزي، والدتي دخلت المستشفى قبل الواقعة بأسبوعين وعملت تقرير على نفقة الدولة ولما جبت التقرير قالولي لأ وجالنا إشارة أنها تتنقل مستشفى أم المصريين ونزلت لمدير المستشفى قالي لازم تتحول قولت له الحالة صعبة ومينفعش تتنقل.
أسرة ضحية مستشفى شبرامنت: روحها طلعت قدام بنتها ومعرفتش تعملها حاجة| فيديو
ابن شقيق ضحية مستشفى شبرامنت: اتشاهدت وهي مزنوقة في الأسانسير.. فيديو
شاهد.. أول ظهور لأسرة «نجاح» ضحية مصعد مستشفى شبرامنت المركزي
اعترافات «النوبي» بقضية استهداف محلات الذهب: خططت لق تل سائحين ومسيحيين| خاص
إبن ضحية مستشفى شبرامنت المركزي يكشف التفاصيل
تابع إبن ضحية مصعد مستشفى شبرامنت المركزي، مدير المستشفى قالي العملية هتتكلف من 20 ألف ل 25 ألف، والعملية دي كسر مفصل، قولت له أنا معايا قرار على نفقة الدولة عشان مش معايا فلوس هدفعني فلوس، قالي دي اللوائح والقوانين قولت له خلاص هتصرف وأجيب لك الفلوس قالي نص ساعة وهرد عليك.
واستكمل إبن ضحية مصعد مستشفى شبرامنت، قالي العملية هتتكلف 35 ألف جنيه، وجهزت له الفلوس واديتهاله رجعلي 25 ألف جنيه وقالي دول هياخدهم مسئول الشركة اللي هتورد المفصل، ومعايا ايصالات بكل الحاجات دي، ودخلت العملية فعلا وعملتها وخرجت منها زي الفل، الساعة 12 الظهر ودخلنا الأوضة لأن من شدة العملية خدت حقنة مسكنة ومحدش سأل فينا تاني ولا حد عبرنا.
وأضاف إبن ضحية مصعد مستشفى شبرامنت، قالولنا هتنزل تعمل أشعة في الدور الأرضي روحنا عند الأسانسير قالولنا عطلان وهنبعتلك وبعتها ب نص ساعة قالولنا اشتغلت وعايزين حد ينزل الحالة، ونزلت على السلم وإبن خالي وأختي دخلوا الأسانسير معاها، واستنينا تحت وساعتها نزل الأسانسير ومفيش ثواني ولقيناه بيطلع لفوق لوحده.
واستطرد إبن ضحية مصعد مستشفى شبرامنت المركزي، أول ما طلعوا الترولي لقينها اتزنقت في السقف ما بين الأسانسير والحيطة ونطقت الشهادة وماتت وقعدت تلت ساعة مش عارفين يعملوا حاجة، ريحة شياط الأسانسير طلعت والكهرباء فصلت، وخدوها ودوها أوضة الرعاية كانت الرقبة مكسورة وخلصانة.
وأكد إبن ضحية مصعد مستشفى شبرامنت المركزي، أنا عايز حق أمي من أي حد مسئول عن الإهمال اللي حصل في المستشفى واللي اتسبب في اللي حصل لأمي ده.
وقال محمد أبن شقيق ضحية مستشفى شبرامنت المركزي، والذي نجى من واقعة المصعد، أنه كان على علم بأن عمته ستدخل لإجراء عملية تغير مفصل، وبعد الخروج من العمليات الدكتور قال هتعمل عملية.
وتابع ابن شقيق ضحية مستشفى شبرامنت المركزي، الممرضة جت قالت الأسانسير عطلان وهنستنى نص ساعة، وبعدها رجعت وبتاع الأمن قالها هدور الأسانسير نزلي الحالة وأنا هسحبه تاني، ودخلت أنا وبنت عمتي الأسانسير، هو دور واحد اللي نازلينه.
وأكد ابن شقيق ضحية مستشفى شبرامنت، نزلنا فعلا في الأسانسير وكل اللي حصل أن خرج من الترولي عجلتين بس ولسه نصه كان جوا الأسانسير، وفي الوقت ده فجأة لقينا الأسانسير اتسحب وحصل عطل، واتزنقت وحاولنا نزقها معرفناش نعمل حاجة وهي نطقت الشهادة قدامنا.
وأضاف ابن شقيق ضحية مستشفى شبرامنت، بنتها حاولت تزق لدرجة أن صوابعها باظت وفضلت مزنوقة تلت ساعة، والأسانسير شاط والكهرباء فصلت وفضلنا بالشكل ده لحد ما بتاع الأمن فضل ينزل الأسانسير يدوي لحد ما سلكناه بالعافية، وخرجناها.
واستكمل نجل شقيق ضحية مستشفى شبرامنت، الوضع كان صعب وأنا مكنتش عارف أعمل أي حاجة، واللي حصل أن جسمها اتزنق في الأسانسير، وبقت راسها بره وجسمها جوا، ونطقت الشهادة وماتت وكنا عارفين، ولما نزلناها من الأسانسير قالولنا أحنا بنحاول نعملها إسعافات لكن كانت خلاص ماتت.
وتابع محمد أنا عايز حقها من إدارة المستشفى أنا شوفتها وهي بتموت ومش عارف أسعفها ولا أعمل حاجة، عايز حقها من اللي حصل فيها اتزنقت لدرجة أن الترولي اللي كانت محطوطة عليه اتقسم نصين ما بالك هي حصل فيها الإهمال بتاعهم هو السبب في حاجة زي دي.
وفحصت الأجهزة الأمنية بمديرية أمن الجيزة، برئاسة اللواء محمد الشرقاوي مدير الإدارة العامة لمباحث الجيزة، البلاغ للوقوف على ملابسات وأسباب الحادث حيث يجرى الاستماع لأقوال مدير مستشفى شبرامنت المركزي بالإضافة لأقوال فني صيانة المصاعد.
تلقت الأجهزة الأمنية بمديرية أمن الجيزة إخطارا من غرفة عمليات النجدة تضمن ورود بلاغا أفاد بوقوع حادث في مصعد داخل مستشفى شبرامنت المركزي وعلى الفور إنتقل فريق من المباحث بإشراف اللواء هاني شعراوي مدير المباحث الجنائية إلى موقع البلاغ للوقوف على ملابسات الحادث.
وانتقلت فرق المباحث في الجيزة إلى مستشفى شبرامنت المركزي، حيث أجريت التحريات اللازمة برئاسة العميد محمد مختار رئيس مباحث قطاع جنوب الجيزة، وتحرر المحضر الإداري اللازم عن الواقعة وجرى استكمال التحريات والعرض على النيابة العامة في جنوب الجيزة.
ونعى محافظ الجيزة المهندس عادل النجار، وفاة إحدى النزيلات في مستشفى شبرامنت المركزي، حيث نعى محافظ الجيزة وفاة السيدة نجاح إسماعيل إحدى النزيلات داخل المستشفى والتي لفظت أنفاسها الأخيرة جراء تعرضها لحادث في مصعد المستشفى.
ووجه محافظ الجيزة مدير مديرية الصحة بالتنسيق مع رئيس مركز ومدينة أبو النمرس والجهات الأمنية بسرعة التوجه لموقع الحادث وإجراء تحقيق عاجل في الواقعة للوقوف علي اوجه القصور وتكليف شركة الصيانة المتعاقد معها بالمستشفي بالتأكد من سلامة المصاعد الخاصة بالمستشفى قبل عودتها للعمل لضمان سلامة النزلاء والمترددين عليها.
وشدد المحافظ على رؤساء الأحياء والمراكز بالتعاون مع مديري الإدارات الصحية كلا في نطاقه بالمرور الدوري علي المستشفيات والوقوف علي انتظام أعمال الصيانة الدورية لكافه المرافق بها وسرعه اصلاح اي اعطال حفاظا على السلامة العامة .