#هشتجة

حد يعرف كهربائي شاطر ممكن يعمل فيشة للدماغ ورا الودن مثلا، نقدر نشدها لما نحب نبطل تفكير
#شد_الفيشة
أنا شايف في عينيكم نظرة أمل إن العربيات هترخص في 2019........
#انسوا
نفسي نفهم أن رفع الأذان وإقامة الصلاة في ميادين أوروبا هو دليل علي عظمة وتسامح....... الأوروبيين،مش دليل علي تسامحنا ولا عظمتنا خاااالص واسأل نفسك هل ممكن تسمح للمسيحي ابن البلد أو اليهودي بممارسة شعائرهم في ميدان التحرير مثلا؟؟؟ بلاش دي، لما إنت بتقول ان الرسول والسلف الصالح قدوتك، هل عمرك سمعت إن الرسول صلي الله عليه وسلم أو حد من الخلفاء الراشدين منع يهودي أو نصراني من الصلاة في بيته زي مابيحصل في المنيا؟؟؟
# الإرهاب فينا وربنا يهدينا
بص جمال الأجنبية العجوزة وحبها للحياة وهي بترقص.. بص والنبي الولية الناقصة المصرية الشايبة العايبة بترقص ازاي....
#ازدواجية مصرية
أنا وصلت لمرحلة ان صوت حسين الجسمي في اي اغنية بيفكرني بعظمة وحلاوة مصر
#مصروالإمارات_إخوات
#مصرجميلة
نكسة مصر مكانتش في 67، النكسة الحقيقية كانت في السبعينيات لما اقنعوا المصريين إن الموسيقي والغناء والسينما والآثار والأوبرا حرام وإن المرأة عورة والعلم للرجال، وأن اللي مش محجبة تبقي نصرانية أو شمال،وإن المسيحيين أهل ذمة مش أهل البلد،،وإن تحديد النسل حرام،وأن الدقن والجلابية والعباية من الإسلام، وإن أي واحد بدقن يبقي شيخ، وإن الشيوخ بيفهموا في كل حاجة.... مصر هتنتصر لما نعرف قيمتها ونؤمن أنها جت الأول وبعدين جه التاريخ.... مصر أصلا هي اللي كتبت التاريخ
#مصري_وافتخر
كان نفسك تكبري عشان ماتصحيش 7 تروحي المدرسة، ودلوقت بتصحي 5 عشان ولادك هما اللي يروحوا المدرسة
#الأم_مدرسة
فعلا اللي يعيش ياما يشوف،النهاردة حصل موقف غريب جدا، تخيلوا قابلت زميلة دراسة قديمة وفوجئت إنها لغاية دلوقت لسة ما اتطلقتش! !!!!!
#كفاية طلاق
وعجبي علي شعب يعتبر بعض فقرائه العمل في النظافة عاراً والشحاتة في الطرقات شرفا،العمل اليدوي عيبا وارتياد المقاهي قيمة
#العمل_عبادة
2 ممكن يعملولك تحليل نفسي بمجرد ما يسمعوا نبرة صوتك، أمك لو مفلس ومراتك لو بتكذب عليها
#الحاسة السابعة
بعد ماسمعت ألبومات عمرو دياب وشيرين وسميرة سعيد، اكتشفت إن تأليف الأغاني حاجة سهلة جدا من ايام الريس ستاموني وأغنيته الخالدة عن القفا واللي قريب قوي هايغنيها نجم كبير، وعشان كدة قررت اقتحم المجال وابعتلهم أغنيتين يكسروا الدنيا، واحدة لعمرو....
صباح الخير الخير الخير صباح النور النور النور عالناس الحلوة الحلوة الحلوة، والتانية لشيرين أو للديفا كلها تقطيع في الرجالة واقول...
يا ابن اللي واللي واللي...حبيبي أصله ترالاللي لاللي لاللي
نفسي احضن فيه واضمه...بس حبيبي اتاريه ابن امه
#أي_كلام
#بحبك_ياستاموني