د. كريم عزمي يكتب: رجل فوق الأربعين وفتاة العشرينات

علاقة بقت منتشرة فى مجتمعنا الفترة الأخيرة وهي العلاقة بين رجال فى سن الأربعين وأعلى وفتيات فى سن العشرين وأعلى، طيب العلاقة دى ليه بقت منتشرة جدا دلوقتى؟؟؟ فى مجتمعنا الآن النساء بقوا يشتغلوا زى الرجال ويمكن أكتر، ونتيجة لكده ابتدت تفقد جزء كبير من اهتمامها بنفسها فى بعض الأوقات، وده طبيعى نتيجة الضغوط اللى عليها.
يعنى لو راقبت النساء فى أى يوم عادى هتلاقي يومها كالتالى:
- تصحى قبل أى حد علشان تجهز ولادها للذهاب إلى المدرسة.
- وبعدين تجهز الفطار لزوجها.
- وبعدين تجهز هي شخصيا وتنزل شغلها.
- وبعدين تروح لشغلها وتواجه الضغوط الطبيعية للعمل.
- تخلص شغلها ومفيش مانع تروح السوبر ماركت تشترى مسلتزمات بيتها.
- وبعدين تروح بيتها وتجهز الغدا لولادها وزوجها.
- ممكن تستريح لمدة ساعة.
- بعد الساعة تبتدى تذاكر لأولادها.
- بعد كدة تشوف متطلبات زوجها.
ده تقريبا يوم أى ست مصرية، فالطبيعى إن الزوج يقدر ده ويستحمل شوية الدنيا معاها، لكن للأسف اللى بيحصل إنه بيهرب من مواجهتها بمشاكله ويروح يحب بنت صغيرة فى العشرينات علشان فاكر إنه معاها هيلاقى حل لإهمال زوجته ليه، وبالمرة ممكن يعلم زوجته درس قاسي، وكل دى أوهام بتكون فى دماغه أو بالبلدى بيحلل لنفسه اللى بيعمله علشان وجع ضميره اللى لسه صاحى جواه، ضميره اللى بيقوله مثلا:
- طيب إيه ذنب الست اللى وقفت معاك طول عمرها إنك تسبب ليها الجرح النفسى ده؟؟
- طيب إنت كمان بتعمل اللى عليك تجاهها ولا بتدور على حقوقك وبس وبتنسى حقوقها؟؟
- طيب مش ممكن البنت الصغيرة اللى حبتها دى تكون أسوأ بكتير من اللى فى خيالك؟؟
- طيب منظرك هيكون إيه لما زوجتك تعرف بالعلاقة دى وهتواجهها ازاى؟؟
كل دى أسئلة منطقية، لكن هتلاقيه بيتناسى كل الأسئلة دى والأنانية وحب الذات هما اللى بيوجهوا صاحبنا للغلط ده، بل وبيحلل لنفسه كل اللى بيعمله.
طيب يعنى إنت جايب الغلط كله على الرجل، يا ترى بقى البنت الصغيرة اللى رضيت بحب رجل فى سن والدها عادى وطبيعى؟؟ لا طبعا، دى جرمها أكبر من الرجل، لأنها أنثى وعارفة إحساس الست بالخيانة بيكون قاسى وصعب ازاى، لكن برضه هي فكرت فى نفسها وبس وحبت راجل أكبر منها ب20 سنة علشان تلاقى معاه الحياة السهلة اللى ممكن تتعب فيها شوية مع شاب لسه بيتدى حياته، لأن رجل فى الأربعين أكيد هيكون مستقر ماديا، ومن غير لف ودوران تقريبا ده بيكون هدف البنت دى، إنها تأمن حياتها ماديا.
ونسيبنا بقى من الحب المزيف اللى بتتغنى بيه للرجل ده، وطبعا ولأنها لسه بنت صغيرة مش فاهمة الدنيا وفاكرة إنها أذكى الناس، خداعها بيكون سهل، وبتتصدم بعد شوية لما الرجل المتزوج يسيبها ويروح لبنت أخرى أجمل منها، وفى النهاية بيرجع تانى لزوجته اللى لما بعد عنها عرف قيمتها كويس وفهم الفرق بين بنت صغيرة عاوزة تاخد كل حاجة على الجاهز وبدون مجهود، وبين زوجة وفية أفنت عمرها علشان يوصل للمستوى المادى والاجتماعى المرموق اللى هو فيه دلوقتى.
طيب إيه فرق السن الطبيعى بين الرجل والست فى علاقات الزواج؟؟ علماء النفس قالوا إن الفرق بيكون من 3-6 سنوات هو الفرق الطبيعى لصالح الرجل.
طيب لو ست عرفت إن زوجها على علاقة بغيرها تعمل إيه؟؟ فى الأوقات دى الموضوع بيكون صادم شوية لكن التفكير بهدوء بيكون الحل والأمثل والأصعب، وعلشان هو صعب هتكلم عنه فى المقال القادم باستفاضة بإذن الله.
#كيميا_البشر