عكاشه وعبدالحافظ .. حبة شجن!

حبة شجن ياعين.. حبة آهات يا قلب.. غاب عم اسماعيل.. شهد الدموع في أنين.. صنع ثنائي جميل.. مع رفيق رحلته ابن البلد الأصيل.. عمي أسامة أنور عكاشة اللي سبقه للرحيل.. دي أجمل ليالي عشناها مع الاثنين في دروبك ياحلمية.. عزفولنا لحن الليل.. ونهارنا كان قناديل.. والبهجة تملا العين.. والدمعة تفوتنا سنين.. عرفنا رحلتهم سوا.. مع أول طلة ليهم علي الشاشة.. وحكي القلم والصورة حدوتة شهد الحياة.. ودموعها متشافة.. أيامها كنا نتلاقي من غير لقا.. وقلوبنا مشتاقة.. عرفنا منهم يعني ايه دراما مصرية.. وازاي تكون الحكاية بهية.. مدروسة بصدق النية.. والكلمة العفية.. وعلي أيديهم عرفنا وشوفنا نجوم ملوا قلوبنا بحكايتهم المروية.. وأيامهم مع الباشا الكبير ونازك السلحدار.. والعمدة وقفشاته الذكية.. وعلي وعادل وزهرة.. وأنيسة.. وزينهم السماحي وسماسم.. اللي عشنا وياهم ليالي طوال.. والآهة والموال وكل ده شوفناه في ملحمه ليالي الحلميه الجميله .
تحية للاتنين.. وحبة شجن ياعين.. المصراوية فين.. بعد اللي غابوا ياعين.. ابكي ياحزن قلبي.. علي أجمل ثنائي أصيل.. ابن عبدالحافظ.. وعكاشة ابن النيل.. الشهد كان طبعهم.. والدمع في قلبهم صدق ومحبة.. وزين.. أدي الله.. وأدي حكمته وألف رحمة ونور.. علي فن غالي جميل.