ع اللي جرالي من كهربا والسد العالي !

لولا أنني متأكد من دخولي منزلي الذي أعود إليه مساء كل يوم لقلت أنني ضللت الطريق ودخلت دار مناسبات حيث لمحت ست ستات يبدو علي مظهرهن أنهن في حالة حداد علي عزيز لديهن ولما تفحصت وجوههن جيدا اكتشفت أنها زوجتي والبنات وهن في حالة وجوم شديد، وقد اجتمعن حول الراوتر وكل منهن ممسكة بموبايلها في تركيز شديد. ألقيت السلام بصوت خفيض احتراما لهيبة الموقف وحرمة الميت فلم أتلق أي رد.
مرت حوالي ربع ساعة من الصمت المطبق ثم قالت زوجتي: شوفت إللي حصل بين كهربا والسد العالي؟ فقلت: طب مش تقولوا كده من الصبح حرام عليكم وقعتوا قلبي، هو انتوا مكنتوش عارفين إن أسعار الكهربا حاتزيد؟ عموما حزنكم ده مؤشر كويس يمكن ترحموني شوية وتطفوا أنوار البيت المنورة علي الفاضي والمليان بدال ما انا ماشي وراكم أطفيها كل شوية، وطبعا السد العالي لازم يتأثر من عمايلنا ربنا يسترها عليه وعلي التوربينات بتاعته مش كفاية سد النهضة إللي عايز يعطشنا؟
تبادلت زوجتي والبنات نظرات الدهشة حيث سألتني زوجتي: انت بتقول إيه؟ فقلت: باقول إللي سمعتوه، متوقعين إيه من الكهربا والسد العالي بعد كل إللي بيحصل ده، فقاطعتني الصغيرة كلمات آخر عنقود البنات لحين إشعار آخر قائلة: يابابا يا حبيبي إحنا بنتكلم عن كهربا لعيب الزمالك والسد العالي عصام الحضري حارس مرمي مصر؟ فسألتها: ولما هو فيه لعيب في الزمالك اسمه كهربا امال مال حال الفريق متنيل وفاصل شحن كده ليه ثم مال كهربا ومال الحضري؟ فقالت: يوووه يابابا دي حكاية طويلة أصل كهربا كان خاطب بنت الحضري وبعدين سابوا بعض والدنيا مقلوبة من ساعتها والمواقع كلها بتابع الموضوع وتطوراته فقلت مندهشا: وحضراتكم سايبين إللي وراكم وقاعدين تتابعوا مشكلة واحد كان خاطب واحدة وسابها؟، هو أنا قضيت همي لما أشيل هم الحضري وبنته وخطيبها?.. ولو رجعت مرة من بره لقيت المنظر ده أنا حارمي الراوتر ده من الشباك!
ظننت أن حبوب الشجاعة كانت كافية لوضع النقاط فوق الحروف غير أنني فوجئت بنفس المنظر في اليوم التالي وقبل أن أنطق صاحت بنتي وعود: اسكت يا بابا عرفت إللي حصل للهضبة؟ فقلت متأثرا: لا حول ولا قوة إلا بالله تاني صخرة وقعت من هضبة المقطم، استرها يارب، فيه إصابات ولا جات سليمة؟ فنظرت لي مندهشة وهي تقول: يابابا معقولة عايش معانا في مصر ومتعرفش إن عمرو دياب لقبه الهضبة؟ فقلت: اللهم طولك يا روح وماله بقي الهضبة جراله إيه؟ فقالت: قدر ينزل من وزنه خمسة كيلو تاني حتي شوف صوره أهو بقي عامل زي ما يكون عيل عنده عشرين سنة ما تحاول يابابا تعمل ريجيم شوية؟ فقلت: شكلنا كلنا حانعمل ريجيم إجباري بس اسمعوا بقي ده آخر إنذار ليكم كلكم أنا ممكن بسهولة ألغي النت خالص من البيت.. في اليوم التالي عدت فوجدت زوجتي والبنات في نفس الوضع وقبل أن أنطق فاجأتني أسرار قائلة: الحق يابابا التمساح فسألتها ساخرا: ويطلع مين سي التمساح ده لعيب كورة ولا ممثل؟ فقالت: لا يابابا التمساح إللي هرب من النيل بقاله فترة بيقولوا دخل العمارة عندنا بس مش عارفين في أنهي شقة!