هايد بارك

الدرس المصري

khaledme72@yahoo.com
الكل يفتح الكراريس ويفتح عينيه.. الشعب المصري فتح الفصل والكل دخل المدرسة.
الدرس الأول كيف تثور في وجه الظلم.. والثاني ازاي تخلع حاكم ظالم وكل الحاشية الجبانة.. والثالث كيف تحاكمهم وتاخد حق الشعب بالقانون والورقة والقلم.. والدروس لسه شغالة وهاتفضل كتير.. احنا بنكتب تاريخ جديد لبلاد النيل والمنطقة وكل العالم.
وحوالينا كل الدول العربية اتعلمت الدرس.. الثورات انطلقت من سوريا لليمن ومن البحرين للجزائر ومن الاردن للعراق لليبيا.. لكن للاسف الحكام الظلمة كمان استوعبوا الدرس.. هم والعساكر قرروا مايسيبوش الكراسي حتي لو قتلوا كل الشعب، ما حدش هايرضي بمصير مبارك ورجالته وقالوها بصوت عالي يا هم يا الشعب.. لكن المؤكد ان عجلة التاريخ ما بتقفش وفي الاخر هاتنتصر الشعوب والظلمة هاياخدوا الدرس.. مكانهم مع مبارك وولاده جوه السجن أو علي حبل المشنقة.
1102 مش سنة عادية، الايام رايحة وجاية، والنجوم ولاد بلد وشباب زي الفل.. ناس قررت وصرخت كفاية ظلم، ولسه في رحم السنة احداث كتير.. لسه مفاجآت كتير.. كل الظلمة هايقعوا ورا بعض، وما فيش حد هايفلت من الحساب.. زي ما قتلوا ونهبوا هايدفعوا التمن، دي حقيقة مش سراب..
اللهم ارزقنا الخير.. كل الخير.. اللهم ارحنا من الشرور ومن أهل الشر.