نجل أحد ضحايا الغسيل الكلوي بمستشفى ديرب نجم يروي تفاصيل الحادث.. فيديو

روى نجل أحد ضحايا كارثة الغسيل الكلوي بمستشفى ديرب نجم تفاصيل الحادث قائلا: «والدي كان جاي يغسل عادي فجأة حس بتعب هو وكل اللي في العنبر حسوا بتعب من حرقان في العين واللي يحصله اختناق بعد ما خلصوا الغسيل بعشر دقائق».
وأضاف خلال لقاء تلفزيوني ببرنامج "90 دقيقة"، تقديم الإعلامي "محمد الباز"، على قناة "المحور"،: «ومرة واحدة أغمي عليه وتوفي وسألنا السبب أيه، الدكتورة المسؤولة عن قسم الغسيل قالت إن كل يوم جمعة الفلتر بيتغير هما ركبوا قبل الحادثة الفلتر ونسوا يغسلوا الرواسب اللي كانت بعد الفلتر القديم وكل الرواسب دي دخلت بعد الغسيل في الدم».
وتابع: «الدكتورة حاولت إنها تسعف المرضي بس مالحقتش تعمل حاجه مع 36 حالة في دروين، خصوصا إننا بنيجي الساعة 8 الصبح، وأما الحالات اللي حصلها اختناق جابولها إسعاف طلع ماكنش فيها اكسجين واضطروا إنهم يستعينون بإسعافات من المحافظة».
وأردف: «قولت للمأمور أنا مش هاخد والدي غير أما أعرف أيه اللي حصل، رد عليا قالي حقك ، وكان فيه حالات توفت وأهلهم خدوهم البيت».
واستكمل: «39 حالة غسيل في شيفت واحد يعني الناس اللي بعد كدا لو كانت دخلت كان ايه اللي هيحصل».
جدير بالذكر أن الدكتور ممدوح غراب، محافظ الشرقية، وبرفقته الدكتورة هالة زايد، وزيرة الصحة والسكان، قاما بزيارة لمستشفى ديرب نجم أول أمس للوقوف على أسباب واقعة وفاة 3 من مرضى الغسيل الكلوى، وإصابة 15 آخرين تم نقلهم لمستشفيات الجامعة والأحرار والمستشفيات الخاصة لاستكمال جلسات الغسيل الكلوي ولتقديم أوجه الرعاية الصحية والعلاجية اللازمة لهم.