الرئيس السيسي في جلسة استراتيجية بناء الإنسان المصري: إجراءات الإصلاح أمامنا واضحة ونستطيع تنفيذها .. صور

الرئيس السيسي:
اجراءات الاصلاح واضحة ونستطيع تنفيذها
كل 100 حالة زواج يحصل فيها تقريبا 50% حالة طلاق ولما طلبت يتعمل تشريع لتوثيق الطلاق هوجمت
اللي اتعمل واللي هيتعمل رضيتوا بيه أو ما رضيتوش بيه هقابل بيه ربنا وأرجو أن يقبله منا
شارك الرئيس عبد الفتاح السيسي في جلسة استراتيجية بناء الانسان المصري في المؤتمر الوطني السادس للشباب والذي يقام في جامعة القاهرة ، حيث توجه الرئيس السيسي، بكلمة لشباب مصر، قائلا:" دائما إجراءات الإصلاح أمامنا وواضحة ونستطيع تنفيذها".
وأضاف الرئيس السيسي "التحدي الكبير هو بناء الإنسان، وهو تحدي الإنسانية كلها، تصدى له فقط ربنا والأنبياء والرسل"، مُضيفا: "صياغة الانسان وبناؤه بقيم رؤية رسالة الرسالات، وعندما نتحدث عنها اليوم، للوقوف أمام أنفسنا بصراحة وموضوعية بأننا نحتاج لتحرك قوي وفاعل في إعادة صياغة الشخصية المصرية لكي تتطور بما يليق بمتطلبات العصر والانسانية".
وتابع: "انتوا مصدقين ان فيه حالة استهداف حقيقية لينا ولا لأ.. خلال سنوات طويلة ماضية تم استهداف الانسان المصري بكل ما تعنيه الكلمة، ونتيجته أصبحت صعبة علينا.. احنا مستعدين ندفع فاتورة الإصلاح ده ولا لأ".
وتحدث الرئيس السيسي عن بناء الإنسان والأمة، قائلا: "عاوزين تغيروا بلدكوا طب انتوا مستعدين تدفعوا التمن ده، أنا بتكلم عن التعليم، طب لما تيجي تتكلم عن الخطاب الديني، انتوا خايفين لنضيع الدين، هو اللى إحنا فيه ده فيه أكتر منه ضياع للدين".
وتابع الرئيس،: "يعني عاوز أقلكوا هي الحرب استثناء ولا أصل، الحرب استثناء، لكن لما يكون فكر أمة مبني على الحرب فقط، يعني فهمها في فترة ال100 أو ال 200 سنة الأخيرة إن الحرب هي الأصل والاستثناء هو السلام، معقول فيه فهم ديني كده، وانتوا خايفين إن إصلاح الخطاب يضيع الدين، هو فيه ضياع للدين أكتر من كده".
واستطرد الرئيس، "اللي ألحدوا دول ناس اهتزوا واتلخبطوا نتيجة اللى إحنا فيه ده، الناس دول مصدقوش إن الخالق العظيم نزل أديان تهد الدنيا، فهل انتوا مستعدين تغيروا الخطاب الديني ولا خايفين لنضيع الدين، طب مستعدين لتعديل القيم الأخلاقية، طب مستعدين تقبلوا في التليفزيون في السينما والمسرح سلوكيات لا تليق وبعدين تقولوا إبداع وحرية إبداع، في خيط رفيع، عاوزين تصلحوا ولا مش عاوزين".
ووجه الرئيس حديثه لجموع الشعب المصري عندما تحدث عن بناء الإنسان، قائلا "أنا بقول الكلام ده لكل موظف وكل مدرس وكل رجل دين وللبرلمان، عملية بناء الإنسان المصري هي عملية مجتمعية وليست عملية حكومية".
وتابع الرئيس: في مداخلة له بالمؤتمر السادس للشباب، "لكن محدش يفهم إننا معانا عصايا سحرية لبناء الإنسان، دي عملية فيها تفاعل شديد بين الإصلاح وبين المجتمع، اللى المفروض يكون مستعد للإصلاح ويدفع تكلفة الإصلاح".
وتحدث الرئيس عن عدد من القضايا، أبرزها بناء الإنسان المصري، كما تطرق إلى المخططات التي تحاك ضد مصر وشعبها.
وقال الرئيس السيسي: "إحنا دخلونا في أمة ذات عوز، أمة الفقر، دخلونا فيها، ولما أجي أخرج منها، يقلك هاشتاج ارحل يا سيسي، أزعل ولا مزعلش، في دي أزعل".
وأضاف: "لازم نخرج من العوز اللى إحنا فيه، العوز العلمي والاقتصادي والمعنوي والاجتماعي اللى دخلنا فيه، إوعوا تفتكروا إننا هنقدر نخرج منه بالحكومة أو بأى حد، لازم كلنا نحط إيدينا في إيد بعض".
وتطرق في حديثه لارتفاع نسب الطلاق وتأثيرها على المجتمع.
وقال الرئيس السيسي: "بتقولوا القوانين والتشريعات، طب انتوا شايفين القضايا المجتمعية اللي عندنا، يعني مثلا قالوا نسب الطلاق 44%، يعني كل 100 حالة زواج يحصل فيها تقريبا 50% طلاق، إذا كان بيقولوا في 9 مليون طفل بدون أب وأم بشكل مباشر، وفي كمان 15 مليون طفل بدون أب وأم بشكل غير مباشر، يعني انفصال غير موثق خفي، هل تتصدوا كمجتمع ولا لأ".
وأضاف الرئيس: "أنا لما طلبت يتعمل تشريع لتوثيق الطلاق هوجمت، على الأقل مع التطور اللى حصل في المجتمع والحياة الإنسانية كلها على مدى 1400 سنة ميحقليش كمجتمع مش كرئيس إني أحمي المجتمع! انتوا عاوزين تحولوا ال9 مليون طفل وال 15 التانيين لإيه، هل ده مجتمع فيه استواء ولا احنا رايحين لعدمية".
وأكد الرئيس عبدالفتاح السيسي، على ضرورة تكاتف المصريين، ووضع أيديهم في أيدي بعضهم البعض للخروج من المأزق الذي تمر به الدولة، قائلا:"اوعوا تفتكروا هنخرج منه بالحكومة أو أي حد، لابد من وضع أيدينا في أيدي بعض".
وأضاف الرئيس السيسي، قائلا:"إذا كنتم عاوزين تسلموا لأولادكم وللشباب صورة حقيقية جديدة للهوية المصرية التي تتحدى عصرها، أبدا أنا لا استدعى الماضي رغم احترامي له، ولكننا نحتاج لهوية وطنية تستطيع التعامل والتفاعل مع الواقع وتطوره".
وتابع:"الاشكاليات الموجودة في الاديان كلها، مش قادرة تصدق ان اللي خلق الدين ربنا واللي عمل التطور والانسانية ربنا، فبيصطدم، وتقول أخلى فهمي للنصوص يتوافق مع الواقع الجديد الذي نعيشه تصدوا للأولين نجحوا، ولما نجحوا مجتمعاتهم أصبح عندهم حصانه ومناعه ضد الضياع، أصبح المجتمع متناسقا وقويا".
واستطرد الرئيس السيسي: "عملنا عزل لأنفسنا.. الراجل المتدين شكل والمواطن العادي بقى شكل تاني وهو لا فرق بينهم، كل ما يكون فهمه الديني مناسب، سيكون سلوكياته وممارساته مع نفسه ومجتمعه مناسبة وجيدة.. ولازم تصدقوا إنهم عاوزين يضيعونا .. احنا دخلنا تجربة وربنا أراد أنها لم تكتمل ما قدروش يدمرها مش عشان احنا شاطرين أو الجيش تدخل أو السيسي وقف، ولكن أن ربنا قال لأ".
واستكمل:"فيه مكر يقدر يزيل الجبال، اوعو تتصورا أن البشر بسيط، العقول البشرية وتطورها وفنون المكر والقيد بقت شديدة الغموض والتخفي، ولما اجي أقولكم كده تطلعوا 21 ألف اشاعة انتوا بتعملوا ايه.. بتداولكم للموضوع جزء من الاساءة لقدراتكم ولهزيمة أنفسكم".
وتابع:"اللي اتعمل واللي هيتعمل رضيتوا بيه أو ما رضيتوش بيه هقابل بيه ربنا وأرجو أن يقبله منا.. احنا كحكومة بنحط سياسات واستراتيجيات نجري على تنفيذها ، وأن المتجه العلمي والتخطيط العلمي والمسار العلمي لابد أن يستمر وينفذ، وعملية الاصلاح لا تنتهي في سنة أو اثنين وخمسه ولكنها مستمرة لأنها تتعلق بالانسان".