عيد الضحك

مصر تقريبا اكثر بلد في الدنيا عندها أعياد واكثر شعب بيحتفل بأعياده هم المصريون ، و"لو مش مصدقين تعالوا نحسبها".
في أول يناير نحتفل بأعياد المسيحيين وفي اخر يناير بنحتفل بأعياد الشرطه والثوره ، ندخل علي فبراير نلاقي عيد الحب "الفالنتين" والورد الاحمر وجو النحنحه والرومانسيات ، روح يا فبراير وتعالي يا مارس وكل سنه وانتي طيبه يا مامتي وبعوده الايام.
ندخل علي أبريل وما أدراك ما ابريل عيد الربيع و شم النسيم والفسيخ والبصل ومعاه ولازق فيه عيد تحرير سينا اللي معلمينهُ بأغنيه سينا رجعت كامله لينا ، يخلص ابريل ولسه بنقول يا مايو يقولك عيد العمال اول مايو والعلاوه ياريس، يخلص مايو وييجي يونيه وكل سنه والامه الاسلاميه بخير شهر رمضان المعظم ونص يوم بأه يا معلم بس معقوله مش هناخد اجازه ولو يوم كامل في يونيه؟ لأ ودي تييجي ! طبعا مايصحش ..
خد عندك قرار باعتبار تلاتين يونيه اجازه يابطل، لسه داخلين علي يوليو يقولك كل سنه والامه الاسلاميه بخير عيد الفطر المبارك خد 3 ايام اجازه او اربعه او خمسه او اسبوع انت ونصيبك، اظن كده خلاص مافيش اجازات بأه ..
لأ طبعا انت شكلك كده نسيت ثورة يوليو يا كبير وخد عندك اجازه يوم تلاته وعشرين يوليه..خلاص بأه أغسطس مافيهوش اجازات صح؟ لأ طبعا ودي تييجي ده احنا في اغسطس يعني الحر والرطوبه يعني اجازة المصيف بأه يا برنس والساحل وفورمة الساحل فتلاقي نص البلد ضاربين اجازه مصيف، خلاص كده مش ناقص حاجه احتفالنا بالشرطه والثوره(تين)(تلاته) وست الحبايب وسينا والعمال وكلنا فسيخ وصومنا رمضان وعيدنا اسبوع وصيفنا اسبوع ها خلاص ولا رأي سبتمبر ايه؟ لأ طبعا ودي تييجي انت نسيت العيد الكبير كل سنه والامه الاسلاميه بخير والضاني والفته والكوارع والانتخه وخد عندك اسبوع اجازات يا معلم!
ها يا اكتوبر.. السادس من اكتوبر ونصر اكتوبر المجيد.. الله؟! هوه مش احنا احتفالنا بالعيد ده يوم عشره رمضان اللي فات؟ يقولك لأ دوكها هجري انما ده ميلادي! ماشي جت عليه يعني.. بس اظن كده بأه خلاص يا نوفمبر ولا رأيك ايه يقولك حرام عليك يا مؤمن انت نسيت هجرة رسولك من مكه للمدينه .. اللهم صلى وسلم وبارك عليك يانبى اجازه بمناسبه الهجره وفيلم الشيماء , ها يا ديسمبر السنه خلصت خلاص ولا رأيك ايه ؟ لأ انت شكلك كده ضليت الطريق وقلبك قسى ونسيت المولد النبوى والحلاوه وعروسة المولد خد عندك اجازة المولد النبوى.
طبعا كل ده غير الاعياد اللى مافيهاش اجازه زى عيد تحرير طابا وعيد الجلاء وعيد الفلاح وعيد الاب وعيد وفاء النيل وعيد السويس وعيد النصر وعيد ميلادى.
انا كده برضه ما اتكلمتش عن الاجازات العارضه والاعتيادى والمرضى والاذونات والتزويغات والمأموريات واجازه جواز واجازه وضع واجازه بدون اجر واجازه بنص اجر والجمعات والسبتات.
طبعا اللهم لا حسد ويارب زيد وبارك وكتر من اعيادنا واطرح فيها البركه وزيد .. بس الغريب جدا ان البلد اللى فيها كل الاعياد دى وشعبها بيحتفل بيها لو بصيت فى وجوه الناس هتلاقيها حزينه او متضايقه او قرفانه .. ايوه جرب تبص وتركز فى اى وشوش اى عينه عشوائيه ويا حبذا مثلا لو كان فى اتوبيس او فى مترو مثلا وشوف تعبيرات الوجوه هتلاقى ناس تايهه شقيانه بتجرى على اكل عيشها .. هتلاقى ناس نسيت الضحكه من زمان.
اقتراحى بعد المقدمه الطويله جدا دى اللى تعمدت اعملها يوم جمعه عشان اجازه بطبيعته اننا نزود يوم اجازه كمان وبجملة الاجازات يا ريس ويبقى ده يوم للشعب يضحك فى وش بعض ونسميه عيد الضحك او عيد الفرح.. ايوه خبط على كتف اللى قصادك اضحكله وبس .. ماتخافش مش هيقول عليك مجنون ولا حاجه لانه برضو هيضحكلك وبس.
ياريت نبتسم الصبح فى وش بعض بدل السبعات تمنيات والميه وحداشر المرسومه دايما على جبهة شعب دى.
عارف ان الشعب شقيان وتعبان ومش ناقص كلامى وعارف ان فيه ناس هتقول وده وقته مش حاسس باللى احنا فيه .. بس والله صدقونى الاحساس بالاخر ومراعاة شعور الناس والابتسامه فى وش اللى قصادك هتخرجك ولو لحظات من همومك وهتخرج اللى قصادك من همومه ولو ثوانى.
"تبسمك فى وجه اخيك صدقه" ده مش كلامى انا ده كلام خير الانام محمد رسول الله - صلى الله عليه وسلم - بالحب والخير والسعاده للعالمين .. تعالوا نجرب نبتسم فى وش اى حد نشوفه .. جربوا مش هتخسروا حاجه والله .. ابتسامه خفيفه مش هتشقق وشك ابدا ولو ما نفعتكش مش هتضرك ويبقى عملت صدقه وكسبت حسنات وبدأت يومك بطاقه ايجابيه مالهاش حدود.