حركة 6 ابريل المنصورة تواصل حملة توعيتها للمواطنين

استكمالا للمجهود التي تقوم به حملة طرق الأبواب والتي تنظمها حركة شباب 6 ابريل المنصورة للتوعية السياسية, قام أعضاء من الحركة صباح أمس بتنظيم جولة في مدينة المنصورة قاموا فيها بتوزيع 3000 بيان يتضمن تعريف عضو مجلس الشعب وكيفية مهامه ووظائفه داخل المجلس مطالبين الناخبين بحسن اختيار من يمثل عنهم بالمجلس.
حيث جاء نص البيان كالتالي 'مجلس الشعب هو اللي هيعمل لنا الدستور الجديد.. يعني إحنا عاوزين مجلس يحقق مصلحة الشعب كله ويقوم بدوره علي أكمل وجه.. ونتأكد إن عضو مجلس الشعب عاوز مصلحتنا إحنا.. مش مصلحته هو.
مجلس الشعب هو اللي بيحط سياسة مصر في الاقتصاد والتعليم والصحة والاتفاقيات الدولية, وميزانية الدولة.
مجلس الشعب هو اللي بيراقب عمل الحكومة والوزراء ويحقق معاهم ويستجوبهم, ويفصلهم لو حصل تقصير أو إهمال.
يعني عضو مجلس الشعب مش مهمته انه يشغل ابنك.. ده مهمته انه يحط خطة كاملة للقضاء علي البطالة.
يعني عضو مجلس الشعب مش فأيدته انه واسطة ليك.. ده المفروض انه يجيب لك حقوقك وحقوق شعب مصر كله.. يعني عضو مجلس الشعب مش فأيدته انه يعالجك علي نفقة الدولة.. ده المفروض انه هيعتمد خطة كاملة للخدمة الصحية والعلاج الشامل المجاني يحفظ للكل كرامته.. للفقير قبل الغني.
مش عاوزين مجلس شعب من الحزب الوطني.. اللي سرقوا الشعب وكذبو عليه وحققوا مصالحهم الشخصية فقط.. ما تخليش حد يضحك عليك ويقولك انتخبني علشان دينك وربنا يحبك ويرضي عليك وتدخل الجنة.. وهو كل همه السلطة ومصلحته الشخصية وبس.. الشعب كله هو اللي بيحمي الدين.. مش الأفراد هم اللي هيحموه.. طيب نختار مين في مجلس الشعب؟.. لازم نختار عضو مجلس شعب يؤدي مهمته علي أكمل وجه.. يراقب الحكومة.. ويصدر قوانين وتشريعات تخدمنا.. مش لازم اللي نختاره يكون ابن البلد.. نختار أي حد فاهم وواعي وهو هيخدم البلد.
مش عاوزين واحد لص أو مرتشي أو همه علي فلوسه.. الناس دي هتجري ورا مصلحتها الشخصية وبس.. نخلي بالنا من المنافقين والوصوليين.. دول ممكن يعملوا صفقات مع النظام علشان يحافظ علي مركزه ومصالحه الشخصية ويضيع حقوق الشعب.
نحترس من الجاهل.. اللي مش فاهم في الأرقام ولا يعرف في لغة القوانين.. واحد زيه هيناقش ميزانية الدولة أزاي؟؟ ولا هيعتمد قوانين تفيد الشعب أزاي ؟
نختار واحد مثقف وواعي وفاهم.. يحاسب الحكومة علي كل مليم بتصرفه, وكل قرار بتنفذه.
لو اخترت واحد علي أساس وجبة أو 50 جنيه أو وعد بوظيفة.. اعرف انك بتشاركه
في الجريمة, وهاتكون السبب في ضياع حقوق الناس وإهدار المليارات في مصر.. وفي الآخر.. لازم نختار عضو مجلس شعب يقدر فعلا يعمل دستور يحمي الشعب مش يحمي النظام.. دستور السلطة والرقابة فيه تكون للشعب.. دستور لا يصنع ديكتاتور.. دستور لا يصنع وزراء لصوص.. دستور يحفظ كرامتنا.. دستور يحترم آدميتنا وحقوقنا وحقوق ولادنا.. دستور يعبر عن الشعب كله.. دستور يحافظ علي ثورتنا العظيمة.
أقسم بالله العظيم أن أختار من يمثلني في مجلس الشعب أحسن اختيار.. وأن يكون قادر علي أداء دوره الرقابي والتشريعي, ويعبر عن الشعب في اختيار الدستور الجديد بغض النظر عن كونه ابن بلدي أو من عائلتي, ولن أعطي صوتي لجاهل أو منافق أو لص أو مرتشي أو صاحب مصلحة, أو طالب سلطة, أو لمن عرض عليّ رشوة مادية أو عينينه أو قدم لي خدمة في يوم من الأيام.. والله علي ما أقول شهيد.
جدير بالذكر أن شباب الحملة نظموا العديد من حملات طرق الأبواب بالعديد من مدت وقري محافظة الدقهلية أبرزها منية النصر، والمنزلة، والسنبلاوين، ومدينة المنصورة.