بالفيديو.. عضو ب ألتراس وايت نايت يتهم ضابط شرطة بإطلاق الرصاص عليه في محطة بنها وإصابته بشلل نصفي

مصطفى عبد الظاهر.. طالب بالثانوية العامة يرقد حاليا في مستشفى بنها في حالة حرجة بعد إصابته بشلل نصفي جراء إصابته برصاصة من مسدس ضابط شرطة بعد اندلاع اشتباكات بين ركاب القطار وشباب أولتراس الوايت نايت في محطة سكة حديد بنها بسبب ترديد الشباب الأغاني الخاصة بهم في القطار.
وبحسب تقرير طبي عن حالة مصطفى الشهير ب"ظاظا" والذي لم يتعدى ال 17 عاما، فقد أصيب بشلل نصفي بعد استقرار الرصاصه بعموده الفقري, ويحتاج مصطفى إلى عملية جراحية تبلغ تكلفتها 250 ألف جنية .
وعن ملابسات إصابته بالرصاص, قال مصطفى "ظاظا" في مقطع فيديو إنه حضر "ميتنج " لجروب الوايت نايتس في القاهرة بعدها اتجه لمحطة مصر، واستقل القطار المتوجه لمدينة بنها.
وأضاف: " داخل القطر كنا بنغني أغاني الأولتراس ،فى راجل كبير جه قعد يتخانق معانا، فالضابط تدخل وقال: "خلاص ما تتكلموش وماحدش يعمل صوت"، قولنا له خلاص ماشي وقعدنا وقفلنا علينا الباب وما حدش اتكلم شوية لقينا القطر كله واحنا نازلين بيحدف علينا طوب فخرجنا بنجري ،قام جه الظابط ده ضرب 3 طلقات, والطلقة الثانية جت فيه, وأول ما اتضربت وقعت مش حاسس بجسمي كله ،جسمي كله ولا كأنه موجود هو بس مافيش غير فوق زمايلى شالوني وجريوا بيا على العربية، فخدوني في عربية سوزوكي وجابوني هنا في المستشفى".
وقال أحد شهود العيان وأحد أعضاء جروب الوايت نايتس: سمعنا صوت أول طلقة كنا بنحسبها صوت، وأضاف:"الطلقة التانية لاقينا مصطفى وقع من طوله، مش عارفين هو مصاب فين لما روحنا المستشفى اكتشفنا أن الطلقة أخدها في ضهره .
ومن جانبها, قالت والدة مصطفى إن هناك شاب حضر إليها وأبلغها أنه كتب شهادته ونشرها على "الانترنت" ،وذكرت أن الشاب أخبرها أنه كان واقفا بجانب ضابط الشرطة ،وشاهده وهو يصوب على مصطفى ،بعدها اتجه للقطر وقال للناس ادينى موت لكم منهم واحد قالوله تسلم يا باشا ".
وأضافت والدة مصطفى: " ابني قعد 3 أيام مش راضيين يدخلوه غرفة العمليات علشان يطلعولة الرصاصة، قالولنا مافيش غرفة عمليات فاضية، يعنى 16 غرفة عمليات في المستشفى مافيهمش غرفة عمليات تنفع يدخلوا ابنى فيها، يعني الغلابة يروحوا فين يموتوا؟ أحنا للأسف مالناش كرامة في بلدنا".
وأكدت والدة مصطفى أن الطبيب الذى أجرى العملية لابنها أخبرها أن الرصاصة 9 مللي ،خرجت من سلاح ميري.
وفي نهاية حديثها أشادت والدة مصطفى بشباب ال"وايت نايتس" ،قائلة "كنت بتخانق معاه علشان ما يروحش مع الاولتراس ، لكن بعد اللي حصله اثبتوا ان العيل فيهم ب"ميت راجل" طول الوقت جنبنا ،بيشوفوا كل طلبات مصطفى وبيجولنا من كل مكان يزوروه ،العيال اثبتوا انهم عندهم حق هما الصح واحنا الغلط ".
مصطفى "ظاظا": رجل عجوز اعترض على ترديدنا أغاني الألتراس بالقطار والضابط قال "اسكتوا".. والركاب ألقوا علينا الطوب
شاهد: الضابط أطلق الرصاص على مصطفى وقال للناس في القطر: "أدينى موت لكم منهم واحد.. وقالوا له: "تسلم يا باشا"
والدة مصطفي: الدكتور الذي أجرى العملية أكد أن الرصاصة التي خرجت من جسمه خرجت من سلاح ميري