اتجاهات

الاربعاء *15/2/2012
محمد موافي : سلام من الله عليكم ورحمة منه وبركات .. أهلاً بحضراتكوا في حلقة جديدة من إتجاهات في بدايتها بأعزي الشعب المصري كله وشعب إسكندرية علي وجه الخصوص بوفاة أحد أهم الكتاب في هذا العصراللي إحنا عشناه وشوفناه أستاذنا المرحوم جلال عامر – جلال عام حيقول التاريخ إنه أحد حكماء مصر وأحد فلاسفة مصر وأحد الأقلام النادرة في تاريخ الصحافة المصرية علي الأقل التاريخ الحديث بس إن شاء الله اللي جاب لمصر جلال عامر حيجيب لها الف جلال عامر ثاني – مصر وللادة وإسكندرية وللادة والله يرحم جلال عامر .. مشاهدينا بين 11 فبراير ذكري خطاب المشهر خطاب التخلي وبين 25 يناير 1011 بداية الثورة يعني سنه أو أكثرمن تاريخ مصر حاجاتى كتير حصلت وحاجات كتير إترتبت وأحداث كثير ووقفات كثير لكن الأكيد الثابت عظمة هذا الشعب وعميق وعيه وعمق حبه لبلده – 25 ينايرخرجت الجماهير بتنادي بالكرامة والحرية والعدالة الإجتماعية لم تكن مدفوعة من جهات أجنبية علي الرغم من كل ما قيل وقامت إعتماداً علي الجهود الذاتية – يعني المصريين خرجوا بدراعهم لم تعتمد الثورة علي تمويل أجنبي بل إعتمدت في تمويلها علي دماء الشهداء وآهات المصابين .. في الحادي عشر من يناير الشعب قال كلمته عندما رفض الإذعان – إحنا بنتكلم علي السنه ديه لبعض المطالبات بالعصيان والإضراب وكلام كتير كلام مرعب لدرجة لقينا فيديوهات علي اليوتيوب منسوبة لأحد الشخصيات المصرية المرموقة والمعروفة هو طبعا نفي المهندس ممدوح حمزه نفي تماما علاقته بالمسألة بس بدأنا الناس بقت خائفة – يعني الناس وقفت ودافعت عن حقها المشروع في هذا الوطن ضربت عرض الحائط بكل الدعوات لوقف العمل ورفع راية البناء والإنتاج .. مشاهدينا قبل ما أرحب بحضراتكم وأرحب بضيفي العزيز الكاتب الصحفي والإعلامي المعروف لكن أيضاً بنستضيفه النهارده بصفته أحد نواب مجلس الشعب المهمومين بهذا الوطن زينا كلنا 80 مليون مصري مهموم بهذا الوطن ألأستاذ مصطفي بكري.. أهلاً وسهلاً يا استاذ مصطفي
مصطفي بكري : أهلا وسهلاً يا أستاذ محمد أنا بأضم صوتي كمان لصوتك في تقديم العزاء الي الشعب المصري والي أبناء الإسكندرية والي أسرة الفقيد الكاتب الصحفي جلال عامر هذا الكاتب الساخر الذي كان بكلمات بسيطة ووجيزه يستطيع أن يعبر عن هموم الوطن وقضاياه وأزماته ومشاكله رحم الله الفقيد
محمد موافي : أستاذ مصطفي معانا رسالة من ألمانيا من سيدة رائعة عايشه في ألمانيا عندها 78 سنه بتقول إنها شافت أهوال الحرب العالمية هناك كانت شايفه إن مصر وضعها دلوقت أفضل بكثير مما بنت عليه إلماينا بعض الحرب وإن مصر أمامها فرصة هائلة للإنطلاق لكن ناقسها حاجه واحده بس .. تعالو نشوف نشوف – ونشوف إيه هي الحاجه ديه ونرجع لحضراتكم مرة ثانيه
فاصل "كلمة سيدة ألمانيه "
بلدكم تحتاج الي حبكم والي مجهودكم الي رغبتكم في البناء لا تفقدون الأمل ولكن لابد من العمل - المؤسف أنه قد تستطيع أنت القيام بتجربه رائدة من أجل النظام والنظافة وهذا شيئ رائع ولكن إذا لم يلتقط منك المواطنون الخيط ويكملون عليه يواصلون عملك بعد عام أو عامين ستكون التجربة قد فشلت ، لابد أن يعمل الجميع .
فاصل
محمد موافي : أهلا بحضراتكم مرة ثانية وأهلاً بالأستاذ مصطفي بكري أستاذنا يمكن فيه ناس بره مصر بتحب مصر أكثر من المصريين
مصطفي بكري : في الحقيقة قبل ما أعرض للموضوعى ده أنا عبر برنامجك الكريم أنا بأتوجه لأهلنا بندر قنا علي وجه التحديد الآن هناك معركة تدور بين أهلنا من الأشراف وأهلنا من الهواره أبناء الحمدات الآسباب بسيطة وتافهة مش كده يعني عند الميكروباس والناس دول ساكنين جنب بعض وكول عمرهم أهل وطول عمرهم علاقات ووشائك إجتماعية بينهم وبين بعض بشكل كبير جداً ولم نشهد أحداثاً مثل هذا منذ عقود من الزمن وخصوماً إخواننا الحمدات وإخواننا في الأشراف عندهم من السمو والتعامل الطيب والجيد في الحقيقة أنا مفاجأ باللي حصر يعني ما فيش سبب قوي .
محمد موافي : الأحداث بعد المشكلة إيه ؟
مصطفي بكري : طبعا دلوقت فيه قتلي وفي جرحي وفيه أزمة كبيره والجيش نزل والبوليس نزل وماحدش قادر يلم الموضوع حتي الآن دا يخليني أتكلم إيه اللي حصل في المجتمع – إيه الإنفلات الأخلاقي ده
محمد موافي : إحنا لما بنتكلم عن قنا قنا المفترض الشخص القنوي عيني اللي مقنا هو من أطيب الشخصيات في مصر هو أقرب الي الهدوء لما يبقى عنده مشكله بيبقي عنيف جدا ً هو هادث وطثق ومتسامح ومتنازل
مصطفي بكري : وكل دول اس مثقفين ومتعلمين وموجودين في الحضر يعني ما هماش في جبل وال في غيره ييي وبين بعض شارع واحد اللي هو عند م مستشفي قنا العام .
في الحقيقة أنا بأناشدهم وبأقول لهم يا أهلنا – يعني الفائز خاسر والخاسر خاسر هذه لغة الدم لا يجب أن تكون موجوده وبأدعوا كل العقلاء في قنا في قنا أن يتعاونوا مع اللواء عادل لبيب محافظ قنا فوراً ومع الجهات الأمنية فورا ومع الجهات الأمنية لنضع حد لهذا المشكل لإن إنتشار هذا الموضوع إنت عارف بتوع الأشراف متماده والهواره أيضا
محمد موافي : أستاذ مصطفي لما بأتكلم عن الأشراف وعن الهواره بأتكلم علي رموز في عائلات وناس كبيرة وناس لها كلمتها يعني إحنا أتربينا إن نسمع كلام الكبير والكبير له كلمه وله هيبة الناس ليه ما إتحركتش
مصطفي بكري : السؤال هل ما عدش فيه كبير والا هل كل واحد بقي ياخد قراره من نفسه والا هل الناس الكبار بقيوا غير قادرين علي الفعل أمام ما حدث الآن من جموح مجتمع في كل حته – إحنا شعب طيب وأصيل ودائما مرتبط بالأرض لكن أصبحنا في فتره من الوقت عندنا حالة أقرب الي الضغينة والحقد علي بعض والعصبية الشديدة في التعامل حتي وانت مع سواق التاكسي يمكن لو تكلمت معاه كلمتين زياده تلاقي نفسك وقعت أو إتقتلت أو أي حاجه الحالة المجتمعية السائدة سببها جزء كبير جداً من الإعلام المنفلت ببث روح الكراهية بين الجميع وإشاعة حالة من الحقد بينهم .. يفترض إن الثورة العظيمة تدفعنا الي أن نحب بعضنا بعضاً ونمضي الي الأمام ونحب هذا الوطن يعني الست الألمانية تتكلم وتدفعنا الي العمل وحب البلد جايه من آخر الدنيا لكنها قرأت عن مصر وربما تكون جاءت وزارت مصر مرة أو إثنين
محمد موافي : بتقول قدامكوا فرصة أعظم وهي فرصة ألمانيا
مصطفي بكري : أنا كنت مع عدد من الزملاء في أعضاء مجلس الشعب ونحن خارجين من الجلسة أحدهم بيقول أنا سافرت ألمانيا بعد الثورة مباشرةً وشوفت حجم الإعجاب بالثورة المصرية وبيقول أنا سافرت من حوالي شهر لاقيت الصورة مختلفة تماماً الناس تقول إيه اللي إنتوا بتعملوه في نفسكم ده
محمد موافي : إيه اللي إنتوا بتعملوه في نفسكم ده أستاذ مصطفي خلينا نتكلم بجراءة في نقد حتي الثورة هل نقول أن الثورة المصرية أظهرت أفضل ما فينا وأظهرت أيضا أسوأ ما فينا ؟
مصطفي بكري : الثورة وأهدافها واضحة من البداية " عيش ، حرية ، عدالة إحتماعية " هذه الشعارات الثلاثة تجسد أمام المصريين وطموحاتهم وعشان كده الشعب المصري كله طلع والمسألة ما كنتش مجموعة معينه – كل الشعب المصري طلع ليحتضن الثوار ويمضي بهم الي الأمام .. كان الناس ينتظرون من الثورة – نمره واحد إستقرار – لملمت الشتات – إعادة الكرامة للمصريين تحقيق العدالة الإجتماعية وإشاعة القيم الفاضلة التي افتقدت لفترات طويلة جداً العودة الي أخلاق القرية المصرية – الي الأصالة المصرية – للأسف مضت الأمور نمره واحد شُنت حرب كراهية في مواجهة الآخر نمره إثنين بقينا بنصنف بعض نمره ثلاثة فيه وجوه قفذت علي الثورة والله لم تكن لا في ميدان التحرير ولا شافت الثورة وبعضهم كانوا رموزاً للحزب الوطني قبل ذلك وبعضهم كانوا عملاء لأمن الدولة ويؤسفني القول في ذلك وطلعت وثائق وكشفت عن ناس في الحقيقة ومن بينهم شخصيات معروفة لا هم لها الآن إلا أنها تولع في البلد – نمره إثنين الإعلامييين الذين يشنون حرباً مقدسة في مواجهة مصر – في مواجهة المجتمع " واحد قاعد علي الطرابيزه يقول لك إيه يعني لو دخلوا وزارة الداخلية ورموا لهم ملوتوف ولا بتاع فيه إيه يعني " واحد تاني يطلع يقول ال 19 واحد دول
المجلس العسكري دول أعداء مصر
محمد موافي : أستاذ مصطفي قبل حتة المجلس العسكري ما تخليني أنا أضم صوتي لصوته لما أقول لك إيه يعني لما أخش وزارة الداخلية ما هو مش فاهم هو مش شغلته ديه – يعن هو مش شغلته متابعة السياسة ولا قراءته يعن ممكن مثلا يتكلم في السياسة يتكلم في البتنجان يتكلم في اي حاجه إنما إيه علاقته هو مش مستوعب الخطورة
مصطفي بكري : فيه ناس علي رأسها بطحه وكان لها تاريخ سابق بدل ما يطهر نفسه بأن ينتقد ذاته وأن يمضي مع الثورة الي الأمام يؤسفني القول أن كل همه الآن هو إشعال النار في الثورة وفي المجتمع – يمكن إتفضح مثلاً مرة والا إثنين والا ثلاثة وبانت صورته الحقيقية أمام الناس طيب يا سيدي أوكيه إذا بوليتم بإستترم بس ما تقعدش تعمل ده – ديه نمره واحد نمره إثنين لما ييجي واحد كل مهنته وحياته الإبتزاز في الناس – يبتز وبعدين يعتذر ، ويبتز وبعدين يعتزر ويقبضوا من خلف ستار ومن بره ستار ولا هم لهم إلا إنك تولع في البلد لما ناس كانت في أمانة السياسات والا ناس كانت تجري وراء جمال مبارك والا ناس كانت وراء كذا وكذا يا جماعه إتقوا الله في هذا البلد
محمد موافي : ممكن كل واحد يكون غلط بس أغلط أستغفر ربنا وأبدأ أصلح إنما ما أهاجمش حد تاني أو ما أولعش في البلد
مصطفي بكري : من حق كل إنسان أن ينتقد – إنتقد المجلس العسكري وإنتقد الحكومة وإنتقد مجلس الشعب زي ما إنت عايز – حرصك علي الوطن يجعلك تبحث عن الخطأ وتنتقده وتكشفه للناس بي فيه طريقة إسمها المسؤولية المهنية بمعني إن أنا ما أشتغلش حرض ما أقولش شائعات ما أكذبش ما أسمحش لأحد يتكلم بألفاظ خارجة تصيب الأسرة المصرية – إحنا بنشوف حاجات وبنسمع ألفاظ ومسطلحات في الحقيقة مكانها مباحث الآداب نفس الحكاية التي علي الفيس بوك – أنا اليومين اللي فاتو مجرد قلت كلمة في مجلس الشعب تعرضت علي الفيس بوك الي ألفاظ تخجل قلة أدب عيال مش متربية – بالأم والاب وكل حاجه عشان كده قلت قسماً بالله كل عيل من دول بعت رسالة أو شتمني لأوديه للنائب العام وأنا قدمت شكوي بحوالي 100 رساله جاءت لي للنائب العام علي طول وهم عارفين أي حد ينالك في كلمة لما يشتمك بأمك والا بتاع سنتين سجن ومش حسيب حقي – أنا لمجرد بأعلن عن رأيي وبأتكلم عن المسؤولية الوطنية ييجي واحد معين يطلق عياله وصبيانه – لأ يا حبيبي إنت وهو إحنا ما بقناش نخاف وأنا عايز أقول للشعب المصري كله إذا ما خرجتوش ودافعتوا عن بلدكم ودافعتم عن ثورتكم العظيمة قسماً بالله قلة صغيرة حتركب علي كتافنا .
محمد موافي : بمناسبة الإعلاميين – أحد الإعلاميين الإسبوع اللي فات قال كلام أنا شخصيا إتخضيت وكتب عنه – قال إن أعداء مصر هم ال 19 فرد هم أعضاء المجلس العسكري وأن أحداث بورسعيد وكل الأحداث التي تلت التخلي أو خطاب التنحي هي من صنع جهاز المخابرات العامة
مصطفي بكري : اللي قال الكلام ده عايز يلحق المخابرات العامة بأمن الدولة – أوكيه تصلح أي جهاز لو فيه فساد – بس تدعوا للتحريض ضد جهاز – جهاز المخابرات العامة هو اللي حمي أمننا القومي – جهاز المخابرات العامه هو اللي حمي مصر من الجواسيس والخونة
محمد موافي : إنت عايز تخرم آخر عين عندك
مصطفي بكري : آه بالظبط وما هو ده مخطط خلي بالك – مخطط باثث وراه الشيطان الذي بدأ يظهر الآن – مخحطط هدفه ضرب مؤسسات الدولة – دمر الداخلية – دمر المخابرات العامة – كل ما الجهاز الأمني الوطني يطلع يقوم تضربه – كل ما القوات المسلحة تمشك نفسها تحاول تشكك فيها
محمد موافي : وإنتوا عملتوا إيه في مجلس الشعب
مصطفي بكري : أنا إتكلمت وحأتكلم ومش حأسكت ولن أسكت علي أي مساس بأي مؤسسة من الدولة وأنا بأقول للكبير والصغير أي حد فيكم ما يدافعش عن مؤسسات الدولة الآن وما يدافعش عن الكيان الوطني المصري – خلينا نختلف زي أي حاجة بس النهارده أنا بدون الشرطة حأموت في بيتي وبدون الجيش حدودي مستباحة – بدون المخابرات العامة والامن الوطني أي حد يدخلي لي وأي حد يخرج وأي حد يعمل اي حاجه
محمد موافي : طيب بدون الشرطة أموت في فيتي طيب ما فيه ناس دلوقت تقول لك طيب ما الشرطة كانت موجودة وأكثر من مائة لحاد 194 واحد من الألتراس أو من جماهير الأهلي ماتت في بورسعيد لجنة تقصي الحقائق عملت إيه
مصطفي بكري : أولا النهارده في الحقيقية إتقال تقرير مبدئي للجنة تقصي الحقائق وأنا عضو في هذه اللجنة والتقرير رصد عدة أمور مهمة نمره واحد تحدث في أول نقطة علي الإنفلات الإعلامي – الإعلام الرياضي اللي أشعل نار الفتنة في هذه القضية اللي حفز الأهلاوي علي البورسعيدي والبورسعيدي علي الأهلاوي – الإعلام ده أشعلها وولعها ومهد الطريق لهذه المجزرة
محمد موافي : دا أول نقطه قبل ما تكمل وندخل في نقط ثانيه حيتعمل معاه إيه ؟
مصطفي بكري : أنا برضه بأقول – بأقول للجنة الثقافة والإعلام بمجلس الشعب انت مسؤولة عن التقنين فيما يتعلق بذلك .. أحنا مش ضد الحرية لكن الحرية عندما تتحول لفوضي لابد أن نقف ونقول إستوب
محمد موافي : لكن أن لا تملك الآليات التي تمنحك القدرة علي أن تقول إستوب حتي وزارة الإعلام أو وزير الإعلام لا يملك إنه يقفل قناة من القنوات
مصطفي بكري : إذا كان الأمر محتاج الي قانون لنصدر القانون في مجلس الشعب – الكره في ملعبنا إحنا دلوقت إما أن مجلس الشعب يأخذ مواقف قوية للحفاظ علي الدولة وإما إن الدولة حتستباح في كل شيئ وأنا بأقول لهم ياجماعة – حتي لما تكلمت علي مسألة التظاهر قلت هاتوا لنا قانون التظاهر في أم الديمقراطيات (بريطانيا ) أو عند ماما أمريكا أو عند أي حد من الناس اللي بتلهس عليه اليومين دول – ما هي أمريكا دلوقت بقة بتلعب في الساحة المصرية وبقي ليها عملائها وبقة بتحط خطة كان بينفذها المعهد الديمقراطي الأمريكي والمعهد الجمهوري الأمريكي والفريدانهاوس وبعض منظمات المجتمع المدني زي ما قالت الوزيرة فايزه أبو النجا صرف 175 مليون دولار في 7 شهور إتصرفوا علي مين ؟ راحت فين الفلوس ديه يا أستاذ محمد
محمد موافي : نأجل النقطه ديه لحاد ما نخلص تقصي الحقائق
مصطفي بكري : ديه نمره واحد الحاجه الثانية مسؤولية المسؤولين الأساسيين في الإستاد اللي قفلوا أبواب وفتحوا أبواب ده برضه مسار علامات إستفهام الحاجه الثالثة هو التقصير والإهمال الأمني الذي يصل الي حد التعمد إنك ناس نازله إنت ما تصديتش – إجراءات أمنية كان يجب أن تتخذ لم تتخذ – ناس دخلت بعد المواعيد – لم تفتش الأسلحة اللي مع البلطجية كل ده أدي في النهاية – إنت عارف من الأول إن فيه جو إحتقان لماذا سمحت بهذا الإهمال ثم الدولة لازم تقول لي مين البلطجية دول جم منين ومين اللي وراهم
محمد موافي : أستاذ مصطفي أنا ممكن أقتنع إن فيه 50 – 60 بلطجي في وسط زحمه إنما أقتنع إن فيه آلاف البلطجية في مكان واحد ؟
مصطفي بكري : بس يا أستاذ محمد أولا أنا أحذر من تحميل المسؤولية لشعب بورسعيد
محمد موافي : أنا ما بأتكلمش علي شعب بورسعيد أنا بأتكلم علي شعب مصر
مصطفي بكري : شعب بورسعيد أنا في الحقيقة مستاء من الحملة الإعلامية علي بورسعيد في هذه الأيام خلي بالك
محمد موافي : إحنا مالناش علاقة خالص ما حدش بيحمل أهل بورسعيد أنا بأتكلم علي مسألة الإنفلات الأخلاقي إن أنا بأتكلم أن قطاعات كبيرة من الشعب المصري في بورسعيد في القاهرة في إسكندرية في أي حته بقه عندها ميل للعنف بأي طريقة
مصطفي بكري : ما هو ده الإحتقان اللي الإعلام لعب دور رئيس فيه فأنا عايز أقول بس عشان أنا بقيت أشوف وأتخض من اللغة اللي بيتكلم بيها الإعلام عن بورسعيد وبعض الهتافات اللي بيرددها البعض عن بورسعيد كان نتيجة ده إن عربات بورسعيد مش قادره تنزل تجيب الخضروات وتطلع عربيه نزلت في الزقازيق كسَّروها – والجيش أرسل طائرة – هل هذا معقول أرسل طائرة مواد غذائية لبورسعيد وصل بنا الحال الي هذه الدرجة فأنا بأقول للناس يا جماعه سيبوا لجان التحقيق وسيبوا النيابة العامة تجري تحقيقاتها في هذه القضية
محمد موافي : وبعدين لا تذر واذرة وزر أخري
مصطفي بكري : حذاري من الإساءة لبورسعيد والي شعب بورسعيد – فيه أخطاء وفيه نا تورطت وفيه ناس إرتكبت جرائم ولا يجب بأي حال من الأحوال ال 73 شهيد الذين سقطوا حقهم لا يجب أن يذهب ولا نسكت عليه بأي حال وإحنا مش حنسكت في مجلس الشعب وحنتابع هذه القضية الي أن نمسك بالمجرم الحقيقي ونحاسبه علي جريمته لكن أنا عايز بس نترك الأمر للتحقيقات الآن ويتوقف الإعلام عن سب بورسعيد والتحريض ضد بورسعيد ديه واحده الأمر الثاني في الحقيقة اللي إحنا يجب أن نصل فيه بنتيجة سريعة جداً هو أيضاً مرتبط بدور لجنة تقصي الحقائق فيما يتعلق بما حدث من أيام الثورة والحداث التي تلتها أحنا مرينا بأحداث عديدة جداً مرينا بمحمد محمود ومرينا بماسبيرو ومجلس الوزراء والبالون وكل الناس تقول أن هناك طرف ثالث إحنا مهمتنا الآن نقول من هو الطرف الثالث أنا عندي قناعة إن أحد أذرع هذا الطرف الثالث المنظمات الأجنبية اللي كانت بتشتغل هنا اللي كانت بتجند وبتدفع فلوس الناس اللي بيجيبوا بلطجيه
محمد موافي : بس ديه منظمات المفترض يا أستاذ مصطفي إن هي منظمات عمل أهلي تثقيف توعية مساعدة فقراء
مصطفي بكري : لأ إن عارف السفيرة الأمريكية باتسون – وعلي فكرة باتسون ديه كانت قبل كده مسؤولة الإغتيالات في وحدة السي آي إيه وكانت سفيرة في باكستان وأفغانستان والعراق ويعني فاهمه الموضوع كويس قوي – باتسون قالت إن المعاهد ديه ما كنتش بتدعم المظاهرات ديه كانت بتدرب – بتدرب علي إيه يا سيادة السفيرة – بتدرب علي إيه ؟ بتدرب علي التظاهر الإعتصام كيف تقاوم السلطات كيف تحشد الجماهير كيف – كيف – كيف وضبط خريطة لتقسيم البلاد في أحد المعاهد وضبط إيصالات بإسمين يعني أنت واحد واخد 100 ألف دولار محمد أحمد – دلني علي محمد أحمد ده - مين هو ما تعرفش فأنا بأعتقد إن هذه المعاهد لعبة زي ما لعبت في يوغسلافيا وقسمتها زي ما لعبت في جورجيا وأوكرانيا وأحدثت فيها أزمات حقيقية وهنا أن تلعب في مصر في ضمن إطار مخطط الشرق الأوسط .
محمد موافي : أستاذ مصطفي بس التمويل او الفلوس ديه مارحتش بس للمنظمات دا فيه ويكلكس – جرائد مصرية نشرت عن جرائد وجرائد كبري جداً وأسماء إعلاميين وأسماء صحفيين وماحدش قدر يكدب
مصطفي بكري : طبعا لإن إحنا سبنا الأمريكان وسبنا هذه المنظمات تتغلغل في البلاد الي درجه كبيرة جداً وأنا ضربت مثل قبل كده وكتب في الجرنال الحقيقة – أنا جالي واحد مره المدير التنفيذي لمنظمة انا لنتا – كلمتني واحده صحفية قالت لي فيه فلان الفلاني عايز يجي يقعد معاك – فجيه قال لي الإسبوع جريدة مستقلة – الكلام ده من 5- 6 سنين وكذا وكذا وإحنا عايزين ندعمها بالإمكانيات اللي إنتوا عايزنها فأنا قلت له حضرتك جاي تأجرني مفروش إتفضل أنتهت المقابلة هذا هو الواقع الان – يعني ناس تغلغلت في الإعلام أنا أعرف واحد أخذ إشارة بث من قطر وعمل وأخذ قناة فيها 8 مليون جنيه – يعني راع عند وأحد أخذ منه 8 مليون جنيه وراح طالع باع نصيبه ب 8 مليون جنيه – فيه جرائد إتعملت هنا –محمد موافي : يعني قناة إتعملت بعد الثورة أخذت إشارة بث من قطر
مصطفي بكري : طبعا من البحرين كانت عملاها قطر هناك وبعدين جيه هنا ومع رجل أعمال ضحك عليه بكلمتين وباع نصيبه ب 8 مليون جنيه .
محمد موافي : طيب ما تقول لنا السكه إزاي يا أستاذ مصطفي ديه شغلانه حلوه هههه
مصطفي بكري : ما هي السكه معروفه بس لازم تعمل نفسك معارض قوي ولسانك طويل وستخر من الناس وبعد كده حتبقي مشهور وممكن تلبسلك كده بتاعه بحمالات ومش محملات إن حر كما تريد تقدر تبقي حاجه كويسه جداً في هذا الموضوع إللي أنا عايز أقوله إن البلد ديه اللي بيحصل فيها دلوقت حرام - حرام بمعني الكلمه – حرام بمعني الحرص علي أمن البلاد وإستقرارها – إثنين لا يجب المتاجرة بالثورة – الثورة ثورة الشعب المصري كله مش ثورة 10 والا 12
محمد موافي : طيب أستاذ مصطفي فيه بعض الأصوات التي هاجمت مصطفي بكري علي الفيس بوك أو بعد الكلمة الخيرة في مجلس الشعب بتقول أن موقف الكاتب الأستاذ مصطفي بكري قُبيل تنحي مبارك شبيه بموقفه دلوقت يعني هو برضه نفس الفترة كان قال مؤسسات الدولة والدولة والمسألة كده وبرضه إحنا بنتكلم النهارده علي مؤسسات الدوله لازم نوضح المسألة يعني .
مصطفي بكري : شوف ما حدش يزايد عليَّ أنا راجل في كل إنتخابات كانوا بيسقطوني وكنت ناجح – مره واحده فقط نجحت فيها بالقضاء المصري وآخر مره أنا النائب الوحيد اللي أحمد عز قطع له الدائره مش عايزأتكلم أنا لي تسجيلات ضد مبارك وموجودة علي اليوتيوب اللي عايز يدخلها – في الثورة أنا نزلت 26 و27 و28 طلعت مظاهرات الأزهر و29 كنت محمول علي الأكتاف في ميدان التحرير علي مدي 4 ساعات بالثلاثين ألف لغاية ما سقطت ورحت القصر العيني
محمد موافي : هل فيه توجه بيحاول بقطع في أي حد يظهر
مصطفي بكري : طبعا فيه ناس إحنا أصلاً ما نعرفهاش عمرنا ما شوفنا لها مواقف دا طبيعي – فيه ناس يا أستاذ كانوا خدم للنظام السابق النهارده لسانهم قد كده وعاملين نفسهم ثوريين – وفيه شرفاء راحوا الميدان من أول يوم وقاتلوا وناضلوا وكافحوا وجاهدوا وأصواتهم موجودة – ناس تحترمها وتحترم آرائها وتحترم أفكارها هي ديه الناس اللي إحنا معاها إنما مش مع أي حد
محمد موافي : فيه محاولات آخيره لإعادة تقويم مثار الثورة يعني بيتشكل مجلس أمناء الثورة أو مجلس قيادة الثورة منهم النائب محمد أبو حامد اللي في مجلس الشعب – إيه رأيك في المجلس – مش في الشخص أنا بأتكلم علي فكرة مجلس قيادة يعني
مصطفي بكري : فيه إئتلافات للثورة كثيرة وإحنا من زمان بنقول ياريت يجتمعوا ويعملوا واجهة واحدة – مجموعة معينة تتحدث بإسم الثورة بس هل هم قادرين علي ذلك ديه نمره واحد – نمره إثنين فيه ناس بتتكلم دلوقت بإسم الثورة – أنا بأقول لك أقسم الله كانوا ضمن الحملة الرئيسية لجمال مبارك – وسافروا أمريكا وأخذوا تدريب ورجعوا ثاني وكل واحد بعد كده شاف له طريقة وأصواتهم عالية وقد كده تسمعهم – الناس ديه عايزه إيه من البلد يا جماعة نحن لن نعيد إنتاج النظام القديم أبداً العجلة لم تعود الي الوراء بس لازم نبص لقدام مش نبقي محلك سر أو نرجع للوراء
محمد موافي : العجلة الآن الي اين تتجه هل تتجه لمواجهة المجلس العسكري لإسقاط المجلس العسكري أم أن المسألة مرتبطة ببعد آخر وهو إسقاط مجلس الشعب ؟
مصطفي بكري : شوف أولا هناك من لا يعجبهم العجب ولا الصيام في رجب مش عايزين مجلس شعب يعني يؤسفني إن واحد طلع من كام يوم يقول لك مجلس الشعب ده لازم نحلوه ولازم ناخد رئيس توافقي إيه يا عم الحاج مش هو المجلس الشعب ده اللي عبر عنه إيرادة الشعب المصري – مش هو ده اللي فضلنا نحلم به إنتخابات حرة ونزيهة والا عشان الإسلاميين جم – الإسلاميين جم بإنتخابات حرة ونحن نشهد علي ذلك وكل مجتمع يشهد علي ذلك عاجبينك مش عاجبينك بس أهم جاءوا بإنتخابات حرة ما هو يأ إنت تبقي ديمقراطي تحترم إيرادة الشعب ياإما عايز ديمقراطية تفصيل علي قدك ديه نمره واحد نمره إثنين اللي عايزين يسقطوا المجلس العسكري – هل تعرف ما معني إسقاط المجلس العسكري معناه أن تخش وزارة الدفاع وتدمرها وتخلص عليها وسقط الجيش إذن أنت تريد إسقاط الجيش كما أردت أن تسقط وزارة الداخلية
محمد موافي : إنت لما تسقط الجيش يبقي ناقص لك حاجه واحدة إردم النيل وخلص علي مصر
مصطفي بكري : لأ هو حيبقي خلصت .. النهارده كان معايا اللواء أحمد جمال الدين في لجنة الدفاع والأمن القومي كنا كنا مقدمين طلبات إحاطى علي الإنفلات الأمني – الحقائق والأرقال اللي حكرها لنا الرجل تخلينا نضرب تعظيم سلام لجهود ضباط ورجال الشرطه يا أخي دا كل يوم والثاني الناس بتضحي وبتموت فيهم – إحنا عايزين منهم إيه خلاص حصل أخطاء ومشاكل وأزمات وحاسبنا وبنحاسب أي حد – إنما قاعدين كل يوم لأ لازم ندمر وزارة الداخلية لازم نعمل مش عارف إيه
محمد موافي : أستاذ مصطفي حضرتك بتقول لي الكلام ده ليه ما المجلس هو اللي عمال يقطع في الداخلية
مصطفي بكري : ما هي ديه المشكلة بعض الأصوات يعني تصور لما واحد صوته يقف ويقول لك يسقط حكم العسكر – يسقط حكم العسكر – يا عم قول لي كلام مفيد – مش حكم العسكر – لأ أنا لدي إنقادات واحد إثنين ثلاثة أربعة لأداء المجلس الأعلي للقوات المسلحة أنا كذا – أنا مش حأنزل أقعد أهتف – أنا ما بأهتفش أنا لدي تحليل موضوعي لما يجري الآن – أنا لدي شيئ إسمه المصلحة الوطنية – البلد ديه أنا لما بأكلمك دلوقت بأقول لك أنا قلبي مجروح علي بلدي في قنا واللي بيحصل فيها ومجروح برضه علي اللي بيحصل في إسكندريه وفي السويس وفي دمياط وبورسعيد في كل مكان هذا الإنفلات إيه سببه – سببه البعض عايز يخلي البلد في حالة توتر – وإحنا بنقول لهم – يعني الشعب المصري العظيم أعطي رسالة لأصحاب الأصوات العالية فيما يتعلق بالعصيان المدني أهوه الشعب المصري قال لهم لأ ومصر حتعدي وحتعبر يعني هم عايزين يجرجروا البلد للخلف
محمد موافي : هم مين ؟ اللي أحنا قاعدين نتكلم عليهم دول كلهم ؟
مصطفي بكري : هم دول اللهو الخفي
محمد موافي : طيب ما تيجي ننتقد المجلس العسكري يا أستاذ مصطفي
مصطفي بكري : يالا المجلس العسكري بطيئ – متردد - مرتبك – المجلس العسكري عرضه للضغوط وأنا بأقولها أهوه يعني بييجي مجموعة يضغطوا بيستجيبوا علي طول .
محمد موافي : طيب سيبك من ده كله لو أنا إنتقدت المجلس العسكري وقلت المجلس العسكري حتي الآن لم يرنا فعل ضرب يضرب فهو ضارب يعني ما مسكش حد حتي اللي بيقبض عليهم المشير بيصدر عفو
مصطفي بكري : أنا بأقول المجلس العسكري يؤسفني القول إيده مرتعشه – مش عايز ياخد إجراء أنا بأحكم لازم أبقي قوي وحاسم وأنا بأقولها للكبير والصغير لازم أبقي قوي وحاسم
محمد موافي : ما أحنا نقول الحريات بقه
مصطفي بكري : لأ حريات مين – ما تشوف رئيس وزراء بريطانيا إذا تعرض الأمن القومي البريطاني للخطر فلا تسألني عن حقوق الإنسان – حقوق الإنسان نحرص عليه والعدل نحرص عليه – بس عندما يمس أمن البلد ويمس لقمة عيش الفقراء لازم الدولة تقول أنا هنا وإلا البلد حتبقي فوضي – خليك مع أولادك في البيت سايب لهم الحرية المطلقة حتضمن العيال تيحي في معاد معين في البيت ولا تبقي ماشيه كويس ولا تحترم أمها والا تحترمك إنت - مش حتحترمك – المجلس الأعلي متصور إنه يعني خلاص إحنا 4 شهور نقضيها بالسهل ونمشي أنا أخاف وأنا أناشد المجلس الأعلي وأنا أحترم
محمد موافي : بس هي مسؤلية رقبتهم لل 19 عضو
مصطفي بكري : في رقبتهم وأنا بأقول لهم وأنا بأعلن دائماً إن الناس ديه من أشرف رجال الذين وقفوا مع الثورة كويس قوي – لكن بأقول لهم لو إستمر إسلوبكم بالشكل ده أنا خايف يجي شهر 6 ما تبقاش فيه حاجه تسلموها لازم يبقي فيه قانون المخطئ كذا المسيب كذا وإلا حنبقي عرضة لديكتاتورية أقلية تفرض ما تريد علينا لأ إحنا أغلبية الشعب المصري شعب أغلبية – الشعب المصري قال كلمته في كيت وكيت وكيت
محمد موافي : أستاذ مصطفي حضرتك شايف دلوقت إن مصر بتديرها ديكتاتورية الصوت العالي
مصطفي بكري : يؤسفني القول ذلك
محمد موافي : قول أحد الفقهاء يقول لك إذا وقع العالم في الحرام وقعت الناس في الفسق – يعني لما يعمل حاجه الناس بتقع في حاجه أكبر – لما أنا أتفرج علي مجلس الشعب – أنا المواطن العادي البسيط اللي قاعد في البيت وأتفرج علي مجلس الشعب وأشوف الخناقات وأشوف الشتيمة وأشوف واحد قايل بيتين شعر مالهوش علاقة وهنا وهنا وهنا وهنا – يبقي أخلاق الناس في الشارع تبقي إيه
مصطفي بكري : أستاذ محمد يمكن مجلس الشعب لسه ليه إسبوعين ثلاثة وأتمني ان كل المظاهر اللي حضرتك وغيرك بينتقدها في الحقيقة أتمني إن إحنا نخلص وأنا علي ثقة إن إحنا نخلص منها لكن ما يؤلمني هو الإعلام وسأدق علي هذا الأمر الإعلام .. الإعلام .. الإعلام
محمد موافي : كل الناس بيتكلموا عن الإعلام الأستاذ مصطفي بكري إعلامي كنت بتقدم برنامج في قناة الساعة والآن بتقدم برنامج في قناة الحياة وبرنامج محترم وقناة الحياة تحديداً لها موقف محترم بعدم بث الأحداث عند وزارة الداخلية وأنا كنت بأيدهم في كده – ما كلنا عمالين تكلم علي الإعلام وإحنا اللي شغالين في الإعلام نصف مصر شغَّاله في الإعلام – مين
مصطفي بكري : إنت ضربت مثال بنفسك وأنا ضربت مثال بنفسي وقس علي ذلك – يعني الأمثلة موجودة والناس تعرفها وتكرهها وأنا مستغرب من رؤساء القنوات – يعني متمسكين بالعناصر ده ليه – أي حرية – أي حرية التي تفتح الباب أمام تحريض وإشعال الفتن بين أبناء الوطن الواحد هل هي ديه الحرية ؟
محمد موافي : أنا كان معايا الإسبوع اللي فات الدكتور أحمد عكاشه عالمنا المعروف فبيعلق علي المشاهد المباشرة التي تبث 24 ساعه اللي عند وزارة الداخلية – شارع محمد محمود فبيقول ده ما إما بيخوف ناس يا إما بيشجع الناس إنها تنزل مسألة إشاعة العنف يعني
مصطفي بكري : ده صحيح وعشان كده أنا في الحقيقة معه وبأناشد كل القنوات الفضائية أن توقف البث المباشر لمثل هذه المشاهد لإن البث المباشر زي ما إنت بتقول إما بيحرض وأما بيحولها الي نوع من أنواع الذعر الذي يدخل بيوت المصريين
محمد موافي : فيه معلومات كثير الناس عايزه تعرفها – النائب مصطفي بكري جوه مجلس الشعب وهو قريب من الأغلبية الممثلة في الإخوان وأيضا قريب من كل الأقليات أو المعارضة داخل المجلس هناك أحاديث الآن نفي واضح من المجلس العسكري بأن حكومة الجنزوري باقية لكن أيضاً هناك اطروحات وعروض من الإخوان كل يوم إن هم جاهزون لتشكيل حكومة إئتلافية أو تشكيل حكومة جديده إيه الوضع ؟
مصطفي بكري : إن عارف النهارده كنت مع مجموعة منهم الإخوان فبأقول لهم علي فكرة ديه حتبقي غلطة عمركم – ليه إنتوا الآن مش جاهزين من الناحية العملية – الوضع صعب للغاية – خلي بالك أي حد يمسك منصب في هذا الوقت فهو فدائي – الدكتور الجنزوري ده راجل فدائي بجد وأنا قلت له الكلام ده إمبارح وقلت له إنت رجل فدائي إنك تحملت وتتحمل المسؤولية في هذا الوقت – اللواء محمد إبراهيم رجل فدائي لإن ثلاثة قبله رفضوا الوزارة وقالوا يا عم ما خلاص بقه إحنا طلعنا علي المعاش مش عايزين الراجل واخد الموضوع علي عاتقه وإتسلخ في مجلس الشعب وفضل متحمل
محمد موافي : حلف يمين إن هو ما ضربش خرطوش
مصطفي بكري : ميت يمين وديه حقيقة والله ديه الحقيقة يا ناس – الناس مش عايزه تفهم
محمد موافي : إزَّاي الحقيقة لما النائب محمد أبو حامد طلع وجاب خرطوش حي عندكم في مجلس الشعب يا أستاذ مصطفي تقول لي الداخلية ما ضربتش
مصطفي بكري : تعالي أنا أديك بتاع من أي حته – دا ساب اللجنة ومشي
محمد موافي : طيب ليه ما ردتش عليه يا أستاذ مصطفي
مصطفي بكري : كل الناس ردت عليه – ساب اللجنة ومشي ما هو الريس قال له اقعد ما تتكلمش دلوقت
محمد موافي : يعن هو ما جبهاش من عند وزارة الداخلية ؟
مصطفي بكري : أنا ما أعرفش جابها منين بس هي حية ساب اللجنه وجيه علي طول ما كملش مع اللجنة – في كل الحوال اللي أنا بأقوله ويزر الداخلية قال لهم إذا دافعنا عن الوزارة وضربنا مش حنخلص وإذا سكتنا وسيبنا الناس تدخل يبقي إحنا مقصرين طيب أنا محتاس أعمل إيه – هو محتاس وظباط كثيرة جداً محتاسه – إذا حيه يقتل مجرم قاطع طريق والا حاجه أو حب يفض قطع طريق تحصل مشكلة وثاني يوم يلاقي نفسه في النيابة عشان كده إحنا عايزين نتكلم عن تفعيل القانون في مواجهة المجرمين وفي مواجهة البلطجية – أي حد يبلطج أي حد جاي يقتحم بيتي بيتك يطع شارع بتاع مطلوب إن الأمن يعطي له تعظيم سلام ويقول له والله خلاص عشان خاطرنا وبتاع التعديلات الدستورية وبتاع ومش عارف إيه والحرية وحقوق الإنسان وخلاص روح إنت حرامي – ما ينفعش تاني يوم حتقع وحتضيع البلد
محمد موافي : أستاذ مصطفي البلد حتقع وتضيع لا قدر الله والا حتتقسم أربعى دول
مصطفي بكري : شوف يظهر البهوات دول مش فاهمين مصر كويس – مصر طول عمر تاريخها – إحنا إتحكما 2000 سنه بأغراب عرب وغيره وغيره ورومان
محمد موافي : عرب أغراب حكمونا يعني الفتح الإسلامي فتح
مصطفي بكري : لأ أنا ما بأقولش عرب وأغراب – حدث فترات طويله جداً ومع ذلك ظلت مصر قوية حتي كرومر يوم ما طرح مبدأ فرق تسود لم يستطع أن ينفذ في جسد الوطن حتي لما حبوا يعملوا فتنة طائفية هو ماشي مسافر قال لا تستطيع أن تفرق المسلم من المسيحي إلا عندما يذهب المسلم الي المسجد والمسيحي الي الكنيسة – الناس ديه مش فاهمه مصر ومش فاهمه الطبيعة الإجتماعية للإنسان المصري مش فاهمه إرتباط الإنسان المصري وميله الدائم الي الإستقرار حا تقول لي أربع دول النهارده قام نائب من النوبة وقال أنا بأطلب من الإعلام أن يتوقف في الحديث عن تقسيم مصر وأقول لك النوبة هم بقايا مصر القديمة وهم فعلاً بقايا مصر القديمة وهم مرتبطون بهذه الأرض حتي آخر يوم رغم ما تعرض لهم أهل النوبة من مشاكل وأزمات في فترات سابقة – المسيحيين أكثر إنتماءا وتمسكاً بهذا الوطن ألم يقل قداسة البابا شنوده أن الوطن نحن لا نسكن في الوطن فقط لكن الوطن يسكن فينا دا تاريخ – ديه بلدنا وأهلنا – نقسم مين ونروح فين
محمد موافي : دولة القنال وبدأت بأحداث بورسعيد ودولة في القاهرة
مصطفي بكري : دا الجدع اللي إسمه برنالد لويس بيقعد كده يعمل الخريطة ويقسم العالم العربي قد تنجح في مكان أوكيه ماشي لكنك لم تنجح في مصر مصر لن تكون الجائزة الكبري لا لأمريكا ولا لإسرائيل أنا ما يخيفني حقيقةً هو الوضع في سيناء – سيناء فيها حالة إنفلات أمني كبيرة جداً – سيناء يجب أن نعطيها إهتمام تنموي وإهتمام أمني لازم تروح هناك وتعمل تنمية في سيناء – الدولة لازم تبص لسيناء وأهل سيناء – أهل سيناء تحملوا علي مدي سنوات طوال – حماية حدودنا الشرقية – هل تتصول إن المجاهدين اللي قدموا أغلي ما يملكون في سيناء تعرف راتب المجاهد كام لغاية دلوقت 500 جنيه ما يجيش قد مرتب مصاب من مصابي الثورة طيب ما نساويهم بأبناء الثورة – ما هم دول أيضا صنعوا – بدل ما ياخد 500 أدي له برضه 1750
محمد موافي : عندنا مثل قديم لما النبي عليه الصلاة والسلام قال أما حمزه فلا بواكي له يعني كل الناس عماله تعيط علي ميتينها إنما حمزه عم الرسول ما حدش بكي
مصطفي بكري : إزاي أنا بأتباكي علي سيناء النهارده وناسي سيناء – والناس تعامل سيناء علي إنها مش مصرية والناس تعامل البدو في سيناء علي إن الناس دول خونه إزَّاي – الناس ديه شالوا الوطن علي أكتافهم - يؤسفني لما أسمع من كاتب والا من مذيع أهل سيناء أصلهم خونه – خونة مين دا إنت اللي خائن
محمد موافي : دا متخلف عقليا
مصطفي بكري : طبعا لإن الناس ديه ناس حملت راية الوطن هم اللي هربوا الجنود في 67 هم اللي كانوا قوة حقيقية في 73
محمد موافي : هم مصريين وخلاص يا أستاذ مصطفي
مصطفي بكري : فليه ومصريين – النهارده المواطن السيناوي – هل يُعقل إن السيناوي لما يعدي كوبري السلام تعامل سيارته ويعامل كله علي إنه غريب عن هذا الوطن ما هي ديه إجراءات يا أستاذ محمد لازم تخلص منها
محمد موافي : حضرتك قلت نقطه مهمة حتي هي مش موضوع برنامجنا ولا موضوع الثورة لكن نقطة في غاية الأهمية – أنا لي واحد قريبي حارب في 73 المعاش اللي بيأخذه بيقول لي يادوبك بأشتري به فاكهه يعني أبطال أكتوبر علي الأقل ألا يساوون بشهداء ثورة ومصابي ثورة 25 يناير
مصطفي بكري : بالظبط والمصابي اكتوبر وأسر الشهداء في أكتوبر الناس ديه قدمت أغلي ما تملك أرواحها دفاعاً عن تراب وكرامة هذا الوطن لازم يُعاملوا بشكل محترم شأنهم شأن الاخرين أيضاً فإحنا محتاجين بالفعل نعيد النظر في أشياء كثيرة جداً لكن ذلك حيتم بالتدريج بس المهم تبقي اليد القوية الفاعلة قادرة علي أن تفعل ذلك – زي ما إنت بتشوف أصحاب المعاشات إتعرضت لظلم كبير بسبب يوسف بطرس غالي أخذ منهم 141مليار جنيه حطها في الموازنة العامة وعمل بها المعاشات الخاصة وغيره اللي المفروض يتحملها أخذ أموالهم وحطها في بنك الإستثمار القومي بنسبة 8% مع إن البنك كا بيعطي 10% في نفس التوقيت للأموال الأخري – تعرض الناس ديه للظلم – آن لهم أن يأخذو حقوقهم إن الراجل اللي علي المعاش ده يلاقي لقمة عيش كريمة يلاقي مبلغ يروح به يتداوي لكن الحكومه أخذتهم
محمد موافي : طيب الفلوس ديه كلها نجيبها منين يا أستاذ مصطفي ماحدش بيشتغل
مصطفي بكري : إشمعن إديت لهم 10% دلوقت ما هم لهم مبالغ ضخمة موجودة أصلا – هات فلوسهم الحقيقية اللي إنت أخذتها كوزارة مالية وإعطيها للصندوقين – الصندوق الحكومي وصندوق قطاع العمال إتعامل معاهل بطريقة مختلفة لكن النظام السابق تعامل مع أصحاب المعاشات زي ما تعامل مع فئات كثيرة مهمشة في المجتمع بطريقة
محمد موافي : أستاذ مصطفي المواجع كثيرة لكن خلينا نبص لقدام النائب مصطفي بكري كيف تتوقع إنتقال السلطة كيف ومتي ؟
مصطفي بكري : نمر واحد أنا بأوكد أن المجلس الأعلي للقوات المسلحة سيلتزم بالجدول الزمني الذي أعلنه بعد الشوري حيتفتح باب الترشيح 10 مارس ناخد 3 أسابيع الناس تلم توكيلات وغيره وغيره – تجري الإنتخابات تسلم السلطة في 30 / 6 ديه نمره واحد نمره إثنين الدستور
محمد موافي : يعني لم يتم التعجيل زي ما أشير ؟
مصطفي بكري : لأ ممكن يتم التعجيل وارد إنما في إعتقادي إنه خلاص إعمل إنتخابات الرئاسة جالك رئيس جمهورية خلصت المسألة إنتهي الموضوع ما عدش فيه ديه نمره واحد نمره إثنين الدستور بعض الناس يقول لك بلاش دستور طيب إزاي بلاش دستور إنت حتجيب رئيس جمهورية من غير دستور إزاي لا إنت عارف نظام برلماني ولا نظام مختلط ولا نظام رئاسي لازم رئيس الجمهورية تبقي صلاحياته واضحة عشان يعرف ياخد قرار إنما حتجيبه من غير دستور مش حياخد قرار
محمد موافي : طيب ما الإعلام بيقول إن 28 فبراير الشهر ده حتشكل لجنة صياغة الدستور
مصطفي بكري : بالظبط نتمني بالفعل إن إحنا نبدأ بعد مجلس الشوري بالظبط 28 فبراير بعد إنتخابات مجلس الشوري تبدأ اللجنة وفيه أربع فصول جاهزين اللي هي فصول الحريات العامة – كام فصل كده يقدرو يتعملوا في إسبوعين ثلاثة يبقي عندنا دستور وعندنا رئيس جمهورية منتخب وهذا إنجاز جديد لثورة 25 يناير يضاف الي إنجازاتها – إنما اللي بيقول لك دلوقت لا ..لا .. لأ ما فيش داعي يكون فيه رئيس جمهورية ولا فيه دستور الثورة لما تكمل مهامها يعني إيه – يعني المطلوب فوضي – يعني مطلوب إن ما يبقاش فيه رئيس جمهورية
محمد موافي : اصل ما هو اللي بيقول كده صوته عالي
مصطفي بكري : ماليش دعوي صوته عالي والا صوته واطي مش ديه القضية
محمد موافي : ممكن يعدي صوتك ما هي بقة المسألة صوت
مصطفي بكري : هو إحنا الأغلبية الصامته في هذا الشارع المصري كله – هي مش صامتة علي فكرة وبتثبت كل يوم قوتها – اللي يستهين بالشعب المصري ده يبقي ما بيفهمش الشعب المصري – الشعب المصري رد بهدوء وذكاء علي موضوع العصيان المدني إنزل الشارع شوف الناس إنزل شوف العمال اللي راحوا إمبارح عشان يثبتوا حضورهم وهم في أجازه في كل المناطق شيئ يفرح قيمة حقيقية تقول إن مصر حتفضل مصانة بأبناءها برجالها بجنودها بضباطها بقضاتها ماحدش حيقدر يهز البلد ديه أبداً خلي عندنا ثقة في الدات أولا لإن أنا دائماً تلاقي الناس مرتعشة في كل كبيرة وصغيرة لأ خلينا نطرح كل السيناريوهات ونتناقش فيها بس خلينا ننطلق من أرضية أن هذا الشعب شعب متحضر بذوره في عمق التاريخ ثقافته الموروثة هي ثقافة الإستمرار والبناء
محمد موافي : لكن المشهد مختلف تماماً عن كل اللي بتقوله
مصطفي بكري : لأ بالعكس
محمد موافي : ما إحنا لسه عمالين نتكلم علي الشتيمة وبذاءة والضرب والعنف
مصطفي بكري : ماشي أستاذ محمد ظواهر وقتية ستنتهي والله اللي حصل في مصر في فترة السنه ديه لو حصل في بلد زي بريطانيا كانت وقعت – ويمكن الأستاذ هيكل كنت معاه من كام يوم بيقول لي ما حدث في مصر لو حدث في أي بلد ثاني كانت إنتهتى الشعب ده ما حدش يعرف يهزه ما حدش يدمره ولا يدمر قيمته وكيانه وعلاقاته الإجتماعية بين فئاته المختلفة ما حدش حيقدر لإن ما نمتلكه نحن ربما يفتقده الآخرون
محمد موافي : هل نفتقد لغة رقي الحوار أو التهذيب في الكلام علي مستوي الكبار عندنا ؟
مصطفي بكري : هناك ظاهرة إنفلات أخلاقي نقر بها
محمد موافي : حضرتك كنت بتقول كنت ما الأستاذ هيكل فيه ناس إنتقدت إستاذنا الكبير محمد حسين هيكل إن هو بعد ما رحل مبارك جاي بيقول البقرة الضحوك – يعني هذا الكلام كان لا يليق بحجم هيكل
مصطفي بكري : علي كل حال الأستاذ هيكل له رأيه وله مواقفه التي نحترمها وهو عرضة للنقد ما فيش حد مش عرضة للنقد ووارد يكون صح ووارد يكون خطأ ما فيش مشكلة وهو نفسه يتقبل الرأي والرأي الآخر
محمد موافي : هو طبعا قام وقيمة
مصطفي بكري : وأنا في تقديري الإنتقاد وارد إيه يعني لما نقول دا ما كنش مفروض مش ديه المشكلة لكن المشكلة هي اللي إنت بتقوله أن الصغير لا يحترم الكبير والكبير لا يحترم الصغير إنه لغة الخطاب بيننا وبين بعض هي لغة أصبحت شتائمية ليست لغة مهذبة لكن تقدير هذا الإنفلات الي حينه لاحظ إنك فاضل 30 سنه مقفول عليك زي بالظبط غطي الحله اللي شيلته حصل فوران لكن بعد شويه بتستقر الأمور عشان كده النهارده زي ما قال أحمد جمال الدين قالك طيب إنتوا عايزين تقارنوا النهارده بأول ما بدأت الثورة حيث الإنفلات الأمني الكبير آه في إنفلات وفيه جرائم ترتكب وفيه أخلاقيام ما هياش مضبوطه وارد كل ده تمام لكن بالتأكيد فيه قوة بتصعد بتمسك بقبضتها جيداً فيه ناس مستعدة تضحي من أجل البلد وفيه ناس فاقت وبقة واعية للحقائق وترفض لغة الصوت العالي ولغة لإبتزاز ولغة الإهانة ولغة حلق حوش ما ينفعش – ما ينفعش
محمد موافي : طيب أستاذ مصطفي هل من ضمن مشاكلنا أن - البعض بيقول إن برلمان مصر أو مجلس الشعب المصري لا يمتلك رؤية قومية واضحة لمصر مشروع قومي مشروع تنموي ومشروع نهضة الناس كلها تتلم حواليه ؟
مصطفي بكري : إحنا في حاجه الي هذا المشروع – هذا المشروع يستطيع أن يجمعنا سوياً وأن يكون نقطة إنطلاق ومرتكز لآفاق المرحلة القادمة إحنا محتاجين زمان عبد الناصر في تأمين قناة السويس في مواجهة العدوان في التحرر الوطني والتحرر الإجتماعي وكنا عايشين
محمد موافي : هو الناس بتقول إن إحنا عندنا مشروعين في تاريخنا بس هو تاميم قناة السويس ثم الله يرحمه السادات لما عمل حرب 73
مصطفي بكري : لا .. لأ فيه مشروعات كثير جداً واجهنا فيها الرجعية العربية واجهنا فيها الرجعية المجتمعية داخل مصر وشعار إرفع رأسك يا أخي فقط مضي عهد الإستعباد دا مشروع قومي
محمد موافي : دا إحنا رفعناها قوي لحاد ما بقينا نتنطط علي نفسنا
مصطفي بكري : الناس عايزه نقطة إنطلاق – الناس بتحب مصر – الغلبان البسيط اللي قاعد علي المسطبة في بلادنا ده بيموت عشقاً في هذا البلد ومستعد يطلع – أنا حأضرب لك مثل في 56 لما حصل عدوان بورسعيد جم بتاع 300 واحد من قرية عندينا إسمها السمطه في قنا جم بسلاحهم هنا ودخلوا علي قصر عابدين وطلبوا أن يقابلوا جمال عبد الناصر لأنهم يريدون أن يتطوعوا في الدفاع عن أهلنا في بورسعيد دا الشعب المصري البسيط العادي وقت الأزمة تجده كل الشعب المصري تكاتف فأنا بأعتقد إن التحدي اللي بتفرضه علينا أمريكا ده دلوقت دا نقطة إرتكاز – الشيخ محمد حسان ربنا يبارك فيه لما تلع إمبارح في إستديو 27 وقال إن إحنا مستعدين نلم أموال المعونة الأمريكية ولكن احدً لم يفرض المذلة علينا – يا سلام – شوف من إمبارح حديث الناس كلها علي هذه المقولة إحنا شعب يحتاج الي قيم ويحتاج الي مشروع قومي ويحتاج الي هدف وطني النهارده هدف زي ده إيه يا أمريكا المليار وثلاثة من عشره بتعملي بهم إيه والقرشينات التانيين بتجيبيهم بتدي أغلبهم لمنظمات المجتمع المدني بتاعتك ديه الطابور الخامس بتاعك إيه حتعملي لنا يعني ما إحنا خسرنا مليارات – دا السنه اللي فاتت خسرنا 187 مليار يا استاذ محمد
محمد موافي : فيه ناس بتقول إن هذه اللهجة هي اللهجة الشبيهة بأواخر عهد عبد الناصر إن إحنا بقي صوتنا عالي قوي وف النهاية أتضربنا في 67
مصطفي بكري : ياليتنا نعود الي عهد عبد الناصر العهد الوطني القومي إتضربنا في 67 نتيجة مؤامرة لكن بعدها بإسبوعين كنا بنخوض معركة رأس العش
محمد موافي : بس إحنا الوقت كل يوم في مؤامرة
مصطفي بكري : كنا بنخوض معركة رأس العش يا أستاذ محمد نحن نحتاج الي قيادة وطنية قومية تعرف أن هذا البلد ليس فقط ينغلق علي ذاته
محمد موافي : هل هذه القيادة لم تظهر بعد
مصطفي بكري : إن شاء الله حتظهر
محمد موافي : بخصوص مسألة القومية العربية ومسألة الرجعية التقدمية الدعوات الآن عالية وموجهة ورسائل موجهة الي المجلس العسكري بطرد السوري من القاهرة هل تؤيد ذلك ؟
مصطفي بكري : لأ أنا ضد طرد السفير السوري أو ضد طرد اي سفير إتخذ إجراءات
محمد موافي : مع كل مذابح بشار
مصطفي بكري : أنا ضد وبأدين كل الإجراءات القمعية التي مورست ضد الشعب السوري لكن أنا عايز حل عربي يا أستاذ محمد لو إستدعينا الناتو مرة أخري سنكون أمام كارثة جديدة في منطقتنا العربية – سوريا لا يجب أن تسقط التغيير يجب أن يحدث لكن سوريا لا يجب أن تسقط هذا قرار الشعب السوري وليس قراري – سوريا لو سقطت سقط أشياء كثيرة في هذه الأمة وإستباحت إسرائيل أرضنا من النيل الي الفراط
محمد موافي : هي عملت إيه لإسرائيل سوريا يا أستاذ مصطفي
مصطفي بكري : أنا بأتكلم عن وطن وعن كيان أنا أريد أن يحدث التغيير يعني أنا بأتمني أن تجري إنتخابات حرة مباشرة تحت رقابة عربية وإذا الشعب السوري مش عايز بشَّار يمشي بشَّار .
محمد موافي : إن شاء الله يمشي بشَّ شكراً جزيلاً للنائب والكاتب الصحفي الأستاذ مصطفي بكري شكراً علي التوضيحات المهمة والكلام المهم جداً عن عن الأخلاق اللي إحنا فعلاً في أمس الحاجة أنا واحد من الناس شايف إن مشكلة أكبر المشاكل مصر ليس المعونة المريكية ولا المؤامرات ولا الفوضوية والا أي حاجة هي مشكلة أخلاق وأخلاق وأخلاق حتي القاقم دمتم في رعاية الله وأمنه