من الأعماق

نخنوخ ولخمة راس

جمال حسين
" انت عامل لي فيها نخنوخ يا اخويا " الجملة دي قالها الفنان اشرف عبدالباقي في فيلم " لخمة راس " مش عارف هو كان يقصد نخنوخ بتاع شارع الهرم والاسكندرية اللي قبضوا عليه ولا يقصد مين ؟.. ممكن لان نخنوخ ده طلع بلوه كل اصحابه فنانون وممثلون وراقصات.. عامل في القصر بار ومسرح ولزوم الفرفشة والذي منه.. يعمل سهرة ييجي له كذا فنانة.. عاوز اغاني المطربين موجودين.. عاوز فرفشة الراقصة اللهلوبة تقوم بالواجب.. النظام الفاسد هو اللي صنع نخنوخ زي ما صنع غيره كتير من مشاهير البلطجية اللي استخدمهم لحمايته وتخويف الناس.. هنا نخنوخ وهناك عزت حنفي وفي الصعيد الحمبولي وفي الدلتا بيسو وزيكو وسبع الرجال حتي البلطجيات فيه عندنا الست فتكات وام اربعة واربعين كل دول وغيرهم كتير
البلطجية عرفوا السكة كويس.. طول ما فيه فاسدين وحرامية ع الكراسي متربعين يبقم عايزين حماية والشيء لزوم الشيء.. الوزير لو عاوز يلزق في كرسي الوزارة لازم يكون له رجالته.. النايب لو عاوز يدخل البرلمان لازم يقفل الصناديق وكله بحسابه.. لو عاوز تادب حد البلطجية جاهزين.. لو عاوز لبن العصفور يجيبوه لك بس سيبهم يسترزقوا.. ولقمة هنية تكفي ميه.. يا حبايبي خدوا اللي انتو عاوزينه ازرعوا مخدرات.. بيعوا سلاح خدوا اتاوات من البارات والكازينوهات والفنانين والشركات مش كفاية اننا بنحميهم.. واللي يرفض يتقرص وييجي راكع بعد كده.. عاوز 2000 متر اعمل حتة قصر ع الضيق وماله ارض ربنا واسعه اختار اللي يكفيك.. الممثلة دي مضايقاني وحملت في قعدة فرفشة وعاوزة تلزقلي العيل.. ولا يهمك تسقط.. المطرب لهف فلوس الرقاصة وخلع بعد الجواز.. نرجعه غصب عنه لها.. معالي الوزير عاوز طلب.. سعادة المحافظ جاي يسهر معانا النهاردة.. البيه وكيل الوزارة ورئيس الحي كانوا عاوزيني.. كده الميه تمشي.. فاكرين لما عزت حنفي قال "من النهارده مفيش حكومة.. انا الحكومة " هو قال كده لان الحكومة كلها كانت تسهر عنده في الفيلا تاكل وتشرب وتاخد اللي فيه النصيب.. الباشا عربته عطلت تيجي له عربيه ع الزيرو.. البنت عيد ميلادها بعد 6 شهور وماله يتعمل لها حفلة النهاردة النهاردة ع الضيق وتاخد هدية نص كيلو دهب.. وعجبي.