جروب على الفيس بوك "البنات لازم تدخل الجيش"

للمطالبة بالمساواة بين الجنسين

"البنات لازم تدخل الجيش اشمعنا احنا، كل شوية واحدة تطلع تنادى بالحرية والمساواة وتتكلم عن حقوقها ده حتى سعاد حسنى غنتلهم وقالت البنت زى الولد، إحنا بقى مش هنطالب بحقوقنا إحنا بقى عايزين مساواة يعنى زى ما إحنا بندخل الجيش هما كمان يدخلوا الجيش، دول كمان عندهم عربيات مخصصة فى المترو، ده إيه دول واخدين حقهم و زيادة، من حقنا بقى ندخلهم الجيش معانا لازم يدخلوا لازم يتحقق المساواة إللى واجعين دماغنا بيها".
هكذا يطالب بعض الشباب على الموقع الاجتماعى ال"فيس بوك"، من خلال العديد من الجروبات والصفحات، مثل جروب "لازم البنات تدخل الجيش"، وصفحة "معا لدخول المرأة الجيش لتحقيق المساواة الكاملة كما يزعمن" وغيرها.
ومن الغريب أن معظم الفتيات تقابل هذا الطلب بالإيجاب النسبى، حيث تقول ريهام راشد "ماشى يا رجاله إحنا موافقين ندخل الجيش بس بشرط إنتوا كمان تكنسوا وتمسحوا وتطبخوا وتربوا الأولاد وأراهنكوا إن انتوا هتتحايلوا علينا علشان نرجع لدورنا ونشيل عنكم هم كبير"، ويرد عليها "محمد الخشاب: قائلا "موضوع تربية الأولاد ده حاجة من عند ربنا، وانتوا دوركوا الأساسى فى الحياة هو القعدة فى البيت والتنظيف والتربية، لازم تدخلوا الجيش وتشوفوا اللى احنا بنشوفه".
وأكد إيهاب سامى مؤسس الجروب "الفكرة إن مش إننا نبقى بالبيت وهما اللى يحاربوا ولكن على الأقل يأخدوا تدريبات فى الجيش يستخدمونها لو احتاجوها فى أى وقت، لأن أكبر جيوش فى العالم بتسمح بدخول البنات، إحنا بقى عايزنهم يدخلوا الجيش بس مش يحاربوا، الحرب لينا بس عايزنهم يعرفوا إن مافيش مساواة بيننا".
ويضيف محمود على "يا رجالة إحنا لازم نعمل وقفة مع الحكومة علشان تنفذ القرار دا إحنا بنتبهدل أوى والبنات قاعدين أميرات فى البيوت فين بقا مبدأ المساواة"، وتقول نهى جمال "طيب دى فكرة جامدة جدا وأنا كان نفسى أدخل الجيش بس بشرط إنه زى مالجيش بتاعكو كله رجاله بس يبقى الجيش بتاعنا كله بنات"، كما صاحب الأمر أيضا بعض المعارضة، حيث تقول يارا شادى "جيش إيه يا جماعة اللى ندخله ده هى كده معروفة الجيش للرجال فقط"...................... وما زال الحوار مستمرا!