صباح الخير عليك يا مصر

صباح الخير علي 'التحرير'
علي الثورهْ
علي الجمرهْ وبقت بركانْ
علي الأمهْ
علي اللمهْ
وَ وقفة حُرة في الميدانْ
وَ ثورة يوليو من ثاني علي الطغيانْ
يا إيد فنان
يا روعة قصة الإنسانْ
يا منقوشة بصوت ربي علي القرآنْ
وصفحة خضرا في الإنجيلْ
يا أرض النيل
صباح النصر
صباح الخير عليك يا مصر
***
صباح الخير علي جيشك
علي الشجعانْ
علي وقفهْ
مهيش صدفهْ
وقالوا بيانْ:
ورِجْعِ النور ظهر ثاني
وراح الليلْ مع السجانْ
مهية البذرة موجودة
من أكتوبر وقبلُهْ زمانْ
لا يوم الأرض تنساها
ولا الرُّبانْ
جذور، وفْروعْ، وتعريشهْ
تحب اللمهْ، والعيشهْ
مع الخلانْ
مهو إنتِ الأَصلِ والصورهْ
يا غندورهْ
يا عصفورهْ
صباح النصر
صباح الخير عليك يا مصر
***
صباح الخير علي الأزهرْ
علي إمامه، علي شيوخه، وطلابه
وكلمة حق في قلوبهم يقولوها ولا يهابوا
صباح الخير علي القلعة، وصلاح الدينْ
علي الأهرام، علي الجيزة، ومجْد سنينْ
علي الأقصر، وأبو سمبل
صباح الخير علي السمرا، عروس النيلْ
علي هانم، علي بتعهْ، وأم الخيرْ
يا أُمَّي إِفْرحي وغَنّي، عَ لحن الطيرْ
تعالي شوفي وقفتهم بلا تأخيرْ
وقومي واحضنوا وْلادك وضُميهمْ
وحطيلهم علي الجمراتْ
سبع حباتْ
وارقيهمْ
أهم، همه، مشوا في النار ولبوكِ
عشان إنت بتتحبي وحبوكِ
صباح النصر
صباح الخير، عليك يا مصر
***
صباح الخير يا إنسية، يا جنية ف وادي النيلْ
يا زهرية عَ ألوانك مشتْ مواويل
يا فسقية من الخلاليل
يا آية جاية في ملايا تزيح الليلْ
يا فلاحهْ
يا تفاحهْ
يا نور العينْ
يا طبلية، عليها من الوِلادْ عشرهْ
تعشّيهم، تكفيهم، ويفيض الزادْ
يشدوا الشمس تطلعلك لاجل بكرهْ
نعم بكرهْ
مهو إمبارح ما يكفيشي
وتنسي الهم وتعيشي
صباح الخير علي التحرير ف يوم النصر
صباح الخير عليك يا مصر
***
صباح الخير علي نيلِكْ
علي بحورك وشطآنكْ
علي الموجهْ
علي الملاحْ
علي العامل، علي الفلاحْ
علي الطالب بيسهر ليلْ
علي التاجر صدوق وأصيلْ
علي سْهولكْ وأَشجارِكْ
علي غيطانكِ الخضرا
وتربة أرضها السمرا
علي جبالك، علي الصحرا
علي الشارع، علي الميادين
في يوم النصر
صباح الخير عليك يا مصر
***
صباح الخير يا ست الكلْ
صباح الفُلْ
يا نبع الخير يا واحة الكلْ
يا حاميهْ الكلْ
يا واسعهْ الكلْ
شبابك ودعوا الحسْرة، وعام الذل
وشالوا الظلمة بإديهم، وزاحوا الغِلْ
قومي وافرحي بيهم، وعيشي العصرْ
وغني لهم وضميهم في يوم النصر
مهو كله علي شانك يا ست الكل
صباح الخير عليك يا مصر