مش راجعين

ليه شَكلُكُم ياخَلق مُندَهِشين
مَجاش في بَالكو اني فيوم راح اثور ولا افتكرتوني غُلام مَسكين
ماحيلته غير فردة جِناح مَكسور
مَغلوب عَليَ أمرُه بَقاله سنين
شايف وجُواه الكلام مَحشور
مِستغرَبين اني بقول يَسقُط
وخَدت إيه لما هَتَفت يَعيش
ياما اتنازِلت وكُنت بَتحَليَط
خانِع وهَمي كان رغيف العيش
وكله فاهِم بَس مِستعبط
مَلهي وطاغوته ف مُلكه بيظَبط
وعشان مَلياش ضَهر يبقيَ مَاليش
طِلعُم عَلَيه الكِلاب
واحِد وَرا التاني
أَصرُخ كِفايه عَذاب
يعيدولي مِن تاني
بيقَسِموا ف لَحمي
مش سايبينلي مال ولا عرض
لَو مش عَاجبني الطوب
آكل ف دُود الأرض
وفيوم لَقيتني جَسور وبَتظاهر
قالوا ده واد مأجور بيتظاهر
لما فَتَشت المَخفي وِالظاهر
دَه البيه قَريبه ياصَاحبه يامصَاهر
يومها الزرُوع الخَضرا واليابسه
ويا العُيون الناضره والعابسه
لابسه التياب الهايصه والطَرحه
حابسه الوجوم والحُزن والفَرحه
خَرَجِت تِهِز العَرش للأرباب
فاحِت كما الأطياب
أسراب حَمَام زاجِل
خَلَعِت بيبان الضَباب
نَقَرِت بَياض السَحاب
الله عَلي طيشها
بتقول كلام مجنون
رجرج زوايا الكون
أصل الطلب عادل
عَزَف الهوا وقَسِم علي ريشها
لَحن الخَلاص مِن كل خَفافيشها
عَصَفِت رياحه وهَبت الأوطان
ثارت حِمَم مِن فُوهة بُركان
عَبِت لَهيب الشَمس في الميدان
رَفَعِت عَلَم كان هُوَ ده البُرهان
قامِت تِشيل البَغل مِ الأبريق
وتلِم تاني العَدل في الميزان
زَحَفِت وحُوش البَر ناويه الشَر بِتعاند
حِلفِت تبدد ضِحكة مولوده فيوم العيد
دَهَسِت غُصون زَيتون
ورَب العِزه كان شاهِد
أطفال عينيها تشوف
ضيوف الموت وتتشاهد
والعَتمَه لَجل تغور
تجُر ف إيدها ألف شَهيد
شَقِت خيوط النور
في ليلنا طَريق
طَرَحِت سَنابل قمح
يضوي بريق
عوده شديد
مَع إنه لِسَه بَرئ
زَي الوَليد يحبي
لكِنه جَرئ
وكفوف تِنَقي الضِحك
مِن الآهات
تِمسَح عُيون باكيه
عَليَ اللي فات
تِسجُد لرب الأرض
والسموات
يرحَم عَبيده الحَي
واللي مات
يحمي الأبيه مَصر
مِن العَثره
يمحي سَوَاد الماضي
مِن بُكره
خايف أوي يا مَصر مِن بُكره
مِن غِل مابيعرَفش غير يكرَه
خايف أوي لكِن أكيد فرحان
سَكرَه وراحِت وابتَدِت فِكرَه
قلقان وخايف
بَس مش نَدمان
ولا عمري هيأس
حتي مهما ان كان
قَلَقِي مِن التَعلَب ومِن مَكرُه
رَبِك كَريم والحَق بُكرَه يبان
أنا وانتي اهو بره القَفَص طايرين
جِناحَاتنا كات يابسه بَقَالها سنين
كَمِلنا ولا فَخ شَنكِلنا
بَس المُهِم ان احنا مش راجعين
maguedmansour@hotmail.com