في اليومين اللى فاتوا حصلت حاجة هزت مواقع التواصل الاجتماعي كانت عبارة عن بوست كالآتي: "إن كان في بنوتة صغيرة راحت هي ومامتها فرح، وإن الأم كانت لابسة هي وبنتها نفس شكل الفستان والبنت الصغيرة لابسة الدهب اللى مامتها جابته ليها زي ما بنشوف في أغلب المناسبات، وبعد يوم من الفرح الأم نزلت فيديو للبنت على الفيس، وبعد ما نزلت الفيديو بساعة البنت توفيت بشكل بشع نتيجة حادثة، بإن البنت دماغها اتحشرت ما بين الأسانسير والحيطة وجالها نزيف داخلي بالمخ وماتت في لحظتها، وإن الطفلة ماتت نتيجة الحسد، ويا جماعة بلاش تتصوروا مع أولادكم وتنزلوا الصور ولآخر البوست كلام عن الحسد". أولًا: ربنا يصبر أهلها ويعوضهم خير وتكون سبب لدخولهم الجنة، بس اللى لفت انتباهي كانت فين أم البنت لما دماغها اتحشرت في الأسانسير؟ وإيه علاقة الحسد بالإهمال وإننا منخليش بالنا من أولادنا؟ يعني إيه بنت عندها سنتين وفي الأسانسير لوحدها ولو مامتها كانت راكبة معاها ماخدتش بالها منها إزاي؟ يبقى ده اسمه إهمال مش حسد. ثانيًا: أنا معاكم الحسد مذكور في القرآن بس ده ما يمنعش إننا ناخد بالأسباب، وليه مش بنسأل نفسنا إن الأجانب هما كمان بينزلوا صور لأولادهم وفيديوهات ليهم وعيالهم ما شاء الله اللهم بارك زي القمر وممكن من غير ما حد ياخد باله يحسدهم، ورغم كده ماشوفناش حد أجنبي بيقول أنا عيالى اتحسدوا لما نزلوا مصر أو لما شيرت فيديو ليهم.
وفي بين الحسد والإهمال خيط رفيع، يعني ما يبقاش معايا فلوس كتير وابتدي أعمل حاجات ممكن تضرني وارميها على شماعة الحسد وإنها عين وصابتني، مش أبقى أنا جايب عربية آخر موديل وماشي على آخر سرعه ومش واخد بالي ويحصلي حادثة وأقول حسد، مش وأنا بعدي الطريق وماسك الموبايل وباصص فيه وعربية تخبطني وأقول حسد، وأمثلة كتير. ياريت يا جماعة ناخد بالنا من نفسنا ومن أولادنا أكتر من كده، وبعدين إحنا نسينا إن "لكل أجل كتاب" والقضاء والقدر، يا ريت قبل ما نرمي كل حاجة على الحسد والعين والقر نشوف إحنا كمان بنعمل ذنوب إيه وربنا بيبعتلنا حاجات بيرفع بيها الذنوب دي عنا، وقال تعالى "إِنَّ الله عِنْدَهُ عِلْمُ السَّاعَةِ وَيُنَزِّلُ الْغَيْثَ وَيَعْلَمُ مَا فِي الأَرْحَامِ وَمَا تَدْرِي نَفْسٌ مَاذَا تَكْسِبُ غَدًا وَمَا تَدْرِي نَفْسٌ بِأَيِّ أَرْضٍ تَمُوتُ إِنَّ اللهَ عَلِيمٌ خَبِير"، وقال الرسول (صلى الله عليه وسلم): "اعْلَمْ أَنَّ الْأُمَّةَ لَوْ اجْتَمَعُوا عَلَى أَنْ يَضُرُّوكَ بِشَيْءٍ لَمْ يَضُرُّوكَ إِلَّا بِشَيْءٍ قَدْ كَتَبَهُ الله عَلَيْكَ". والحسد آه مذكور، بس إنت ربنا لما اختارك وابتلاك أنت فهو ليه حكمة في كده، يمكن بيخفف عنك ذنب عملته أو بيمحو خطيئة إنت عملتها وبيصطفيك دونًا عن الخلق، أو لو إنت إنسان مؤمن أوي عايزك نقي واختارك أنت بالذات وابتلاك بنقص في الصحة أو الأولاد أو المال لحكمة هو اللي بيعلمها، أو بيختبر مدى قوة إيمانك وصبرك. آخر حاجة أختم بيها: "قل لن يصيبنا إلا ما كتب الله لنا".. حفظكم الله من كل شر وسوء.