زوجة الشهيد فوزي بخيت: كنت كل يوم استناه الساعة 5 دلوقتى هاستنى مين ...ضحك عليا وسابني

* جزم الناس كانت مليانة بلحم الناس ..لو كان خروف الضحية مكنش الدم واللحم هيبقى على الأرض بالشكل ده
كتب – عماد نصيف:
” سمير كان مستعجل اليوم ده خالص وهو رايح الكنيسة وكأنه كان عارف إيه اللي هيحصل ” بدموعها حاولت زوجة الشهيد فوزي بخيت سليمان(54 سنة ) أن تنقل لنا مشاعر الحزن والحسرة التي تعيشها الأسرة بعد أن فقدت عائلها وشريك عمرها قائلة :” كان سمير وده اسم شهرته مستعجل وهو نازل للكنيسة وطلب من نادر ابنه الكبير إن يوصله للكنيسة علشان يلحق الصلاة من أولها ، وهو الله يرحمه كان دايما يحب الصلاة ومواظب عليها وكان بيحب الناس كلها وعمره ما غلط في أي شخص حتى انه عاش في الشارع لمدة 50 سنة و ماجرحش حد في يوم من الأيام بكلمة ، حتى انه لما كان بيلقى طفل بيبكى كان ممكن يبكى زيه “
وهنا يختنق صوت الزوجة بالبكاء وتقول :” سمير كان بيشتغل كهربائي على باب الله ومن شغله لبيته ومن البيت للشغل وكان دايما يرجع الساعة 5 ويجيب العيش معاه وأنا كنت باستناه كل يوم دلوقتى استني مين “
وتقول الزوجة لمن نفذوا جريمتهم :” ما تقنعنيش إن اللي عمل الجريمة من خارج مصر ، وما ينفعش انك تسرق دبلة وساعة ومحفظة من واحد ميت وأنت اللي قتلته ، انتم مش بني أدمين كيف تفجروا الناس بهذا المنظر البشع وتترمى جثثهم ولحمهم على الأرض ده لو كان خروف الضحية مكنش الدم واللحم هيبقى على الأرض بالشكل ده ، انتوا بتضحوا بينا ولا إيه ؟؟ ما اقدرش غير أقولكم ربنا موجود وقادر على كل شيء ”
وتتذكر الزوجة هذا المشهد المؤلم قائلة :” سمعنا اللي حصل وجرينا على الكنيسة ووصلنا لقينا الدنيا كلها دم وجثث ، حتى أن جزم الناس كانت مليانة بقطع اللحم و الدم ، ودورنا أنا وبنتي على سمير وملقنهوش وسط الجثث ، ووقتها لما روحنا الكنيسة الأمن بدأ يهيج ويطارد الشباب اللي بيدور على أهله وسط الجثث ”
مواضيع ذات صلة
1. والد الشهيد مينا: بعد الحادثة شحنت له رصيد علشان يعرف يكلمنا بس ما اتصلش لحد دلوقتى
2. والدة الشهيد بيتر سامي 17 سنة: صليت لربنا يقربه للكنيسة بس مكنتش اعرف انه هيروح السماء
3. اتهام مواطن بقتل زوجة ابن عمه بدافع الانتقام والسرقة
4. التجارة تقرر غلق المحال التجارية الساعة 10 خلال الشتاء و11 في الصيف
5. جهات سياسية عليا تتوسط لدي تيار استقلال القضاء لحل أزمة قاضي البدرشين مع مؤمنة كامل