اعترافات زوج ابنة خيرت الشاطر: أسست التنسيقية المصرية وتزوجت عائشة في 2014

يستكمل موقع "صدى البلد" نشر نص اعترافات زوج عائشة خيرت الشاطر المتهم محمد أبو هريرة محمد عبد الرحمن، في القضية رقم 1 لسنة 2021 جنايات أمن الدولة طوارئ مدينة نصر ثان، والمقيدة برقم 703 لسنة 2021 كلي القاهرة الجديدة، وبرقم 1552 لسنة 2018 حصر أمن الدولة العليا، والمتهمة فيها أيضا عائشة خيرت الشاطر، ابنة القيادي خيرت الشاطر.
وأدلى المتهم محمد أبو هريرة محمد، 32 سنة، محامٍ، باعترافات تفصيلية، ينشر منها موقع "صدى البلد" في الجزء الثالث والأخير منها تفاصيل تأسيسه التنسيقية المصرية وزواجه من عائشة الشاطر.
مكتب حازم صلاح أبو إسماعيل.. زوج عائشة الشاطر يفضح الإخوان: سلكوا طريق العنف بعد 2013
انضميت ل الإخوان في الكلية.. اعترافات زوج عائشة الشاطر: درست مناهج الجماعة وبقيت عضو عامل
وقال زوج عائشة خيرت الشاطر: "في سنة 2014 اتعرفت على أستاذ محامي كبير اسمه عزت غنيم، عضو في لجنة الشريعة بنقابة المحامين، وكان مهتما بالقضايا السياسية وكان في شخصية تانية عندها نفس الاهتمام وهي المحامية هدى عبد المنعم وهي طبعا عضوة في جماعة الإخوان، واتفقنا إننا نؤسس شركة محاماة يكون شغلها هو قضايا المحبوسين من الإخوان وفعلا أسسنا الشركة واخترنا اسمها مع بعض وكان "التنسيقية المصرية للحقوق والحريات"، وسجلنا الشركة بشكل قانوني في نقابة المحامين باسمي أنا وأستاذ عزت وكان معانا ناس تانية".
وأضاف زوج عائشة الشاطر المحامي محمد أبو هريرة: طوفي الفترة دي اشتغلت معانا في الشركة عائشة بنت خيرت الشاطر واللي جابتها الشركة هي أستاذة هدى عبد المنعم لأنها تعرفها معرفة أسرة، وساعتها عائشة كانت لسه طالبة في كلية الحقوق جامعة عين شمس لكن كانت بتشتغل معانا بشكل غير رسمي وكان دورها إنها ماسكة ملف السيدات المقبوض عليها، وقعدنا شغالين على الحال ده سنتين لكن للأسف أنا تعبت من الموضوع لأن حسيت إن دوري كمحامي مالوش قيمة وتركت العمل في الشركة، واللي عرفته إنها فضلت شغالة لمدة سنة تقريبا وبدأت أهتم بالشق القانوني لمجال العقارات وآخد القضايا اللي من النوع ده".
وتابع زوج عائشة الشاطر: "قبل ما أسيب الشركة اتجوزت عائشة خيرت الشاطر وساعتها هي كانت انفصلت عن زوجها ومعاها منه 3 أطفال هم حمزة ونور وعبد الله، وأنا كمان كنت انفصلت عن زوجتي وكان معايا منها حمزة وحور، وساعتها كان خيرت الشاطر محبوس وأنا طلبتها من ابن عمتها يحيى غزلان وكان وكيلها يحيى إسماعيل، وبعدين عزلنا في التجمع الأول عشان عائشة تكون قريبة من والدتها اللي ساكنة هناك".
واستكمل زوج عائشة الشاطر في الاعترافات: "أنا معرفش إذا كانت عائشة دخلت الإخوان ولا لأ لكن أنا من ساعة ما اتجوزتها مشوفتش ليها أي نشاط تبع الجماعة، وكنا عايشين مفيش أي مشكلة خالص أنا في شغلي وعائشة ربة منزل واخدة بالها من الأولاد، وقبل زواجي من عائشة كنت اشتريت بفلوسي سيارة وبعد الزواج اشتريت سيارة لعائشة، وكان دخلي كويس من أعمال السمسرة والمحاماة تقريبا يوصل 20 ألف جنيه، بدفع منهم 6 آلاف جنيه إيجار الفيلا اللي كنا قاعدين فيها والباقي كت بصرفه على البيت، وعائشة معاها مبلغ كانت بتحوشه للأولاد من زمان، بالإضافة إلى أنها كانت بتشتري لحوم وتبيعها على الإنترنت، وبعدين أنا اتقبض عليا".
عائشة خيرت الشاطر: محمد مرسي كان ضعيفا
وكان "صدى البلد" نشر نص اعترافات عائشة خيرت الشاطر، ابنة القيادي خيرت الشاطر، نائب مرشد جماعة الإخوان، في القضية رقم 1 لسنة 2021 جنايات أمن الدولة طوارئ مدينة نصر ثان، والمقيدة برقم 703 لسنة 2021 كلي القاهرة الجديدة، وبرقم 1552 لسنة 2018 حصر أمن الدولة العليا.
وقالت المتهمة عائشة خيرت الشاطر، في اعترافاتها أمام جهات التحقيق: "لما لقيت إن المشاركة مع التنسيقية المصرية للحقوق مش هتوصلني لحاجة بخصوص والدي، تركت العمل فيها ومكنتش بشارك، حتى زوجي محمد أبو هريرة مكنش بيشارك في أي حاجة فيها وعشان كدة مشوه منها، وبعد ما تركت العمل فيها وتركت العمل الخيري".
وأضافت عائشة خيرت الشاطر: "في الفترة الأخيرة بقيت أشتري لحوم من الجزارات وأبيعها على الإنترنت بعد ما أزود على الكيلو 10 جنيه علشان أزود دخلي من خلال صفحة اسمها "طازج الريف"، وكنت ببعتها بمندوب للناس وده كان عشان أساعد زوجي في المصاريف، لحد أكتوبر 2018 كنت في البيت ومحمد كان نازل يقابل إبراهيم عطا عشان يغير منه دولارات بتاعته معرفش جايبها منين لأن إبراهيم كان بيكتب على الجروب إنه لو حد عايز يغير عملة هو ممكن يساعده، وبعد ما نزل سمعت صوته عالي جدا وبصيت لقيت ميكروباص أبيض وعربيات ملاكي والشرطة في الشارع تحت البيت ومحمد شاورلي ادخلي جوه، وبعدين تم تفتيش الشقة والقبض علينا".
وتابعت عائشة خيرت الشاطر: "كل اللي أعرفه عن جماعة الإخوان أن مؤسسها هو حسن البنا ومعلوماتي أنها جماعة دعوية في العالم كله، وأداء محمد مرسي كان ضعيفا في الحكم، يعني مقدرش ينجح في إدارة البلاد".
واختتمت عائشة خيرت الشاطر حدثها قائلة: "أنا كنت بشارك في الاعتصام بصورة فردية ومكنتش بعمل حاجة وبقعد لوحدي، ويوم الفض خرجت مع الناس اللي خرجت من الممرات بتاعة الشرطة".