كلام مسئول

تقديم: محمد صلاح
تاريخ الحلقة: 23/12/2009
المسئول:
اللواء/ مصطفى السيد - محافظ اسوان
محمد صلاح: يا مساء الخير اسوان البلد اللي بيحبها اهلها لدرجة العشق ، بلد الحب واللمة والونسة اللي بتدي لمصر اطيب ناسها اديتها العقاد بصلابته ومحمد منير ومحمد حمام بصوتهم الجميل ومجدي يعقوب بمشرطه اللي بيداوي القلب ، اسوان واهلها اسوان اللي في القلب بلد الميه والوشوش الطيبة هيكون لينا عنها النهاردة مع محافظ اسوان اللواء مصطفى السيد كلام ..... مسئول ,ومن كلام محافظ اسوان اللواء مصطفى السيد
الدولة تتعامل مع النوبيين مثل أي مواطن مصري ولهم الحق في اي مشروعات تقيمها الدولة طبقا لعدد السكان وادعو المستثمرين النوبيين في كل مكان في العالم الى انشاء مشاريع استثمارية في النوبة بهدف دعم التنمية هناك ,الدولة فتحت ابواب التنمية في الصعيد على مصراعيه وخصوصا في اسوان من خلال مشروعات توصيل الغاز الطبيعي الذي سيصبح المصدر الاساسي للطاقة الرخيصة والنظيفة للمصانع الكبرى ,جاري اعادة النظر بشكل كامل في منظومة الصيد داخل بحيرة ناصر خصوصا مع استمرار عمليات التهريب مما يؤدي الى تهديد المخزون السمكي في البحيرة ,تم ازالة التعديات على الجزر النيلية باعتبارها محميات طبيعية واحذر الأجهزة التنفيذية من منح أي تراخيص خاصة لاقامة انشطة سياحية أو خدمية على الجزر النيلية بهدف المحافظة عليها كاحد المعالم السياحية والتاريخية على مياه النيل
ايه اللي بيجرى في اسوان مشروعات زراعية او صناعية مشروعات سياحية خدمات وبنية اساسية الشباب والعمل والبطالة اهل النوبة ومشاكلهم واهتمام الدولة بحلها دي موضوعات هيكون لينا عنها النهاردة مع محافظ اسوان اللواء مصطفى السيد كلام ...... مسئول
فاصل
محمد صلاح: ارحب بمحافظ اسوان اللواء مصطفى السيد ، اسوان بوابة مصر الى افريقيا من الجنوب تفتكر الحالة اللي عليها حاليا مطار اسوان تتوافق مع العبارة دي ..هل مطاراسوان حاليا يتناسب مع حجم السفروالرحلات اللي يُفترض تقوم منه عشان توصل مصربافريقيا
اللواء/ مصطفى السيد- محافظ اسوان: حتى الان نقول اه بنسبة متوسطة لكن انا بأمل انه تزيد الرحلات السياحية ورحلات الشارتراللي بتيجي من كل اوروبا أو بتنتقل من اسوان الى افريقيا انما عدد الرحلات خصوصا في الموسم السياحي الشتوي بتبقى مناسبة جدا انما للاسف في الصيف بتبقى قليلة جدا جدا انا بأمل انه يبقى فيه نشاط اكبر للتنمية السياحية
محمد صلاح: يعني منتظرتطويرمطاراسوان اكترمن كده عشان يستوعب طيارات بحجم اكبرباعداد اكبرعشان نقدر يكون فيه قنوات اتصال وتجارة واستثمارات بين مصر وافريقيا ؟
اللواء/ مصطفى السيد: هوحاليا يستوعب دا تالت مطارفي جمهورية مصر العربية فيستوعب الحركة ولكن حجم الطيارات وعدد الطيارات انها تتمشى حقيقة مع مكانة اسوان التاريخية ومكانة اسوان كبوابة مصرالجنوبية انطلق منها الى افريقيا لانه مازال حركة التنمية الصناعية عندنا مازالت مش واخدة حقها لكن انا اعتقد خلال السنوات اللي جاية هتاخد حقها إن شاء الله
محمد صلاح: المحافظات النظيفة زي اسوان انتوا حليتوا المشكلة دي ازاي ؟
اللواء/ مصطفى السيد: لا هو شعب اسوان نفسه بيتميز بالنضافة بتلاقي الست باستمرار بتحط كيس الزبالة بتاعها في قلب صندوق القمامة في الاحياء الشعبية جدا جدا بيتعاونوا مع بعض وهم اللي بيكنسوا الشارع والحقيقة الشركة منضبطة جدا بتشيل الزبالة اللي موجودة عندنا في اسوان واي تقصير باوقع عليها غرامة لو ماشالش النهاردة بجيب مقاول يشيل
محمد صلاح: يعني عملت تجربة شركة خاصة برضه ؟
اللواء/ مصطفى السيد: لا في المحافظة انا اتعاقدت على معدات وادوات نظافة ب20 مليون جنيه من احد الهيئات الحكومية ومشروع النضافة الخاص بالمحافظة بالاضافة الى انه لما تقصر الشركة بدخل احد المقاولين يشيل الكلام ده بخصم على الشركة بحيث تبقى فيه عقوبات رادعة على الشركة
محمد صلاح: عندنا شركات في القاهرة عملوا اضراب اصلا ما بقوش يشيلوا الزبالة فتراكمت الزبالة ايه الفرق اقصد انه انت اتعاملت مع شركة واحدة في القاهرة اتعاقدوا مع كذا شركة واضافوا طبعا فلوس النضافة على فاتورة الكهربا فالشركات بطلت بس الناس عمالة تدفع ؟
اللواء/ مصطفى السيد: برضه مش هقارن اسوان كعدد سكان يعني انا عندي مليون وتمانية من عشرة أي محافظة اخرى اضعاف محافظة اسوان برضه هتبقى صعبة عشان ما نظلمش باقي المحافظات التانية الشركة شركة مصرية ملتزمة معانا أي قصور يومي رئيس الحي بيبلغ فبدخل أحد المقاولين يقوم بأعماله وبوقع على الشركة غرامة رادعة فبالتالي فيه انتظام كامل
محمد صلاح: ظاهرة الباعة الجائلين اللي كان عددهم كثيف جدا أي حد كان بيروح اسوان كان بيقول وبيشتكي انهة مفيش ضبط وربط للباعة الجائلين ليه ما تمش تنظيمهم او استيعابهم في سوق ؟
اللواء/ مصطفى السيد: اسوان هي اخرمحطة قطار تقريبا عندنا معظم الوافدين معظم الباعة دول بيجولنا من محافظات اخرى بييجي يبقى معاه ورق بردى قزايز مية أي حاجة ورق مناديل انما ابناء اسوان ما بيعملوش كده الحقيقة فدول حتى لو اتقبض عليهم في الاخر هو طفل اوشاب صغيرللاسف القانون بيبقى ضعيف جدا بيدي غرامة بسيطة جدا ولي الامر بيجي يستلمه بيدفع الغرامة البسيطة لكن هو بيكسب من وراه عشرات الاضعاف من الغرامة اللي دفعها
محمد صلاح: حلها ايه بقى ؟
اللواء/ مصطفى السيد: احنا بنجيب هؤلاء الشباب لو هو فيه خلاف اسري طفل شوارع في الاول بنحاول نرجعه بيته عن طريق الجمعيات الاهلية التضامن الاجتماعي بناخد هذا الطفل او هذا الشاب ونحاول نرجعه بيته بالتنسيق مع الاب والام بيرجع بيته تاني او عن طريق المرشدين السياحيين او شرطة السياحة بيتم القبض عليهم ونحاول نرجعه بيته تاني او يشتغل شغل بلاش شغل التسول اللي في الشارع دا ما هو ممكن يقف في أي محل او في أي شركة او في أي قطاع اخر بخلاف الموضوع دا وعندنا عجز شديد جدا في شركات النضافة الشركة اللي عاملاها المحافظة فبناخد الناس دي بنشغلها عندنا في مشروعات النضافة
محمد صلاح: في مدينة مثلا زي مدينة دراو في شكوى من نقص الخدمات وانقطاع الكهربا وسوء حالة الكهربا او عدم وصول الكهربا الى كل بيت هناك معقول المحافظة اللي فيها السد العالي بتشتكي من الكهربا ؟
اللواء/ مصطفى السيد: ياريت المواطن اللي عنده شكوى زي كده يشرفني في مكتبي ويقولي .. انا معنديش مشكلة في الكهربا خالص
محمد صلاح: ايه نوعية المشاكل اللي انت رصدتها سيادة المحافظ في اسوان ؟
اللواء/ مصطفى السيد: انا بقول فيه مشاكل في المية لكن انا عندي النهاردة محطات جديدة بقى قوة اندفاعها شديدة جدا الشبكة الرئيسية في المية من 50 سنة فبالتالي محطات المية دي لما بتضخ مية بكامل قوتها بيحصل انفجار في خطوط المية فحاليا انا شغال في احلال وتجديد شبكة المية بالكامل دي مشكلة فعلا انا بعترف بيها انا وفرت اعتماد 20 مليون جنيه لشبكة المية داخل مدينة اسوان ودي مش مشكلة عندي في اسوان لوحدها انما كهربا ومية مفيش ...
محمد صلاح: سيادة المحافظ في قضية التعليم عندك 5 كليات وفيه 5 معاهد وفيه المعهد العالي للطاقة في اسوان مدة الدراسة فيه 5 سنين الطلاب عايزين يعملوه كلية طبعا لما يتعمل كلية فيه امتيازات واهمها عضوية نقابة المهندسين كل شوية بيحتجوا وكل شوية بيعملوا وقفات احتجاجية واعتصامات وهكذا يعني هتحل لهم المشكلة ازاي ؟
اللواء/ مصطفى السيد: المشكلة دي في ايد وزير التعليم العالي ماهيش مشكلتي انا دي حاجة الحاجة التانية الطالب دا لما دخل المعهد ، دخل انه معهد ولّا كلية
محمد صلاح: دخلوا معهد بس عاوزه يبقى كلية .
اللواء/ مصطفى السيد: يبقى مش بمزاجه بقى مش بمزاجه انت قبلت ان تدخل المعهد بشروطه دي لازم تلتزم بيها مش النهاردة ادخل معهد اقوم اقول انا عاوزه كلية دي شروط وشروط المجلس الاعلى للجامعات مش بتاعتي
محمد صلاح: ايه وجهة نظر التعليم العالي ؟
اللواء/ مصطفى السيد: مش حقه ما هو عشان يحول معهد الطاقة في اسوان الى كلية لازم يحول جميع معاهد الجمهورية كلها اشمعنى اسوان يعني مافيه في بنها فيه وفي اسكندرية فيه
محمد صلاح: يعني الوزارة شايفة انه دا يعمل ارتباك في منظومة التعليم ؟
اللواء/ مصطفى السيد: طبعا
محمد صلاح: احنا عندنا مشكلة في المنظومة ؟
اللواء/ مصطفى السيد: طبعا بالعكس حضرتك المعهد دا عليه اقبال كبير جدا من كل الدول العربية وفي سوق العمل بيتخصصوا عندنا في السد العالي وفي اسوان يعني عليه اقبال طب انت عاوز كلية ليه
محمد صلاح: هي اللافتة ؟
اللواء/ مصطفى السيد: اللافتة ليها معايير اخرى مش مني دي من وزارة التعليم العالي والكلام دا مرفوض من المجلس الاعلى للجامعات مش من المحافظة ولا السيد وزير التعليم العالي واترفض تماما على مستوى الجمهورية لأن كل المعاهد حتتلقب مش ده بس فمش مقبول إطلاقا وانت دخلت الاول بالمجموع بتاعك على انه معهد
محمد صلاح: خلينا نتكلم عن مشكلة البطالة كلمتني الاول عن نقص في بعض الشركات عايزة عماله وفيه وجهة نظر اخرى لمشكلة البطالة تتعلق بانه في بعض الاحيان مفيش الكفاءات في مكان معين خصوصا اذا كان متخصص شوية قولي عملت ايه في مشكلة البطالة رصدتها ازاي وحجمها قد ايه؟
اللواء/ مصطفى السيد: انا عندي مشكلة بطالة فعلا حوالي 19% من المحافظة مازال فكر وثقافة الشباب مرتبط تماما بالعمل الحكومي المكتبي
محمد صلاح: بس احنا رصدنا في البرنامج ان الناس اللي اشتغلوا قطاع خاص مع الازمة المالية وبعض المشاكل اللي حصلت للقطاع الخاص يمكن أغلب الوقفات الاحتجاجية حاصلة من الشركات والمصانع عشان قطاع خاص مش قطاع حكومي يمكن دا السبب الل خلى الناس ترجع تاني تلقي نظرة اكتر للقطاع الحكومي ؟
اللواء/ مصطفى السيد: انا السنة اللي فاتت الحقيقة حصل تغيير في ثقافة الشاب الاسواني وانخفض معدل البطالة من 19 الى 12 % تقريبا فيه مهن عندنا مكانش الشاب بيتقبل انه يشتغل فيها زي شركات النضافة زي البحيرة ، البحيرة عندنا فيها 15 الف صياد وللاسف انا اللي بقولها وبعلنها ان معظمهم من محافظات اخرى من الفيوم ومن كفر الشيخ ومن سوهاج ومن أسيوط وقلة من ابناء اسوان طبعا الناس لازم تغيرالفكر دا احنا اولى بيها كابناء محافظة ، فيه بعض الشركات الاخرى او القطاع الخاص الناس بترفض عندي في المحافظة 35 الف وحدة سكنية محتاجة عمالة ماتقلش عن نفس العدد عمالة حرفية ، الحقيقة حصل تنسيق كامل بينا وبين المواطنين والمجالس المحلية وكل المجتمع المدني في اسوان وحصل فعلا السنة اللي فات تغيير كامل في ثقافة الشاب ، مراكز التدريب اللي تابعة لوزارة الاسكان ابتدينا ندخل دفعات كل دفعة حوالي 500 شاب نعلمهم حرف محتاجها سوق العمل عندنا نجارين وحداد مسلح وخلافه وفي اليوم بياخد ما لا يقل عن 30 الى 50 جنيه يومي فتقبلوا وبداوا يشتغلوا ، فيه شركات امن في خارج المحافظة وفي داخل المحافظة بتيجي تعرض عندنا شغلنا حوالي 1500 شاب بحوالي 800 جنيه في الشهر غير أكله وشربه ولبسه
محمد صلاح: عايزين نتكلم عن النشاط المنتج سيادة المحافظ انت ما سعيتش تعمل مدينة صناعية مثلا في اسوان عشان تستوعب اعداد الناس الزيادة بدل ماتروح محافظات اخرى وما تتحولش اسوان الى محافظة طاردة للسكان ؟
اللواء/ مصطفى السيد: لا العدد اللي بقولك يطلع برة حوالي 1500 فقط انما العدد الاكبر 35 الف انا شغلت منهم 22 الف في مجال المعمار عندنا مدينة صناعية في مدينة اسمها العلاقي ودي مدينة بتستوعب فوق ال10 الاف
محمد صلاح: دي شغالة ولا لسه تتشتغل؟
اللواء/ مصطفى السيد: شغالة وقائمة وفيها توسع ويومي وكل شهرولا اتنين بيضاف ليها مصنع فرع الجرانيت وفرع الرخام والتلج والاسماك ويوميا فيه مصانع بتضاف وفي منطقة بالكامل صناعية دي في شمال اسوان
محمد صلاح: في تسهيلات للمستثمرين في اسوان انت عارف حضرتك زمان كان اللي يروح اسوان كانت امع داعية عليه اللي يتنقل اسوان يبقى شغال شغل في الحكومة يبقى عقاب يعني لكن دلوقت مستوى الحياة اتغير؟
اللواء/ مصطفى السيد: جدا جدا الحياة وبقت جميلة جدا في اسوان وانتتهى الفكر دا انه فيه محتاج عقوبة يروح اسوان .. المنطقة الصناعية بندي الارض بالمجان تماما مجرد ما يبني الارض بعد 6 اشهر بياخد الارض وندخله المرافق ولو هو حجم المشروع بتاعه فوق ال10 مليون بياخد دعم من وزارة التجارة والصناعة عن كل عامل بيشغله حوالي 3 الاف جنيه دعم فامتيازات اكتر من كده ايه
محمد صلاح: انا حاسس ان الحياة وردية خالص .. الحياة وردية في اسوان للدرجة دي ؟
اللواء/ مصطفى السيد: ماهي وردية في اسوان فعلا
محمد صلاح: سيادة المحافظ ليه محصلش مشروع للتنسيق الحضاري في شوارع وميادين اسوان ؟
اللواء/ مصطفى السيد: انا بدات التنسيق الحضاري عملته في اقل الاحياء شعبية دخلت في هذا الحي تنسيق حضاري كامل لون البيوت كلها لون واحد الدهان وجهاز التنسيق الحضاري جم شافوا هذه التجربة واشادوا بيها تماما وحاليا هيعملولنا حواليتن ضفاف النيل الصخور والبيوت اللي موجودة ولكن انا كمبادرة من المحافظة عملت تنسيق حضاري داخل هذا الحي وبدات بيه لانه كان حي عشوائي جدا جدا النهاردة تخشه حاجة جميلة جدا الشجر المية الصرف الصحي والنضافة العامة في هذا الحي لانه كان اقل حي شعبي موجود عندي في المحافظة
محمد صلاح: في الخطة وفي المستقبل باقي الاحياء وبعدين المدينة نفسها ؟
اللواء/ مصطفى السيد: التخطيط انه كل سنة ان شاء الله هنخش على حي تاني موضوع الكورنيش دا هو هيتعمل تنسيق حضاري هما هيعملوا خطة وتصور ليها بالشكل واللون وتقدير للصخور اللي موجودة وشكلها الأجمالي والحاجة الي محتاجة تهذيب فيها
محمد صلاح: معندكش مشكلة موارد يعني المشروعات بتتم بسهولة كده الموارد موجودة ؟
اللواء/ مصطفى السيد: لا لا لا ..عندي مشكلة موارد طبعا
محمد صلاح: موازنة المحافظة قد ايه .. الموارد قد ايه ؟
اللواء/ مصطفى السيد: انا باخد ميزانية من الدولة في السنة في حدود 5 مليون في أي محافظة تانية حوالي 20 مليون جنيه احنا الموارد ضعيفة جدا جدا جدا على امكانيات المحافظة ان شاء الله هتتطور فيه منطقة جنوب السد العالي كانت تابعة لوزارة الزراعة منطقة محاجر فيه قرار من السيد رئيس الوزرا بانضمام هذه المحاجر الى المحافظة بلا شك دي هتعملي طفرة وهتعملي تنمية وكبيرة عشان برضه ما افرضش ضريبة او أي حاجة اضافية على المواطن وهو مش متحمل يعني
محمد صلاح: بالنسبة لمسالة استصلاح الاراضي اسوان فيها مساحات شاسعة تصلح للاستصلاح وبالتالي الوزراعة في مشروع اعتقد كوم اومبو 20الف فدان طبعا في توشكى المشروع اللي كان قائم ومازال في ناس من اسوان بيشتكوا انهم ماخدوش اراضي توشكى في النهاية تقع في محافظة اسوان ومشروع كوم امبو فيه مشاكل ايضا في الحصول على اراضي
اللواء/ مصطفى السيد: احنا عندنا في كوم امبو 20 الف فدان كان فيه اكتر من لقاء مع وزير الاستثمار والزراعة بشان هذا الموضوع فمخصص للمحافظة 45 الف فدان هتتوزع على شباب الخريجين بواقع 5 افدنة لابناء المحافظة دا قرار وان شاء الله خلال الايام القليلة القادمة هيتم هما هيعملوا جمعيات عملنا جمعيات في كوم امبو وفي اسوان وفي ادفو وهيتوزع عليهم بنسبة عد السكان الموحجودين في المحافظة دا قريب ان شاء الله، فيه جمعية الاورومتوسط عطتنا حوالي 10 الاف فدان نوزعها برضه على شباب المحافظة والمستحقين هنبني له بيت وياخد اتنين ماشية و5 افدنة مجتمع متكامل الخدمات بالاسواق التجارية بالبريد بالبنوك بالكلام دا كله هيتعمل برضه في منطقة غرب كوم امبو بالاضافة الى انه عندنا مشروع في وادي الصعايدة برضه شباب الخريجين اراضي وفي ابو سمبل بس الحقيقة بيخش باقي المحافظات معانا ابناء اسوان بياخدوا نصيبهم هو نصيب طبعا ضعيف وباقي المحافظات الي بيستحق من الخريجين بياخدوا من المحافظة ولكن غرب كوم امبو الى ابناء اسوان فقط دي عندهم ودي في بلدهم فهمّا اولى بها
محمد صلاح: اخبار كوبري كلابشة ايه ؟
اللواء/ مصطفى السيد: دا خلاص اتحط له ميزانية كاملة وخدته هيئة الطرق والكباري وخلال ايام هيتم العمل فيه ، نزل اعتماد واللجنة جت من وزاروة النقل دي موجودة في خطة هذا الاهم بانتهاء هذا العام ان شاء الله تكون موجودة بالاضافة الى كوبري خزان اسوان هيتعمل كوبري بديل ليه بس العام القادم ان شاء الله الموازنة بتاعته في عام 2010/2011
محمد صلاح: يعني مستوى الخدمات بشكل عام صرف صحي ومية وكهربا وطبعا جسور وكباري تسهل حركة الناس مستوى الطرق كله .. ايه المشاكل الي موجودة عندك ؟
اللواء/ مصطفى السيد: الصرف الصحي السنادي المحافظة واخدة 2,3 مليار جنيه عشان الصرف الصحي داخل 48 قرية انا عندي 199 قرية عندي مشكلة في الصرف الصحي انما المية دخلت كل محافظة المية والكهربا انما الصرف الصحي عندي مشاكل ، القرى داخلة ان شاء الله على مراحل عندي مشكلة في العبّارات اللي على النيل فيها مشكلة متهالكة وبعت اتعاقد مع احدى الشركات الحكومية ، عندنا كوبري في اسوان وكوبري في ادفو والكوبري التالت بتاع كلابشة فدول هيخلونا نستغني شوية عن العبارات والعبارات دول بعتنا نصلح العطلان وبعتنا نتعاقد على عبارات جديدة
محمد صلاح: الحياة وردية خالص في اسوان خليك معايا لسه الكلام مخلصش ؟
فاصل
محمد صلاح: سيادة محافظ اسوان كل ما اقوله الحياة وردية يقولي لا مش وردية قوي سيادة المحافظ معانا ناس من اسوان بتتكلم على الاوضاع هناك نشوف بيقولوا ايه عشان ترد عليهم ؟
اللواء/ مصطفى السيد: قوي قوي
محمد صلاح: نشوف اهل اسوان الطيبين بيقولا ايه.
فاصل
مواطن1: بالنسبة للبلد هنا البلد اسعارها غالية جدا بالنسبة للخضروات والفاكهة والماكولات لانه كل ما نروح عند تاجر بيقول انا باخدها غالية فالنهاردة مش عارفين الغالية دي جاية من المحافظة ولا جاية من الارض من اصحاب المزارع ولا من فين بالظبط؟
مواطنة2: بالنسبة لتوفير المواصلات ، المواصلات عندنا صعبة قوي والسواقين بيستغلوا الموقف بالذات من الساعة 10 للساعة 12 تحس ان الاجرة تضاعفت في حين فيه تعريفة مميزة للاجرة فيهة ناس اساسا مش بتقدر تدفع اساسا الاجرة
مواطن3: احنا بنعاني من حكاية العيش احنا عايزين فرن وفيه اماكن فيها اراضي فاضية والمواصلات لحد الشلال 60 قرش الواحد بيدفعه والناس تعبانة من حكاية المواصلات دي ؟
مواطن4: اهم حاجة هي البطالة نبص النهاردة للاسف الشديد جنوب الصعيد لا يحظى باي شئ من موضوع البطالة الشباب النهاردة للاسف في القهاوي بيتسكعوا في القهاوي وغير كده المصايب اللي بتحصل من ورا القهاوي
مواطنة 5: المية ضعيفة خالص مش واصلة لينا خالص بالموتور حتى شاريين موتورات مفيش مية خالص واصلة المية طول النهار مفيش ضعيفة جدا جدا جدا ومش ضامنين اذا كانت المية اللي واصلة دي نضيفة للشرب او ما تصلحش
مواطن6: قدمنا احنا ومجموعة شباب في المرحلة الاولى في مشروع اسكان مبارك للشباب ودفعنا 35 الف ولما ظهرت القرعة استبعد مجموعة اشتكينا للوزارة رجعت قالت نعمل بحث جديد لنا عملنا بحث جديد قالت نستحق في المرحلة التانية وجينا عند الاستحقاق في المرحلة التانية نزل اسامينا في الكشف مستحقين مرحلة تانية فالاستحقاق المرة دي جه بشروط بيقول لازم تدفع 12 لالف جنيه عشان تاخد في المرحلة التانية طب انا دلوقت انا دافع فلوسي 35 الف جنيه انا وكل زمايلي المستبعدين مركونة عندهم 3 سنين بعد 3 سنين يقولي انا عايز منك فروق اسعار 12 الف جنيه طب ليه ما يسووناش المرحلة الاولى
فاصل
محمد صلاح: مشكلة المية اتكلم عليها سيادة المحافظ واقر بيها وقال انها ف طريقها الى الحل طبعا عندنا المشكلتين التانيين البطالة ودي في طريقها الى الحل بعد المشروعات الزراعية والصناعية لكن فيه مشكلتين تانيين مشكلة الاسعار واضح ان مشكلة الاسعار بشكل عام غالية في اسوان يمكن باعتبارها محافظة سياحية والمشكلة التانية مشكلة مشروع اسكان مبارك
اللواء/ مصطفى السيد: موضوع ارتفاع اسعار الخضار طب المواطن دا مقالش ان ارتفاع اسعار الخضاراذا كان في اسوان جنيه 34هنا في القاهرة اعتقد ب50 الموضوع عرض وطلب هنا فيه موسم سياحي
محمد صلاح: يعني بقينا في الشتا الاسعارتضرب .
اللواء/ مصطفى السيد: بواجهها ازاي عندنا المجمع الاستهلاكي بنزل فيه الخضار عندنا برضه مجمع تبع المحافظة غير المجمعات الاستهلاكية لوزارة الاستثمار بننزل فيها الخضار والفاكهة وبقية الحاجات دي باسعار مناسبة جدا زي ما قلت لحضرتك السمك عندنا ب7 جنيه الكيلو وب8 جنيه واللحوم ب34 جنيه بالنسبة للبطالة دي مشكلة عامة في مصر كلها مش في المحافظة لوحدها وبنحاول جاهدين ان احنا نحل فيها بنغير بس مفهوم الشباب وباناشد بس من خلال برنامج حضرتك ان يغير فكره وثقافته بعيد عن العمل الحكومي هتلاقي العمل كتير جدا جدا في قلب المحافظة وهنقضي الى حد كبير على مشكلة البطالة .. موضوع اسكان مبارك اولا محافظة اسوان ارخص محافظة الكلام دا مش كلامي دا كلام وزير الاسكان وهو موجود في المحافظة عندي واعلن هذا الكلام مفيش مقاول النهاردة راضي ياخد الشقة ب85 الف جنيه المحافظات كلها فوق ال90 الف هي المحافظة الوحيدة نظرا لرخص الاسعار فيها ب62 الف هو اتعاقد المرحلة الاولى كانت الاسعار قليلة في العمالة وفي النقل وفي الوقود وفي المواد كل حاجة كانت رخيصة حصل طفرة في الاسعار بالتالي غليت الشقة 12 الف زيادة انا قلت تسهيلا من المحافظة على المواطن هيدفع ال12 الف دول بالتقسيط على سنتين وكلهم دفعوا واتفضل 300 وانما حضرت القرعة وكانت رغبتهم نقسط المبلغ وقبلت فلما بيحصل زيادة غصب عننا
محمد صلاح: المحافظة في الشتا وفي البرد اللي احنا فيه بتبقى محافظة سياحية ناس كتير بتروح على اسوان انت مش شايف ان اسوان تخلت عن الريادة في السياحة لشرم الشيخ والغردقة ؟
اللواء/ مصطفى السيد: لا اطلاقا السايح لاسوان جاي بيعشق اسوان جاي لاسوان ايا كانت المنافسة اولا السياحة تاريخية معظم الدول الاوروبية بيجوا حصة التاريخ مجمعة وبييجي يدرسها في اسوان المانيا واليابان وامريكا دول بالذات اللي انا شفتهم عندنا بيجي عشان يدرس التاريخ عمليا
محمد صلاح: يعني فيها سياحة الاثار وفيها السياحة البيئية والنيلية ؟
اللواء/ مصطفى السيد: والعلاجية فمعظم اهل اوروبا في التاريخ دا في الشتا ياجر بيت او ياجر شقة او ياجر في فندق ويقضي الشتا بالكامل عندي فالسياحة لم تاثر عندي اطلاقا
محمد صلاح: ايوه بس الموارد عندك من السياحة ضعيفة مش زي شرم الشيخ او الغردقة اللي هي شغالة طول السنة .
اللواء/ مصطفى السيد: النوعية اللي جاية للعلاج عندي جاية للتاريخ اما اللي جاي لهدف اخر البحر وحاجات من دا معنديش بحر
محمد صلاح: طب ليه ماعملوش دا عندك نهروعندك مناخ كويس في الشتا وفي اثار بتشتغل صيف وشتا وعندك السياحة البيئية اللي بتتعلق بجزيرة النباتات ومنظر النيل كفاية والصخور اللي موجودة فيه ؟
اللواء/ مصطفى السيد: في غرب اسوان خططنا المنطقة سياحيا حوالي 5 الاف فدان ودي اتخططت خلاص كلها قرى سياحية بيئية واتعرض هذا المشروع على مستثمرين كتير لهم كلهم السياحة البيئية العلاجية فيه ىمشروعات الفترة القادمة ان شا الله هتشهدها اسوان بالاضافة برضه في المجال السياحي عملنا مرسى سياحي كبير يستوعب 120 فندق عائم الى شمال المدينة بالكامل وفي المنطقة الشرقية اسواق سياحية بلا شك هتوفر فرص عمل
محمد صلاح: بتصرف فين مخلفاتها ؟
اللواء/ مصطفى السيد: على المدينة فيه محطات صرف في قلب المراسي دي بيشفط ويصرف على المدينة
محمد صلاح: لان اسوان النيل لكن في اعتداءات على النيل برضه ان مثلا في كلام على اعتداءات على الجزرالنيلية واقامة ابراج واقامة مباني مش الحفاظ على التراث النيل بشكله القديم كان افضل .
اللواء/ مصطفى السيد: لا التعدي بيتزال فورا اما لو حاجة قائمة من 20 او 30 سنة فخلاص بقت قائمة
محمد صلاح: مفيش حاجة في النيل اليومين اللي فاتوا اوالسنتين اللي فاتوا اوالشهرين اللي فاتوا بيتم اعداد مشروعات سياحية عشان يتم اقامة فنادق فيها جزرفي النيل؟
اللواء/ مصطفى السيد: مفيش بيتم ازالة على طول لانها غير قانونية
محمد صلاح: ايه قانونية ايه القانون اللي مكن يبقى في جزيرة في وسط النيل؟
اللواء/ مصطفى السيد: يعني كان فيه فندق حكومي كان موجود على النيل باعته لاحد الشركات يعمل مكانه فندق
محمد صلاح: طب في منطقة الشلال مش في بنا وفيه بازار بيتعمل مش دا برضه يعد اعتداء على النيل ولا ايه..؟
اللواء/ مصطفى السيد: دا يتزال فورا وفيه محاضر يومية للكلام دا انا الاسبوع اللي فات شايل حوالي 18 ازالة من الجزر حوالين النيل
محمد صلاح: خلينا نرجع تاني للمطارات وحركة الطيران ونتكلم عن مطارابو سمبل وضعه ايه من حيث حركة الطيران وانه يجب تطويره بشكل افضل عشان يستوعب حركة سياحة اكبر لان كل ما السياحة هتزيد البطالة هتقل ؟
اللواء/ مصطفى السيد: احنا بنحتاج رحلات سياحية اكتر بنحتاج عدد اكبر
محمد صلاح: هيستوعبها المطار؟
اللواء/ مصطفى السيد: اه هيستوعبها
محمد صلاح: مفيش حاجة لتطويره لزيادة سعته ؟
اللواء/ مصطفى السيد: ماهو عشان برضه اطوره لازم برضه اعتمادات ، انا معنديش الموارد والامكانيات لازم اشوف حركة السياحة هتزيد الاول وبعدين نطلب اعتمادات
محمد صلاح: يعني مطار ابو سمبل مطاردولي ولا مش مطار دولي؟
اللواء/ مصطفى السيد: لا دا مطار محلي
محمد صلاح: بحيرة ناصر 500 كيلو متر اه السمك عندك في اسوان ب7 جنيه لكن فيه ناس بتقول انه ممكن في القاهرة يبقى ب10 جنيه لو حصل تنمية حقيقية للبحيرة وتسهيلات للمستثمرين والصيد وصناعات ما بعد الصيد طبعا التعليب والتغليف وهكذا ايه مشاكل بحيرة ناصر ؟
اللواء/ مصطفى السيد: فيه مشاكل طبعا كان فيه 6 شركات استثمارية متقسمة عليها البحيرة وكان هدفها انها تطور صناعة السمك في البحيرة تجيب لنشات حديثة يصطادوا السمك ويصنعوا في قلب البحيرة في العمق جابوا كشفات وشافوا في العمق قالوا لا الاسماك كلها على شواطئ البحيرة وبداوا وفشلت الشركات الاستثمارية في ادارة البحيرة هو فيه 3 مصانع فقط اللي موجودين حوالين البحيرة هما بيشفوا السمك وبيجمدوه وبيصدروه حاليا مع بعض المستثمرين ان هو يجيب المراكب دي بحيث ان المركب فيها مصنع يشفي السمك ويجمده ويعلبه ويغلفه ويصدره على طول سواء للقاهرة او خارج القاهرة دا الفكر الموجود مع بعض المستثمرين في الفترة القادمة ان شاء الله
محمد صلاح: سيادة المحافظ من زمان القضية دي دايما مطروحة انه بحيرة ناصر ممكن تكفي مصر اكل سمك وفيه مشكلة تتعلق بالنقل وفيه مشكلة تتعلق بالصيد هناك عايزين يبقى في امل انه ان شاء الله بعد 6 اشهر بعد سنة بعد 3 سنين انه يبقى فيه مشروع انه هذه البحيرة اللي الناس دفعت من دمها تمن انها تتعمل عشان اقامة السد العالي اه صحيح السد العالي كان ليه خير كتيرعلى مصرواهل مصر طب ليه ما نستفدش من كل الامكانيات اللي خلقها السد ومن بينها بحيرة ناصر وبدل ما الناس تروح تصطاد في اخرالدنيا ويتمسكوا في اليمن ويتمسكوا في تونس وطبعا الصومال وما ادراك ما الصومال؟
اللواء/ مصطفى السيد: فعلا انا بقول انه فيه 3 مصانع اللي حوالين البحيرة ولكن فيه مستثمرين جامدين جدا وهنعمل المصانع دي ولكن انا بقول لحضرتك فيه فكر انه نجيب حاجات حديثة جدا تصطاد في الاعماق وتصنع في الاعماق بدل ما تطلع تعمل برة وفيه عندنا حاليا في المنطقة الصناعية في اسوان نفسها السمك هناك ويتصنع ويتعمل سواء ملوحة او يتجمد او بيطلع بالتلج بتاعه وبيطلع سوق العبور هنا عندنا في القاهرة ولكن فيه ماكل وخاصة انه فيه بعض ضعاف النفوس من بعض الصيادين بيهرب السمك
محمد صلاح: اخبار التماسيح ايه في البحيرة ياسيادة المحافظ ؟
اللواء/ مصطفى السيد: موجودة بس فيه قرار من وزارة البيئة انه ممنوع صيدها انما ما بتشكلش خطورة
محمد صلاح: وصيدها ممنوع ليه؟
اللواء/ مصطفى السيد: للمحافظة على البيئة برضه حيوان قابل للانقراض فيه منظمة عالمية هي اللي عطت القرار دا على مستوى العالم ممنوع صيد التماسيح
محمد صلاح: خلينا تكلم عن النوبة واهل النوبة .. طبعا مشكلة النوبة التاريخية معروفة من فترة بناء السد العالي ثم تهجيرهم وترحيلهم ثم اتعملت البحيرة انت باصص ازاي لمشاكل اهل النوبة ؟
اللواء/ مصطفى السيد: اولا مفيش مشكلة لاهل النوبة هقول لحضرتك كده مقدمة تاريخية كده بسرعة وبعجالة كانوا اهالي النوبة 43 قرية حوالين ضفاف النيل كانوا بيطلعوا بيروحوا اسوان ، في احياء معينة معروفين لما اتبنى السد العالي الكلام دا كان سنة 1902/ 1933 لما جينا نبني السد العالي الدولة جت ونقلتهم ودا كان بناء على اختيارهم الدولة جت اما في النوبة او تقعدوا على ضفاف النيل بعيد عن البحيرة هما كلهم فرحوا جدا وغنوا وكانوا سعداء جدا انهم هيروحوا النوبة اتعمل على احدث مستوى المية الكهربا الترع الاراضي الزراعية وخدوا كل واحد خد تعويض بما يتناسب مع بيته وارضه اللي كان موجود هناك اللي كان قاعد في 3 اوض او 4 اوض خد نفس البيت قبل ما يتهجر يعني قبل ما يحصل الانتقال من الجنوب الى الشمال فالتعويضات حصلت والتعويضات عن المزروعات بقيمة مالية تتناسب في التوقيت دا سنة 60 وكانوا سعداء جدا وانتقلوا الى مركز قصر النوبة ودا افضل مركز بناء على تقرير مراكز التنمية البشرية مش كلامي انا لانه مركز حضاري جدا جدا كان وقت التعداد ده كان حوالي 19 الف اسرة واتبقى حوالي 9 الاف اسرة كانوا مش موجودين وقت ماهما بيعدوا كانوا شغالين برة خارج اسوان الدولة بنت لغير المقيمين بنت لهم 4 الاف بيت اتبقى 5221 بيت و3 الاف فدان دول كانوا لغير المقيمين ، الدولة في توجيهات سيادة الريس اكتر من مرة
محمد صلاح: انا سمعت سيادة الريس في اكترمن اجتماع بيؤكد على ضرورة حل مشاكل النوبة ؟
اللواء/ مصطفى السيد: طبعا .. وزارة الدفاع بدات تبني في وادي الامل كمرحلة اولى الف فدان زراعة وبناء 500 بيت كمرحلة اولى في وادي الامل الاتنين جنب بعض الارض الزراعية وهتنتهي في 31 /3 بداوا ابحاث التربة ومشروع متكامل ل500 بيت والخدمات كاملة المدارس والمستشفيات والسوق التجاري والمرحلة التانية والتالتة وهنخش في ابو سمبل وفي كل المناطق اللي هما اختاروها وبكده معندناش مشكلة للنوبة وبدانا نشتغل في هذا المكان كان الاول في "كركر" قالوا لا .. الارض الزراعية صالحة 100% وكنا بدانا نشتغل فيها فعلا قالوا لا عايزين في وادي الامل بناء على رغبتهم وبناء على تحليل التربة وافقنا في وادي الامل وبدانا نحط الرسومات وخلاص هنشتغل في 25 /11 هتبدا كل الجهات الحكومية هتبدا تشتغل هناك وفي 31/3 هنبدا نسلم مفاتيح اول مرحلة ان شاء الله
محمد صلاح: معانا ابناءنا واهالينا في النوبة بيتكلموا تسمعهم؟
اللواء/ مصطفى السيد: اهلا وسهلا
محمد صلاح: نشو ف الناس الجُمال بتوع النوبة بيقولوا ايه؟
فاصل
مواطن1: المشكلة الاولى بنتكلم عن المرافق هذه المناطق كلها مناطق سياحية واحنا موجودين دلوقت في احد القرة اللي بيسمى غرب سهيل ودي معروفة جدا سياحيا وبيزورها في اليوم اكتر من 4 الاف زبون من الصبح لحد ما قبل المغرب وهذا المكان فيه فنادق بيئية وفيها مطاعم وفيها خدمات كتيرة جدا موجودة بجهود الاهالي وبمساعدة بعض المستثمرين بالتعاون مع اهالي القرية والمنطقة دي مفيهاش مرافق مفيهاش صرف صحي دي طبعا من اهم المرافق اللي يجب ان تكون موجودة في مكان حيوي زي كده مكان استراتيجي واقتصادي مفيهاش شبكة طرق
مواطن2: مشاكلنا بتنحصر اولا البطالة احنا في ايوان بعد السد العالي مفيش مشروعات او تنمية كبيرة عشان تستوعب الخريجين والشباب
موتاطن3: مشكلاتنا النضافة ، عربيات المجلس او ال ECC ابتدوا يتاخروا كان الاول بيجوا عندنا باستمرار كان الاول بيجي في الاسبوع مرتين دلوقت بيجوا كل 15 يوم مرة احنا بنضف بجهود ذاتية عندنا الستات هما اللي بينضفوا برة البيت فمش لاقيين مكان نودي فيه القمامة
مواطن4: المشكلة بالنسبة الينا احنا هي مشكلة المستثمرين اللي جايين نازلين دي قرية نوبية هي اصلا قرية مفتوحة للسياحة السايح جاي عشان يشوف البيوت النوبية هما جايين يشتروا اراضي والمفروض ان دا امتداد طبيعي لقرية غرب سهيل وعايزين يعملوا بورتو ايه دي مشكلة تانية احنا بنعاني منها
فاصل
محمد صلاح: سيادة المحافظ ترد تقول ايه على ابنائنا ؟
اللواء/ مصطفى السيد: قرية غرب سهيل دول مش من المهجرين بتوع السد العالي ..موضوع الصرف الصحي مخطط هذا العام في موازنة السنادي ومشكلة البطالة اعتقد اتكلمنا فيها هي القرية دي بتعتمد اساسا على السياحة البيئية والسائح بيخش ويقضي يوم جميل في قلب البيت بيقضي يوم بياكل ويشرب ويشتري بعض الصناعات اليدوية ويشوف الفنون الشعبية في القرية و القرية من اجمل قرى اسوان وربنا حباهم بالطيبة وكرم الضيافة والاخلاق الحميدة والامانة
محمد صلاح: اه بس ابننا الاخيربيتكلم عن انه فيه تغييرللمعالم وفي مشروعات مستثمرين الارض؟
اللواء/ مصطفى السيد: محصلش لا تغيير انما قلت لحضرتك منطقة الاستثمار دي شمال المدينة خالص والمنطقة مخططة تخطيط عمراني اما قريتهم محدش هيقرب لها اطلاقا ولو هيحصل في المنطقة الجديدة مع التنسيق الحضاري وكلها بيوت نوبية سياحة نوبية علاجية بنفس النمط وبنفس الشكل والمشروع اللي قال عليه دا اتلغى مفيش أي مشروع خالص
محمد صلاح: سيادة المحافظ اهل النوبة لهم سمات ذو طبيعة خاصة ودا التنوع الخلاق اللي موجود في مصر زي الشراقوة والصعايدة انت الحساسية دي حاططها في الاعتبار بمعنى انهم ليهم مطالب اه هما حاسين ان هما جزء من مصر وجزء من المصريين لكن في بعض الاحيان مشاكلهم بتستخدم في الخارج وبتستخدم كمان في الداخل عندهم مطالب انهم عايزين دايرة انتخابية واحدة لانهم مشتتين وموزعين ومفيش ممثل عن النوبيين في مجلس الشعب ؟
اللواء/ مصطفى السيد: اولا مجلس الشعب فيه 5 اعضاء نوبيين من اسوان ومعروف انه نوبي ومن اسكندرية فيه 2 من القاهرة فيه 2 ادي 5
محمد صلاح: حزب وطني طبعا .
اللواء/ مصطفى السيد: طبعا حزب وطني ..انما حقهم في دايرة بيتدرس الموضوع لان كان لهم دايرة قبل كده لما كانوا جنوب السد العالي ولما طلعوا فوق انضموا مع كوم امبو فدا مطلب شرعي اما اللي بيتكلم في الخارج دا معلش مع احترامي ليه لا عارف النوبة فين ولا اتولد في النوبة ودول ما يتعدوش على اصابع اليد الواحدة ولا يمثلوا النوبة في شئ ، النوبة لهم اعضاء مجلس الشعب لو عنده حاجة بيعرضها وعندي في المجلس المحلي في المحافظة عندي حوالي 18واحد نوبي وعند في اسوان فيه 10 تانيين وطول النهار معايا كلهم مفيش أي مطلب ليهم وهما خلي بال حضرتك النوبيين الموجودين في اسوان يرفضوا رفضا تاما أي حد بيتكلم باسمهم من الخارج وبيدعي ان هو نوبي ، النوبي يجي اهلا وسهلا يتكلم عندنا في بيتنا
محمد صلاح: اخبار نادي اسوان ايه كان بيفضل طالع نازل في الدوري دلوقت نزل ما طلعش خالص؟
اللواء/ مصطفى السيد: لا لا لا.. هيطلع ان شاء الله فيه دعم كامل السنادي لنادي اسوان فيه الحقيقة احد ابناء اسوان المخلصين رجل اعمال وفي وبيحب الرياضة قاعد في النادي دلوقت وسايب شغله ومتبني النادي تماما حبا في اسوان جاب 3 لاعبين برازيليين وجاب كام لعيب من الاندية الكبيرة ولسه عاطيهم مليون جنيه اول امبارح
محمد صلاح: فرقة اسوان للفنون الشعبية لها اغنية بتغنيها في احد عروضها بتقول فيها "اسوان بلد الهوا وصفوها للعلالاي دوا واللي بيجي يغير هوا يحلف ما يمشي مننا " كلنا لما بنروح اسوان ما بنحبش نمشي من اسوان
قال محافظ اسوان اللواء مصطفى السيد كلامه معانا النهاردة كان كلام جميل كلام معقول بس اكيد كان كلام ..... مسئول