سيادة الوزير.. روحني شكرا !

لولولوليىىىىىىىى !
هكذا استقبلتنى زوجتى عند باب الشقة عقب عودتى.
- اللهم اجعله خير يا رب من زمان ما سمعتش الزغاريد دى ما تفرحينى معاكى ياستى !
- هو انت مسمعتش أبو بكر الجندى وزير التنمية المحلية الجديد، مش بيقول إنه حايرجع الصعايدة كلهم على الصعيد؟
- ياستى الراجل اتفهم غلط واعتذر بلاش مبالغة وتهويل.
- غلط ولا صح فرصتنا وجاتنا لحد عندنا، تقدر تقولى خدنا إيه من القاهرة غير الغربة ووجع القلب؟
- جاية تقوليلى الكلام ده بعد 33 سنة من أول يوم سبت فيه أمى وأبويا واخواتى وجيت هنا علشان الصحافة طب مين يرجعلى عمرى؟
- إللى راح مابيرجعش ثم كان حد ضربك على إيدك وقالك تعالى مصر؟
- أيوه مليون حد ضربنى وقالى مفيش قدامك غير الغربة هو أنا يعنى كنت لقيت الشغل فى البلد وماشتغلتش ؟
- قصدك يعنى لقمة العيش إللى جابتك؟
- يبقى راح عمرى هدر لو كنت جيت هنا بس علشان لقمة العيش، كان ممكن أسافر بره مصر حتى، لكن المهم إزاى تكونى إللى انتى عايزاه وتحققى ذاتك فى بلدك. أنا جيت هنا علشان ابنى نفسى ولما ابنى نفسى يبقى ساهمت فى بناء البلد دى.
- ماتعشليش فى دور سعد زغلول ياعم السياسى، الغاوى ينقط بطاقيته وأنت إللى كنت عايز تبقى صحفى.
- وهو ده ذنبى يعنى؟ هو لو كان فيه صحافة ولا جرايد فى الصعيد كان إيه إللى يبهدلنى ويشحططنى كده ويخلينى أضيع عمرى كله فى مدينة مابترحمش، مدينة احتكرت كل حاجة وماسابتلناش حاجة ودلوقتى وبكل بساطة ييجى وزير جديد ومن أول كلمة يقول عايزين نرجع الصعايدة بلادهم، هو فاكر إننا هنا بنتفسح مثلا؟ خلاص نرجع بس يرجعولنا البراءة والنقاء إللى جينا بيه، فاكرة زمان لما كانوا بيتريقوا علينا ويقولوا الصعايدة أحباب الله على أساس إننا أبرياء زى الأطفال؟ أهو مفيش صعيدى يخط برجله القاهرة دى ويقدر يحتفظ ببراءته خلاص يرجعولى براءتى وأنا أرجع من بكرة الصبح.
- ماتعشليش فى دور أسامة منير يا عم الرومانسى وصدقنى لو حسبتها حتلاقى ده أحسن وقت نرجع فيه.
- ما ينفعش يا ستى أنا رجلى غرزت هنا وإللى كان كان.
- يعنى انت تورطنا الورطة دى ولما ييجى حد يقولنا ارجعوا ما نسمعش كلامه؟ طب ما كنت تصبر شوية زمان لغاية لما تحقق ذاتك فى بلدك، لو مينا موحد القطرين كان ساب طيبة زمان وجه قعد فى القاهرة ماكنش وحد القطرين وكان بالكتير مسك محافظ ولا وزير محدش يعرفه.
- ولو عبد الناصر إللى العالم كله بيحتفل بعيد ميلاده اليومين دول كان قعد فى أسيوط بعد ما تخرج من الكلية الحربية كانت حياته انتهت ظابط على المعاش ومكانش غير شكل الحياة فى مصر!
- باقولك إيه بلاش تشتغل معايا شغل الصحفيين ده أنا خلاص لميت الهدوم وجهزت الشنط!
- يعنى مفيش فايدة خلاص؟
- أيوه خلاص ولو تعرف رقم أبو بكر الجندى قله يحجزلنا فى القطر إللى قال إنه هايحط فيه الصعايده ويرجعهم نفر نفر لمحطاتهم الأخيرة.
- موافق بس بشرط واحد.. سيادة الوزير ييجى يركب معانا قطر الصعيد لغاية لما يوصلنا بالسلامة لمحطتنا الآخرة قصدى الأخيرة !