ألتراس أهلاوي يعاند ويقرر حضور مباراة طلائع الجيش.. ويؤكد: الدوري بدون جمهور يعني قتل الكرة

أعلنت رابطة التراس اهلاوى حضور مباراة الفريق المقبلة أمام طلائع الجيش المقرر لها غدا فى أول لقاءاته بالدورى الممتاز لكرة القدم .
وأشارت الرابطة فى البيان الذى نشرته على صفحتها على موقع التواصل الاجتماعى " الفيس بوك " ان بداية الدورى بدون جمهور هو استمرار لقتل كرة القدم .
وجاء بيان الرابطة كالتالى: "عجبكم شكل الجمهور فى السوبر؟ حسيتوا الجمهور مهم يبقى فى المباريات.. فهمتوا معنى الكرة للجماهير؟ اللى شفتوه هيفرق معاكوا فى حاجة؟ هيخليكم تفكروا فى حلول.
كلها تساؤلات غالبا محدش هيجاوب عليها .. وللعلم الجمهور المصرى هو الجمهور المصرى فى اي مكان لما بيحس بالمسئولية بيكون قدها.
جمهور الكورة عايز يرجع الاستاد .. عايز يبقى فى مكانة الطبيعى .. واضحه ومش محتاج لا تفسير ولا شرح.
جمهور الاهلى تواجد فى مباراة اورلاندو فى البطولة الكونفدرالية .. ورغم هزيمة الاهلى لكن المباراة عدت بسلام .. ونفس الجمهور تواجد فى تدريبات الفريق مرات ومرات ومرات وبألالاف وبردوا مفيش مشاكل حصلت.
الجمهور طرح افكار كتير .. اما شركات خاصة للتأمين .. او ان الجمهور يأمن نفسة بمساعدة أمن النادى الاهلى .. واستعداد الجمهور للتفتيش .. لكن لا حياة لمن تنادى !!.
الحديث عن صعوبة حضور الجمهور بسبب الانتخابات شىء غريب .. واذا كان المسئولين مشغولين بالانتخابات .. مفيش اى مشكلة يسيبوا الكورة للجمهور وهو على اتم الاستعداد للحضور وتنظيم نفسة بنفسة بمشاركة من أمن النادى الاهلى.
بداية الدورى الجديد بدون جمهور هو استمرار لقتل كرة القدم فى مصر .. وعلية تقرر تجمع جمهور الاهلى وجميع سكاشن أولتراس أهلاوى فى القاهرة والمحافظات يوم الخميس القادم لحضور اولى مباريات الفريق فى الدورى العام امام طلائع الجيش .. التجمع الساعة الخامسة مساءً امام بانوراما 6 اكتوبر – صلاح سالم .. للتجمع والتحرك الى استاد بترو سبورت .. الكرة للجماهير ".