توريد 976 طن قمح لصوامع الشرقية    البابا فرنسيس: أي شكل من أشكال العنصرية غير مقبول    شكري يبحث العلاقات الثنائية والقضايا الإقليمية مع نظيره الألماني    البورصة تخاطب "النيل لحليج الأقطان" للإفصاح عن خططها لسرعة إعادة التداول    محافظ الشرقية يتفقد منطقة أبو عميرة وأعمال تطوير قناطر الزقازيق    "الشهود والكاميرات".. سلاح الأمن لفك لغز العثور على جثة سائق توك توك بالجيزة    "رجاء الجداوي" تتصدر تويتر بعد نقلها للعناية المركزة إثر إصابتها بكورونا    محافظ القاهرة يتابع الرعاية الصحية المقدمة للمواطنين بمستشفى صدر العباسية    "الصحة العراقية": 781 إصابة جديدة بفيروس "كورونا" وتماثل 587 حالة للشفاء    الرئيس الفلسطيني يمدد حالة الطوارئ لثلاثين يوما لمواجهة كورونا    معادلة الدورى أمام الاتحاد..!    4 قرارات لمجلس الوزراء في اجتماعه الأسبوعي    رئيس "تضامن النواب": الدولة تدير أزمة كورونا بكفاءة ونحتاج الوعي    تشييع جنازة رجائي الميرغني ودفنه بمقابر الأسرة ب15 مايو    النائب العام يستعرض مع المحامين العموم آلية العمل بالنيابة الفترة المقبلة    نقيب الأشراف ناعيا وزير الأوقاف الأسبق: مؤلفاته منهج للأجيال المقبلة    الأوقاف: الجامعة المصرية بكازاخستان تحصل على لقب الأفضل في العلوم الإسلامية    لجنة "أزمة كورونا": إعلان خطة استئناف النشاط الرياضي الأسبوع المقبل    تقارير: عودة الدوري المغربي نهاية يوليو    "سينتهي قبل مونديال الأندية".. الاتحاد الأسيوي يعلن استكمال دوري الأبطال    معروف يوسف يتلقى ثلاثة عروض محلية بالدوري المصري وأخرى عربية    "الوزراء" يقر اتفاق شراكة لتنفيذ "المساعدة الفنية من أجل تطوير تجارة الجملة بأسواق المواد الغذائية"    أحمد موسى: مخاوف أولياء أمور طلاب الثانوية العامة بخصوص إجراء الامتحانات مشروعة | فيديو    تحرش بفتاة.. الحبس سنة لكهربائي في كفر الشيخ    الحرارة ترتفع غدا وتنخفض الجمعة.. الأرصاد: موجة تذبذب في الطقس    6 أغسطس.. الحكم في قضية طالب ثانوي قتل خال صديقه    مطار مرسى علم يستقبل رحلة استثنائية تقل 165 من العالقين بالرياض | صور    مع تواصل الاحتجاجات ضد العنصرية.. "التمييز" طارد الجائزة الأمريكية الأشهر "أوسكار"    هل يجوز جدولة زكاة المال على دفعات بعد حلول الحول؟.. البحوث الإسلامية يوضح    رئيسة مدينة سفاجا تقود حملة لحصر ومنع التعديات على أراضي الدولة    5 إصابات إيجابية جديدة ب"كورونا" في مطروح    للمرة الثانية.. مواطن يخصص منزلين وسيارة لعلاج مصابي كورونا بالقليوبية    محافظ أسوان: التعاقد مع الهيئة العربية للتصنيع لشراء 200 ألف كمامة كمرحلة أولى    ديو غنائي جديد يجمع بين عمر كمال وأوكا    المطران عطا الله حنا لمحرفي الكتاب المقدس: النكبة تمت بوعد من بلفور وليس الله    توافر جميع الأدوية والمستلزمات الطبية بالمدينة الشبابية في أسوان    إيجالو يتحدث عن طموحه مع مانشستر يونايتد    ذبح طفلين بمنزلهما .. معاقبة عامل بالإعدام شنقًا بسوهاج    لقتله مسنة بسبب السرقة حبس عاطل 15 يوماً على ذمة التحقيقات    باريس سان جيرمان يخطط لخطف «ديست» قبل برشلونة وبايرن ميونخ    الأهلى يستغل توقف النشاط الرياضى فى إصلاح ملعب التتش    اتحاد الكرة يدرس إقامة الجمعية العمومية لمناقشة اللائحة في أغسطس    حلا شيحة ونصيحة جديدة عبر إنستجرام .. استمر فى التألق وسيشعرون بالحرق    "سعد" يلتقي بمطران أسيوط لبحث استكمال جهود تطوير مسار رحلة العائلة المقدسة    اللهم اجعل مثواه الجنة.. فيفي عبده تدعو للراحل علي عبد الرحيم    عبد الدايم: أطلقنا سلسلة أفلام ذاكرة الإبداع لتعريف الأجيال الجديدة برموز الفكر والفن والأدب فى مصر    من عاب ابتلي.. أحمد العوضي يهاجم المتنمرين: آفة المجتمع    تعرف على قرارات مجلس الوزراء خلال الاجتماع رقم 94    دعاء للميت .. لا تنقطعوا عن الزيارة فالأموات يشعرون بكم    استمرار أعمال التطهير والتعقيم للمساجد بالمنيا    دعاء للمريض ابي .. 5 ادعية تخفف ألمه وتعجل شفاءه    أهالى قرية أولاد عمرو بقنا يشكون عدم إنارة الشوارع    إماراتي يعفي مستأجرًا من 400 ألف دولار    بهجات يتفقد مشروعات "الإسكان الاجتماعى" والمرافق بمدينة السادات|صور    رئيس جامعة بنها: حلم إنشاء المستشفى الجامعي الجديد يتحقق على أرض الواقع    مرور الجيزة: غلق كلي ل مطلع الدائري بالقومية لمدة 5 أيام    عالم سعودي: انتشار عدوى كورونا رفع كراهة التلثم المنهي عنه في الصلاة    الكرتي نجم الوداد يصدم الزمالك ويرفض مناقشة أى عروض عربية أو أفريقية    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.





كلام مسئول
نشر في أخبار مصر يوم 25 - 12 - 2010

محمد صلاح : يا مساء الخير النبى قبل الهدية مقولة بنقولها وبنرددها وبنستخدمها فى غير موضعها خالص ولا هياش حديث شريف لكن احنا عملنا عليها مفتاح سحرى خليناها بالفكاكة كده بداية صغيرة لطريق طويل عينك عينك وبتتغير الجملة وتخش على شيلنى وأشيلك يا بخت من نفع وإستنفع أبجنى تجدنى وتتحول الهدية لرشوة أو أمسك يا با دا أنت صاحب عيال يمكن السر فى البقشيش والإكراميات اللى اتحولت عندنا لقانون فعلى يمكن الجملة الظريفة دى إختراع مصرى سابق التجهيز لكل بلوة علشان تعدى جمايل المشكلة أننا ممكن نتعود ومنشوفش فساد أصلا ونقول برده كلام يريحنا يا عم دى بلدهم يا سيدى دى فلوسنا وواخدين حقنا يا بخت من كان النقيب خاله معرفش ايه حكاية النقيب ده؟ النقب عندنا أصلا طالع عينهم يعنى الفساد الإدارى يعنى موظف عام بيتصرف فى المال العام لمصلحته موظف عام يجامل قرايبه معارفه فى تسليك شغلانة مناقصة ولا فى تعيين خددوا بالكم من إعلانات الوفيات هتلاقوا حد مات إتكتبت الأسماء أسم وأبن عم وخال وأبن جوز عمة فلان وكلهم شغالين فى المصلحة اللى على رأسها فلان ده الفساد الإدارى كمان يعنى لما حد ياخد حاجة من المال العام أو يعتمد على الوساطة والمحسوبية لزوم التسهيلات والتشهيلات الحكومية المال العام فى عرف البعض سايب مالوش صاحب فى حين ان كلنا أصحابه بس محدش واخد باله الخطير بقى فى الفساد الإدارى تبريراته هو المرتب هيعمل ايه ؟ طب ما غيرنا بياخد الأسعار الغلا الكوا طب فين الضمير؟ فين الدين؟ وكلنا ما شاء الله شعب إحتارت فى تدينا الأمم فين الرقابة الحكومية؟ عن الفساد فى الحكومة هيكون لينا النهاردة كلام مسئول .
تقرير
تهتم النيابة الإدارية فى مصر بمشكلات الفساد داخل الأجهزة الحكومية من مخالفات مالية أو إدارية وتلقى جهودها للحد من الفساد عبر كشفه ومحاصرته بالوسائل القانونية ولكن البعض يرى أن حل مشكلة الفساد يكون بإصلاح المنظومة الإدارية لسد أبواب الفساد من جذورها ويرى البعض خطورة فى السلوكيات عبر الزج بالكثير من الشكاوى الكيدية خصوصا بعد أن تم تشغيل خط ساخن للإبلاغ عن الفساد وشكاوى المواطنين برقم 19468 ضمن بوابة الحكومة المصرية يستهدف الخط تدعيم الشفافية وتحديد مواقع الفساد المالى والإدارى على الرغم من عدم قناعة الكثيرين بفاعلية الخطوط الساخنة وبسبب حداثته ربما لم تحصر حتى الأن أو تبوب الشكاوى الواردة من خلاله إلا أن التقارير الحكومية تصل إلى أن 70 % من المواطنين يتعرضون لوقائع فساد فى قطاعات الحكومة يوميا ويتورط فيها موظفون كبار وصغار كانت هيئة الرقابة الإدارية قد تأسست فى مصر عام 54 وتختص بإجراء الرقابة والتحريات اللازمة للكشف عن المخالفات المالية والإدارية وفحص الشكاوى التى تحال إليه من الرؤساء المختصين أو من أى جهة رسمية عن مخالفة القانون أو الأعمال فى أداء واجبات الوظيفة وإجراء التحقيق فى المخالفات المالية والإدارية التى تكشف عنها الرقابة وفيما يحال إليها من الجهات الإدارية المختصة وما تتلقاه من شكاوى الأفراد والهيئات التى يثبت الفحص جديتها كما تتولى النيابة الإدارية لمباشرة الدعوة أمام المحاكم التأديبية وحققت النيابة الإدارية 70 ألف قضية فساد إدارى فى العام الماضى .
محمد صلاح : فى ديسمبر من كل سنة العالم بيحتفل باليوم العالمى لمكافحة الفساد والفساد الإدارى فى الحكومة عندنا ملف كبير وضخم وجميل جدا لكن هو فين؟ مقرى ومتشاف كويس ولا الإعتياد خلانا مش واخدين بالنا؟ ما هى العين زى ما بتتعود على الجمال بتتعود برده على القبح أسوأ حاجة اننا نفقد الحواس ويبقى الشىء وعكسه حاجة واحدة ويتساوى الحلال بالحرام والحق بالباطل والعدل بالظلم رئيس هيئة النيابة الإدارية المستشار تيمور مصطفى كامل هيكون لينا معاه كلام مسئول أرحب برئيس هيئة النيابة الإدارية المستشار تيمور مصطفى كامل منورنا يا سيادة المستشار
المستشار تيمور مصطفى كامل : أهلا بيك
محمد صلاح : سيادة المستشار يعنى بيحصل لخبطة شوية عند الناس ايه الفرق بين النيابة الإدارية والرقابة الإدارية؟
المستشار تيمور مصطفى كامل : أنا طبعا عندما انشأت النيابة الإدارية عام 54 كانت هيئة الرقابة الإدارية جزء من النيابة الإدارية وبعد كده تم الإنفصال
محمد صلاح : طبيعة العمل ايه بقى؟
المستشار تيمور مصطفى كامل : فى طبيعة العمل أن هو فى النيابة الإدارية هيئة قضائية مستقلة بتقوم بفحص الشكاوى والتحقيقات وطبعا بممارسة الدعوة التأديبية امام المحاكم التأديبية المختصة أما جهاز الرقابة فهو بينظر للشكاوى بصفة عامة ثم يحيلها إلى الجهة المسئولة سواء كانت نيابة إدارية أو جهاز المركزى للمحاسبات أو أى هيئة أخرى
محمد صلاح : هل عندنا معدل نقدر نحسبه للفساد الحكومى يعنى كام فى المية كام قضية - دا موجود؟
المستشار تيمور مصطفى كامل : يعنى مش عايزين برضه نقول أن معدل الفساد مش فساد حكومى يعنى فيه إهمال وتقصير أنا بدا بالمعنى الواسع بيؤدى إلى ان بيظهر إلى هو الفساد المالى أو الإدارى الفساد يعنى المسائل فيه تطور منذ يعنى عايز أقول فترة طويلة
محمد صلاح : تطور فى مكافحة الفساد ولا نفسه فى الفساد؟
المستشار تيمور مصطفى كامل : الفساد نفسه أو منظومة الفساد فى حد نفسه ظاهرة الفساد فى حد ذاتها لابد ان احنا علشان نقدر نعالجها لابد أن نعترف بوجودها أساسا وحلها فى رأيى ان لن يكون حل فقط تشريعى بمعنى فيه وجوه كثيرة لكن دى عبارة عن إستراتيجية متكاملة بتطلب معالجة الأمور من الناحية الإقتصادية والإجتماعية والسياسية والتربوية والدينية حتى نستطيع نقول أن هناك فعلا تصور كامل لمكافحة هذه الأفة
محمد صلاح : يعنى عندنا مؤشر؟ يعنى فى السنة اللى فاتت مثلا والسنة اللى قبلها
المستشار تيمور مصطفى كامل : أقول مثلا المعدلات الدولية اللى هى أساسا لمكافحة الفساد مصر كانت وصلت لترتيب 123 فى الفترة الأخيرة فى ال4 ، 5 سنوات الأخيرة نزلت وصلت ل 98
محمد صلاح : دا بالنسبة للفساد فى الجهاز الإدارى أو الحكومى مش الفساد دا التانى اللى بره الكبير دا
المستشار تيمور مصطفى كامل : لأ الفساد بصفة عامة لأنوا إتفاقية مكافحة الفساد اللى وقعت عليها مصر 2003 بتلقى عليها إلتزامات علشان تفعل هذه الإتفاقية حتى يكون هناك إستراتيجية وطنية لمكافحة هذا الفساد
محمد صلاح : سيادة المستشار عندكم الخط الساخن المفروض ان يتلقى الشكاوى والخط هيطلع على الشاشة دلوقتى اللى هو 19468 قد ايه خط التعامل عن طريق الخط ده؟
المستشار تيمور مصطفى كامل : ما هو حضرتك علشان بردوا يعنى الناس تبقى فاهمة ليه عملنا خط ساخن؟ لأنوا دى أول مرة مبادرة تمت من جانب النيابة الإدارية داخل الجهاز القضائى احنا بنقول إذا كان هناك تفعيل حقيقى للجهاز الإدارى فى مصر فلابد من مواجهة التقصير والإهمال فاحنا مشينا على مستويين المستوى الأول حصرنا كافة القضايا الموجود داخل النيابة علشان نقدر نصفيها فى فترة وجيزة وقد تم فعلا تشكيل لجنة
محمد صلاح :فى النيابة الإدارية تشكيل لجنة دى مسألة كويسة عاداتا بره نسمع عن موضوع راح للجنة
المستشار تيمور مصطفى كامل : اللجنة مجموعة من السادة المستشارين اللى هما مسئولين عن التحقيق على مستوى الجمهورية لتصفية هذه القضايا فى عدة شهور هذا الكلام بدأناه من فترة وجيزة
محمد صلاح :طب بالنسبة للخط الساخن بقى؟
المستشار تيمور مصطفى كامل :الخط الساخن احنا قلنا الآتى وظيفة النيابة الإدارية تلقى الشكاوى المواطن بيلقى عناء شديد فى إن هو يستطيع أن يصل بشكواه للجهة الإدارية
محمد صلاح : بتتعب وبتجد الطرق مقفولة
المستشار تيمور مصطفى كامل : أه بتتعب المسألة خدت فحص كثير فحنا فكرنا طبعا بالتعاون مع وزارة التنمية الإدارية فى إنشاء هذا الخط الساخن لى يعنى إعطاء سرعة للمواطن فى سبيل إن هو يصل بشكواه إلى أقرب الطرق لشكواه خط تليفونى طبعا الغرض من هذا إن احنا مش بس ولكن أيضا عملية سرعة إنجاز البت فى شكوى المواطن يعنى لغاية دلوقتى الشكاوى الحقيقية التى تم مباشرة الإجراءات فيها تقريبا حوالى 550 لى 600 شكوى وكانوا طبعا أكثر من هذا
محمد صلاح : فى السنة يعنى ولا فى ايه ؟
المستشار تيمور مصطفى كامل : فى الشهرين دول هو أديله
محمد صلاح : هو ماكنش موجود من الاول؟
المستشار تيمور مصطفى كامل : أنا قلت لحضرتك دى فى ظل إستراتيجية تطوير العمل داخل النيابة الإدارية حتى تكون النيابة الإدارية فى خدمة الجمهور والمواطن ولتسهيل هذه الخدمة على المواطنين انشأنا هذا الخط الساخن وأنا كان عندى قناعة بإعتبار ان احنا دلوقتى فى القرن الواحد والعشرين لا يعقل بالمرة إن احنا ننتظر علشان تأتى شكوى بالطريق التقليدى وتاخد إجراءاتها ثم تحال فاحنا بدأنا فى إنشاء هذا الخط الساخن وطبعا الأثر
محمد صلاح : أكتر من 500 شكوى
المستشار تيمور مصطفى كامل : 650 شكوى تقريبا وتم تحولهم فعلا للنيابات المتصلة للتحقيق فيهم
محمد صلاح : تفرق ازايبين أنها جدية أو كيدية؟
المستشار تيمور مصطفى كامل : احنا دلوقتى حضرتك عملنا معيار معين لأن القائمين على هذا الخط من السادة الأعضاء الفنيين اللى هما ليس لديهم خبرة فنية ولكن لهم خبرة فى العمل الألكترونى فى حد ذاته وبالتالى يعنى أصبح مجموعة كبيرة بتعمل فى ساعات متأخرة من الليل لتلقى هذه الشكاوى لكن احنا أضفنا عليها حاجة جديدة وهى عملية ان بمجرد أن نتلقى الشكوى مباشرتا وتحال إلى الجهة المختصة بتتصل النيابة بالشاكى وتسمع شكواه مباشرتا قبل أن تسمع الجهة الإدارية فى الجزء الأخر كمان بيجي لنا شكاوى كثيرة لا تدخل فى إختصاص النيابة الإدارية فعندنا خدنا توجهين التوجه الأول هو ارسالها للجهة المختصة مثلا شكوى متعلقة ببعض رجال الشرطة شكوى متعلقة بأساتذة الجامعات بتحال طبعا الجهة المختصة لكن بنحاول دلوقتى نعمل فى الفترة القادمة عملية ان يبقى فيه تتبع سواء فى الجهات الأخرى اللى الشكاوى بتدخل فى خصائص النيابة الإدارية حتى نستطيع ان احنا نخطر المواطن ونتتبع سرعة الإنجاز لهذه الشكوى
محمد صلاح : يعنى حضرتك بيجيلك شكوى مش المفروض النيابة الإدارية هى اللى بتحقق فيها جهة أخرى بتحولها وتراجعها وترد على المواطن بعد كده
المستشار تيمور مصطفى كامل : وبعدين فى جزء آخر كمان لو فى الشكوى اللى بتأتى من المواطن نستطيع ان احنا يعنى نتصل بالجهة المختصة ونحاول ان احنا نعين المواطن على حلها وبنتدخل برده حتى نستطيع ان احنا نحل المشكلة
محمد صلاح : ايه هى نوعية الشكاوى؟ نماذج كده يا سيادة المستشار زى ايه يعنى؟
المستشار تيمور مصطفى كامل : يعنى حاجات متعددة فيه مثلا حاجات متعلقة بالإعتداء على أملاك الدولة
محمد صلاح : الحاجات دى تبعكم؟ هتناقش فيها حضرتك شايف أملاك الدولة ايه اللى بيحصل فيها؟ ايه تانى
المستشار تيمور مصطفى كامل : بردوا مسائل كثيرة متعلقة بالإدارة المحلية مسائل متعلقة بالإسكان مسائل متعلقة بردوا فى قطاعات الزراعة بردوا فى الحكم المحلى يعنى كل دى نوعيات مختلفة من المشاكل اللى بتعرض علينا
محمد صلاح : سيادة المستشار واحنا عندنا خريطة للفساد الإدارى فى الحكومة يعنى بمعنى ان هل فيه خريطة بحجم الفساد مثلا فى وجه قبلى خريطة نوعية فى الوجه البحرى بمعنى ان مؤسسات وزارات محليات؟
المستشار تيمور مصطفى كامل : يعنى حضرتك أنا عايز أقول ايه؟ طبعا لا شك ان عملية الفساد المالى والإدارى يعنى موجدوده على مستوى المرافق المختلفة ولذلك احنا بدأنا بتوجه جديد احنا بنعمل نيابات متخصصة حتى نستطيع ان احنا يكون على مستوى
محمد صلاح : داخل النيابة الإدارية؟ ازاييا فندم؟
المستشار تيمور مصطفى كامل : يعنى مثلا هنقول عملنا دلوقتى نيابة لوزارة الزراعة عملنا نيابة خاصة بالداخلية والخارجية عملنا نيابة خاصة بالأموال عملنا نيابة خاصة بالاعلام عملنا نيابة خاصة بالثقافة
محمد صلاح :الإعلام فيها حاجة اليومين دول ولا حاجة؟ علشان المنطقة اللى أنا فيها يعنى
المستشار تيمور مصطفى كامل : لأ أنا بدى لحضرتك على سبيل المثال عملية التوجه الجديد فى إستراتيجياتنا أننا بنعمل نيابات متخصصة حتى نستطيع أن نقف فى كل قطاع نبقى عارفين القسم دا بالظبط فبقت القضايا فى الجزء التانى عملية التخصص للأعضاء أنهم بيشتغلوا فيه هذا العمل فقط من خلال هذا بتقدر تطلعنا القضايا المتعلقة بالإهمال والتقصير الموجود ونوعية هذا التقصير الموجود ليه؟ لأن أنا دورى ليس فقط ان أنا أبحث عن مقصر لعقابه أو لتقديمه للمحاكمة ولكن أنا أعيد الجهاز الإدارى على إعطاء الحلول اللازمة والملاحظات التى يتستطيع من خلالها إن هو يواجه هذا التقصير أو القصور الموجود فى إدارة العملية الإدارية
محمد صلاح : أمتى المسألة يا سيادة المستشار تتحول إلى فساد يعنى بمعنى المقولة النبى قبل الهدية بقى وزمان كنا بنشوف فى الأفلام وعشنا يعنى الدرج مفتوح ويترمى فيه جنيه علشان الواحد يخلص مصلحة هو ال5 جنيه وال 10 جنيه زى اللى خد 20 ألف جنيه و 100 ألف جنيه؟ أصل فيه موظفين بيتفرجوا علينا
المستشار تيمور مصطفى كامل : فيه منظومة لمكافحة الفساد والفساد بيختلف حسب طبيعته غذا كان الفعل بشكل الجريمة الجنائية إذا كان رشوة وفيه حضرتك أخذ عطية واخد بالك إستيلاء على مال إذنا لازم نفرق بين نوعين
محمد صلاح : طب خلينا فى الرشوة دلوقتى بتحسبوها ازاى؟ ال10 جنيه زى ال100 ألف جنيه؟
المستشار تيمور مصطفى كامل : لأ أنا عاوز أقول ان إختصاصى أساسا هو عملية المسئولية التأديبية عن جرائم تأديبية وإدارية أما إذا كان الفعل يشكل جريمة جنائية دا يحال للنائب العام
محمد صلاح :حضرتك بتحولها بردوا؟
المستشار تيمور مصطفى كامل : أنا إحيلها بس طبعا عايز أقول المشكلة فى هذا المجال بتبقى حضرتك متوقفة على ان احنا عندنا فى قانون العقوبات مبدأ أسمه مبدأ صياغة الجريمة يعنى لا جريمة ولا عقوبة إلا بنص فإذن إختصاص النيابة العامة فى هذا المجال هو الجرائم الجنائية فقط يعنى أنا قد يكون إختصاصى أوسع لأن أنا ببحث عن كل إهمال وتقصير من أى شخص داخل جهة الإدارة ودا أللى عاوز أقول الفرق الكبير اللى بيخلى المسئولية الإدارية لها مفهوم أوسع من مفهوم الجريمة الجنائية
محمد صلاح :بمعنى يعنى ان لو حد فتح الدرج موظف ومواطن بيخلص مصلحة أنت هتاخد على الموظف ان قبل رشوة أو مش رشوة؟ حتى علشان تجازيه إداريا وتأديبيا المستشار تيمور مصطفى كامل : حضرتك بطبيعة المخالفة الموجودة وتكيفها القانونى إذا إعتبرت ان فعل يشكل فعلا خروج على مقتضيات الوظيفة يبقى فى الحالة دى أتخذ ضده أو سوف يبقى عليه جزاء بحسب طبيعة عاوز أقول أو جسامة الفعل المرتكب اما إذا كان الفعل يعنى واحد خد 20 ألف جنيه أو 30 ألف جنيه فخلاص المسألة دخلت فى طاقم العقوبات وطبعا هياخد إجرئه ويحال للنيابة العامة
محمد صلاح : هتسيبه ال30 جنيه وال 40 جنيه بتوع كل يوم
المستشار تيمور مصطفى كامل : ما هو دى متعلقة بى طبيعة الشكوى أو بالتحقيق اللى بيحالى واخد بال حضرتك فإذنا جسامة الفعل من عدمه يعنى مش عايزين برده يعنى نقول اللى بياخد 30 و 40 زى اللى بياخد 20 أو 50 أو مليون أو 2 مليون
محمد صلاح : بس بردوا ال20 دا غلط مش كده 20 جنيه يعنى أصل دا اللى بيحتك بالمواطن كل يوم يعنى كل واحد رايح يخلص مصلحة لازم
المستشار تيمور مصطفى كامل : لابد أن يكون هناك نوع من الحسم والوعى لدى المواطنين أولا والحسم والوعى أيضا لدى القائم بالعمل واحنا بنقول لابد من إتخاذ إجراءات أخرى بتبعد المواطن عن إن هو يتعرض لهذا الضغط من جانب المسئول فى سبيل إعطائه مبلغ معين من المال
محمد صلاح : الناس عايزة تخلص أحوالها هو بيلاقى دا السيستم بقى دا النظام فبيخلص حاله ويمشى
المستشار تيمور مصطفى كامل : احنا فى القرن الواحد والعشرين فحضرتك بنتكلم على ان هناك إتفاقية دولية لمكافحة الفساد إذا كنت أنا عايز أفعل هذه الإتفاقية لابد ان يكون عندى معاريين أساسيين المعيار الأول إختيار الشخص اللى هو بيقوم بأداء هذه الخدمة وايه هو كفاءته وأهليته للقيام بهذا العمل؟ أدى واحد والجحزء التانى برده ان المواطن يشعر عندما يطلب هذه الخدمة عند الطمأنينة والثقة فى التعامل مع الجهاز الإدارى دون أن يكون عليه ضغط
محمد صلاح : ما هو برده يا سيادة المستشار هتلاقى مبررات بتطلع سعاتها ان الموظف اللى بيقبل حاجة زى كده عشان المرتب بقى ضعيف ومحدش ملاحق
المستشار تيمور مصطفى كامل : بعد أذن حضرتك معلش يعنى أنا عايز أقول كلنا عايشين واخد بال حضرتك فى مجتمعات كثيرة وليست مصر فقط فى ان بنعانى من ان المرتبات محدودة إلى حد ما لكن عايز أقول برده هناك لابد ان يكون هناك بردوا مسئولية وحساب وعقاب إذا كنت هجيب من الأول موظف وبيعينه علشان هو عنده قناعة شخصية ما هو دى المشكلة حضرتك لإن أنا بضطر أعين أعداد كثيرة من الموظفين دون أن يكون عندهم الرغبة الحقيقية فى ان هو يقوم بهذا العمل ودا طبعا مجهود كبير من جانب وزارة التنمية الإدارية أنها تعمل يعنى تصور جديد للوظيفة العامة ومعايير جديدة بتقوم على أساس ان كيفية الإختيار وكيفية العمل على ان هناك معايير لحسن سير العمل وإنتظامه بإعتبار ان دى مرافق عامة لابد أنها تسير فى توافق وتقدم خدمة للمواطنين
محمد صلاح :أمور من اللى الناس بتعتبرها عيوب فى الجهاز الإدارى الحكومى زى المحسوبية الروتين البروقراطية طبعا دا بيؤدى إلى إعاقة العمل وتعطيل مصالح المواطنين بتحسبوها ازايبقى؟
المستشار تيمور مصطفى كامل : يعنى حضرتك طبعا مسألة الجديد وأنوا دا يعنى الجديد يعنى عمليه ليه يبقى فيه نيابة إدارية وليه النيابة الإدارية تقوم هى كجهة تحقيق بالقيام بمحاسبة المقصرين فى الجهاز الإدارى لأنوا أنا كرجل قضائى ليس ليا مصلحة بالمرة عندما يتعامل معى أحد العاملين بالجهاز الإدارى لدولة إذنا قواعد التحقيق وأصول التحقيق قواعد فنية فيها ضمانات فيها حيدا فدا بالتالى بحاول بقدر الإمكان أننا أبحث عن المسئولية الحقيقية للموظف دا الفرق بقى بينه وبين الجهاز الإدارى القائم بالتحقيق ان قد يكون لى أنا قريب من بعيد فبالتالى بيتدخل وبيأثر على التحقيق
محمد صلاح : أو المسئول اللى فوق مش عاوز يبين ان العملية خربانة عنده
المستشار تيمور مصطفى كامل : أنا عاوز أقول احنا فى منظومة هذه المنظومة احنا فى دولة مؤسسات فى دولة سيادة قانون فى دولة ديمقراطية عملية سير الديمقراطية فى نفس الوقت بتطلب أن يكون العمل الحكومى على قدر كبير من النزاهة والشفافية إذنا الجهاز الذى يقوم بمحاسبة العاملين فى الدولة يكون جهاز محايد وفى نفس الوقت فعال وهذه الفعالية تأتى من أن يكون هناك قدر كبير من الأهلية على القيام بالعمل أدى جزء والجزء التانى البحث عن المسئول الحقيقى سواء لمعاقبته أو لتقديمه للمحاكمة إذا كان الفعل بتاعه يشكل جريمة ويقتضى الحساب عليه
محمد صلاح : من الأمور برده اللى الناس بتتكلم فيها كتير وبتعتبرها من الفساد فيه الجهاز الإدارى مسألة التعيين مثلا فى الحكومة الوسايط بقى فى التعيين والإمتحانات الوهمية والإعلانات الوهمية يعنى بتتعمل إعلانات والناس إتعينت أصلا أو بعقود وهتتعين وكمان سيادة المستشار بردوا من بين اللى بيتكلم عليه الناس مسألة التقارير السنوية الدرجات اللى بياخدها الناس الإمتيازات وأنها مبتبقاش واقعية الناس ما بتشتغلش أو ما بتجيش ما بترحش وبتاخد الإمتياز بردوا علشان اسلوب الترقى أسلوب عقيم عندنا يعنى النيابة الإدارية لها أن تتدخل فى متابعة هذه الأمور ولا دى مسألة تتعلق بالجهاز الإدارى نفسه؟
المستشار تيمور مصطفى كامل : احنا طبعا بقول لحضرتك لينا دور أخر ليس فقط عملية القيام بالتحقيق أو فحص الشكاوى ولكن أيضا عملية إن أنا ازايأعين الجهاز الإدارى على ان هو يبتعد عن هذا القصور سواء فى عملية التعيين أو غيره من خلال ملاحظات
محمد صلاح : ازاي يا فندم؟ ما تدينى نموذج يعنى مقترحات عامة
المستشار تيمور مصطفى كامل : عندى قضية حضرتك حسيت ان هناك نوع من المحسوبية فى التعيين فأنا بقول والله ان فى الأخر أنتهيت إلى مجازاة بعمل بقى ملاحظات على ان طريقة التعيين فى حد ذاتها لأنوا المفروض ان إذا كنت أنا عامل مسابقة للتعيين بتقوم على أساس ان يكون هناك نوع من الشفافية
محمد صلاح : الأمور التنافسية متساوية للناس
المستشار تيمور مصطفى كامل : عايز أقول هناك توجه ومجهود كبير قامت بى وزارة التنمية الإدارية فى عملية مشروع جديد للوظيفة العامة وطبعا قواعد جديدة للإختيار الموظفين على أساس مسابقات وعلى أساس ان يكون فيه شروط معينة وآلية معينة للتعيين وللترقى وفى نفس الوقت بتبقى المعايير الجديدة دى فى مشروع القانو الجديد القايم على أساس الجدارة والإنصاف والآلية
محمد صلاح : ما هو دا كلام جميل يا فندم بس المهم ان يطبق
المستشار تيمور مصطفى كامل : أنا بقول مشروع قانون أنا طبعا يعنى بأثنى كثيرا على مجهود الدكتور أحمد دوريش اللى بذل مجهود كبير فى هذا عايز أقول إذا كنا احنا بنتكلم عن النهاردة دولة سيادة القانون لابد من حسن وإنتظام الإدراة لأن دا جزء من تحقيق عملية الحوكمة الحوكمة بتطلب ان يكون هناك جهاز إدارى سليم يقوم بإنتظام إذا قمنا بهذا يبقى فى هذه الحالة أنا أساسا ببعد عن ما هو يؤدى أو يصيب الوظيفة العامة من مخاطر ومن هنا عملية المحسوبية أو التعيين الجزء بردوا اللى يهمنى ان احنا بردوا عايشين فى مجتمع هذا المجتمع أولا بيتشكل من عايز أقول جهاز إدارى وحكومى وفيه مجتمع مدنى لابد ان المجتمع المدنى بردوا له دور كبير فى عملية الحس والتوعية لعملية التقليل ومكافحة هذا الإهمال والتقصير أو بمعنى أخر الفساد المالى أو الإدارى لأن دا له دور كبير وبقول ان يعنى هناك خطوات كثيرة إذا إتكلمنا من الناحية التشريعية على القوانين اللى هى فعلا ساهمت فى مكافحة الفساد لما كلمت حضرتك من شوية عن معاقبة بعض الجرائم الجنائية دا فى جزء لكن هناك إجراءات إدارية إتخذت بفعل فى بعض قوانين صدرت فى نظام الضرايب الرسوم الجمركية الأجهزة اللى انشأت لحماية المستهلك كل دى بتعطى نوع من الشفافية وحماية للخدمات بالأضافة للقرار اللى أصدره وزير التنمية الإدارية وانشأ لجنة للنزاهة والشفافية فى 2007 لتضع معايير للشفافية وتضع خطة وطنية وأخيرا قرار رئيس الوزارة اللى هو صدر فى 2010 اللى هو بإنشاء لجنة تنسيق لمكافحة الفساد ودا طبعا أولا علشان تفعيل الإتفاقية الدولية ولكن أيضا من ناحية أخرى عملية وضع خطة وطنية لمكافحة الفساد وبعدين بحث موائمة التشريعات مع هذه الإتفاقية الدولية وبعدين عملية الحس والوعى
محمد صلاح : ما هو الكلام دا كله جميل يا سيادة المستشار بس بردوا دا مرتبط بمستوى الموظف فى مصر الموظفون فى الأرض ناس غلابة أنا عارف ان دية خارج إطار النيابة الإدارية
المستشار تيمور مصطفى كامل : دا داخل الإطار
محمد صلاح : أنك ترفع مستوى الموظف؟
المستشار تيمور مصطفى كامل : أه أطالب طبعا
محمد صلاح : لازم مش كده علشان الناس غلابة أوى بصراحة يعنى طبعا دا مش مبرر الإنحراف أبدا بأى شكل لكن الواقع فى مصر ان الموظف فى مصر غلبان قوى المستشار تيمور مصطفى كامل : إذا كان حضرتك بتقول الموظف فى مصر مش حكاية غلبان معلش مش عايزين بردوا يعنى هذا الأسلوب معلش دى مش موجودة غير فى قاموسنا
محمد صلاح : لأ أنا قلت لحضرتك دا مش مبرر ان ينحرف لكن دا لا يغفل دور الحكومة فى إعادة النظر فى الرواتب أه صحيح زادت بس التضخم عمال يزيد
المستشار تيمور مصطفى كامل : حضرتك بردوا عندك عبء ثقيل يعنى أكبر دولة فيها موظفين يعنى فرنسا مفيهاش مليون ونص موظف يعنى عندنا 6 مليون
محمد صلاح : ما احنا شعب كتير أصلا
المستشار تيمور مصطفى كامل : ملقناش حاجة بس عايز أقول لحضرتك بردوا لابد ان نبدأ بقى فى إعادة سياسة التعليم وعملية التوجيه
محمد صلاح : والله العظيم تلاتة يا سيادة المستشار كل حد يجى يتكلم فى موضوع يقولك التعليم التعليم عندنا أه فعلا المشكلة فى التعليم من الأول من كى جى 1
المستشار تيمور مصطفى كامل : عاوزين نوصل بأنه يكون فيه حالتين إذا كانت الحكومة مسئولة عن التعليم وأنها تجد وظائف لابد إن الأشخاص يبقوا مسئولين وعاوزين نغير المفهوم اللى موجود فى الدول التانية لأن كل واحد بيعين فى أى مكان هو الذى يختاره وبعد كده يعنى بيحتاج إلى مرحلة إعداد وتكوين حتى يستطيع ان هو يستطيع أن يتقدم لهذا العمل سواء من خلال إعداد سابق أو من خلال مسابقة وبعدين فى حاجة تانية حضرتك بردوا عمل الموظف لا يتوقف بتعينه لابد ان احنا يبقى عندنا ثقافة فى التأهيل واحنا النهاردة فى القرن الواحد والعشرين بيتكلم فى تكنولوجية معلومات وتكنولوجية حديثة
محمد صلاح : وعندنا بقى الحكومة الذكية والحكومة الإلكترونية
المستشار تيمور مصطفى كامل : عايز أقول إذا الواقع العملى ومصر كمان بوضعها وكثافة السكان فيها بتطالب إن احنا نحط معايير موضوعية جيدة لعملية إختيار الموظفين وفى نفس الوقت أنا مش هوصل لعملية حل الفساد كامل لكن إلى عملية تقليل الفساد فساد منتظم يؤدى إلى إنتظام العمل داخل الجهة الإدارية
محمد صلاح : فتحنا موضوع الموظفين سيادة المستشار خلك معانا لسه الكلام مخلصش الموظفون فى الأرض سيادة المستشار معانا يعنى جمعنا أراء لبعض أخونا وأبناءنا من الموظفين فى مصر حوالين الموضوع اللى بنتكلم فيه نشوف وحضرتك تعلق عليع بعد كده؟
المستشار تيمور مصطفى كامل : تحت أمرك
محمد صلاح : نشوف الجماعة الموظفين دول أخبارهم ايه ؟
تقرير
مواطن : دلوقنى حاليا الأمور متلخبطة بتلاقى حاجات يعنى فرص بتتفاوت بيبقى فيها أقدميات يعنى واحد بقاله 20 سنة شغال تلاقى واحد شغال بقاله 10 سنين بتلاقيه خد فرصة مسك مدير المكان اللى هو فيه مع إن فيه ناس أقدم تستحق الكلام ده بس دا طبعا بيتم بالوساطة وبيتم بالمحسوبيات
مواطن: أنا اتأخرت فى الدرجة التالتة حوالى 3 سنين عن معيادى والحمد الله يعنى أشتكيت وإتكلمت كتير والحمد الله لحد ما ربنا شاء الأمور هتاخد الدرجة التانية بتاعتك وخدتها الحمد الله بس جت متأخرة بعد 3 سنين من ميعادى
مواطنة : الترقيات اللى بتتأخر كتير ديه والرسوب الوظيفى يعنى المفروض إن احنا واخدين الدرجة من سنة 2000 لغاية دلوقتى احنا مخدنهاش وبعدين الفروقات دى هتروح فين؟ المفروض فيه سنتين فرق بالنسبالنا وكده
مواطنة: أولا الترقيات مبتبقاش فى مواعيدها يعنى أنا بتمنى ان كل موظف ياد حقه ما يظلمش فى أى حاجة لأنوا الموظف خارجح يشتغل علشان عايز فوس وكده فهو مش ناقص ظلم يعنى فى البهدلة والخروج بس يعنى
مواطن: هى حسب المكان دلوقتى فيه متسلقين دون خبرة بيفضلوا يتوددوا للمديرين ومبيبقاش كفاءة فدلوقتى اللى بيتوددوا واللى بيقدموا تنازلات هما اللى واخدين حقهم إنمكا الموظف اللى هو السوى اللى ما بيمدش أيده مش واخد حقه
مواطن: لما يكون واحد بيستحق الترقية ولاحاجة ويجى واحد تانى ياخدها مكانه فدى بتبقى مشكلة بالنسبة لموظفين المفروض أى موظف بيجى عليه الترقية بتاعته المفروض ياخدها مش تضيع عليه لأن دى حرام دى حقه طبعا ساعات بتحصل مشاكل بين الرؤساء وبتاع بالنسبة لمشاكل الترقيات والكلام دا هو من حقه يرفع قواضى من حقه يعمل شكاوى يعمل اللى هو عاوزه ياخد حقه بالنسبة للترقية بتاعته
مواطن: والله الجهاز الإدارى عندنا هنا فى مصر كله تعبان روتين ما بعده روتين الموظف هنا الصضغير مظلوم والموظف الكبير ماشى كويس جدا جدا الصغير مظلوم خالص خالص تقولى تقارير سرية سرية ايه ؟ أم التقرير بتاعه وتكتب فيه وهو ما يعرفش إديله فرصة يدافع صح ولا أنا غلطان كل واحد ياخد حقه ويبقى فيه شوية شفافية وبدون ظلم للصغير قبل الكبير
محمد صلاح : واحدة من الأخوات اللى أتكلموا فى التقرير بتقول الناس مش ناقصة بهدلة واضح ان مسألة التقارير والترقيات مضايقة الموظفين قوى برغم اللى هيترقى هياخد كام يعنى؟ بس فى النهاية دا حقه
المستشار تيمور مصطفى كامل : طبعا التعليقات اللى جت من السادة اللى أتكلموا فى الحلقة بتدل على عملية الأقداميات وأنوا يعنى فيه هناك نوع من التحكم
محمد صلاح : يعنى الترقيات دى مش ماشية بإنتظام يعنى؟ يعنى الترقيات بتتم بالصدفة أو كل واحد وظروفه بقى
المستشار تيمور مصطفى كامل : لأ فيه قانون العاملين بالدولة حاطط قواعد لعملية الترقيات وللأقدميات المسألة متعلقة بأنوا السادة الموظفين اللى بيشكوا من العنت اللى بيحصل فى عملية ترقياتهم إذا كان فى تقرير قدم وهو عاوز أقول غير راضى عنه فعنده الوسيلة للتضرر من فى ميعاد معين وعنده المحكمة بعد كده علشان يتظلم فى ميعاد معين
محمد صلاح : بس أنت معايا يا سيادة المستشار ان الناس مش فاهمة قصة الخط الساخن يمكن علشان جديدج والشكاوى للنيابة الإدارية يعنى فيه بردوا أخ من اللى ظهروا فى التقرير بيقولك راح أشتكى فى المصلحة نفسها مشتكاش فى النيابة
المستشار تيمور مصطفى كامل : بغض النظر ما هو من حقه إن هو يلجأ للجهة الإدارية حتى يقدم شكواه لكن عايز أقول الفرق ان هو لما بيجى بيلجأ للنيابة الإدارية سواء عن طريق شكوى عادية أو عن طريق الخط الساخن يبقى احنا فى الحالة دى بنتخذ الإجراءات المناسبة وبنتعامل مع هذه الشكوى لمعرفة أسباب إهمال الجهة الإدارية فيها حتى نستطيع فى نفس الوقت إذا كان هنا عاوز أقول يعنى أى إجراء هياخدوا قدام المحكمة أو أى إجراء أخر فاحنا يعنى بنوصىى الجهة الإدارية أنها تقوم بهذا الإجراء
محمد صلاح : يعنى يا جماعة اللى مترقاش والى حاسس ان إتظلم الخط الساخن قدامكم والنيابة الإدارية أشتكوا على طول
المستشار تيمور مصطفى كامل : يعنى عايز أقول لحضرتك بردوا فى حاجة أسمها قانون بيحكمه فى كل جهة فيها قانون بيحكمها سواء بالنسبة للتوظف سواء بالنسبة للترقيات سواء بالنسبة للأقدميات لابد ان للحد الأدنى
محمد صلاح : قولى يا سيادة المستشار دلوقتى لومصلحة حكومية صدر ضدها حكم من موظف غليان ما بتنفذهوش
المستشار تيمور مصطفى كامل : لا لا لأ بيتنفذ من من هيئة قضائية ؟طب ما بعد كده برفع عوى تنفيذ ودى ممكن تعرض
محمد صلاح : مين اللى يتعرض بقى المسئول فى المصلحة؟
المستشار تيمور مصطفى كامل : أه طبعا لأ لازم يتنفذ الحكم مفيش حاجة أسمها عدم تنفيذ أحكام دى مسألة فيها خروج صارخ على الشرعية وعلى حكم القانون
محمد صلاح : يعنى أنتم بتابعوا بردوا لو موظف خد حكم على
المستشار تيمور مصطفى كامل : هو بيلجأ لنا كشكوى جديدة لكن أنا عاوز أقول لابد ان احنا ننطلق من مفهوم هى ايه وجهات النظر وهى ايه مسئولياته؟ إذا كان هو ليه واجبات من الجهة الإدارة اللى هى حصل تقصير لابد يبقى عارف كيف أواجه ذلك بشكوى ولمن ومن المختص؟ عاوز أقول بردوا يمكن عاوزين نعمل برنامج عام حضرتك من خلال الإعلام من خلال الصحافة من خلال حصر الجهة الإدارية يعنى لتعريف العاملين بواجباتهم ومسئولياتهم وواجبات الإدارة تجاه موظفنها أدى حاجة والجزء التانى عاوز أقول ايه سياسة الحس والوعى بصفة مستمرة هتؤدى المجتمع المدنى أنها بتقول والله للناس بعملكم برامج علشان تعرفوا حقوقم تعرفوا واجباتكم ايه المفروض اللى تقوم بيه ودا بقول ان إذا كنا بنبحث عن تطبيق حقيقى للحوكمة لابد من سياسة وعى وحس لدى المواطنين والعاملين كمان
محمد صلاح : علشان كل واحد يعرف حقوقه وواجباته
المستشار تيمور مصطفى كامل : بالظبط حضرتك يعنى يعنى أنا النهاردة واحد فى النيابة الإدارية بيجيلى احنا دلوقتى بنعمل كتيب صغير نعرف بيه النيابة الإدارية ونقول للمواطن ازاييلجأ لنا
محمد صلاح : كويس ان أنت أثرت النقطة دية لأنوا فعلا الناس محتاجة أنها تعرف معلومات عن النيابة الإدارية وكيفية اللجوء إليها واللى ممكن لو أشتكت لكن مرتبط بس بالتقرير واحد من الأخوة أتكلم وقال ان الموظف الصغير تعبان الموظف الكبير مستريح يعنى
محمد صلاح : هو فين قانون من أين لك هذا؟ موجود لسه
المستشار تيمور مصطفى كامل : ما هو الكسب الغير مشروع موجود حضرتك
محمد صلاح : أه وفيه المفروض الموظف العام بيعمل إقرار ذمة مالية أول ما بيتعين والمفروض ان كل 4 أو 5 سنين بيقول اللة حصله والتطورات المالية وكده بتابعوا الحكاية دى بقى؟
المستشار تيمور مصطفى كامل : فيه حاجة أسمها جهاز الكسب الغير مشروع
محمد صلاح : يعنى لو واحد موظف بعد 5 ، 6 سنين فجأ بقى عنده حتة فى مارينا وحتة فى التجمع الخامس
المستشار تيمور مصطفى كامل : أنا بقول لحضرتك كل هذا داخل فى إختصاص جهاز الكسب الغير مشروع لسه احنا ما وصلناش فى النيابة الإدارية نعمل نيابة كسب غير مشروع بنحاول فى الفترة دى
محمد صلاح : وهتعملوها يعنى؟ أعملوها ضرورى والله
المستشار تيمور مصطفى كامل : بنحاول نعمل نيابة كسب غير مشروع علشان بردوا نستطيع ان احنا ننجز شوية فى هذه العملية فى إعانة المواطنين فى مكافحة هذا التقصير والإهمال والفساد المالى والإدارى ما هو دا برده بيشكل بردوا ما إحترامى أنا بقول حدود المسئولية الإدارية إذا كان الفعل جريمة جنائية فدا على طول بيحال إلى النيابة العامة وتأخذ شأنها فى التحقيق وإحالتها إلى المحكمة الجنائية
محمد صلاح : سيادة المستشار عندى سؤال يتعلق بطبيعة النيابة الإدارية أنت عارف من كام سنة لما بدأ التحول نحو الإقتصاد الحر ثارت دعاوى ومطالب بإلغاء الأجهزة الرقابية ومنها النيابة الإدارية والرقابة الإدارية وإتقال كلام ان النيابة الإدارية والرقابة الإدارية وغيرها يعنى من الهيئات الرقابية كانت ضرورية فى المجتمع الإشتراكى على أساس ان الجهاز الإدارى لدولة الدولة متحكمة وفيها ومسيطرة هو الجهاز الأساسى اللى بيتحكم فيه الأمور الإدارية فيه البلد وإن المجتمع الليبراتلى والإقتصاد الحر مش محتاج الحكاية دى ايه رأيك فى الكلام ده؟ لأنوا بردوا بقى فيه نغمة فى اليومين دول بتتكلم فى الحكاية دى بردوا
المستشار تيمور مصطفى كامل : لأ بس عايز أقول لحضرتك بردوا علشان نقول ان يعنى إذا كنا احنا بنتكلم عن شفافية ونزاهة يبقى إذنا الشفافية النزاهة تتعلق بالجهاز الإدارى بيشكل كام هذا الجهاز الإدارى داخل هذا المجتمع؟ ك85 أو 80 مليون دا جزء الحاجة التانية ايه هى الضمانات اللى موجودة فيه الأنظمة الإدارية الحالية اللى هى بتستطيع أنها تعطى يعنى عايز أقول ضمانات للقيام بتحقيق أنا عندى ضمان إن أنا ليا قضية أدى واحد الحاجة التانية عندى ضمانات حيدا وإستقلال عندما أقوم بعملى والحاجة التانية كمان إذا كانت الجهة الإدارية هى بتقوم بالتحقيق الإدارى لكن ممكن يحدث نوع من التأثير على القائمين بهذا التحقيق لكن الجزء التانى كمان أنا عندما بقوم بالتحقيق لا أتقيد بتكليف الجهة الإدارية ببحث عن التكليف القانونى الصحيح للوقائع
محمد صلاح : ما هى يا فندم بردوا تتعلق بثقة الناس فى القضاء مش كده الناس تثق فيك أنت أكتر مكا تثق فى المدير الفلانى أو رئيس مجلس الإدارة الفلانى
المستشار تيمور مصطفى كامل : وبعدين الحاجة التانية وأنا بحقق لا أقف عند الوقائع الواردة فى البلاغ لكن ببحث عن كل الإهمال بصفة عامة اللى موجود أو إذا كان هناك تقصير مالى وإدارى فى الواقع الحاجة التانية أنا بأساهم فى عملية أن يكون هناك عدالة ناجزة من خلال التحقيقات اللى بقوم بها ونفس الوقت المبدأ اللى بقول عليه وهو مبدأ الحوكمة وعملية مبدأ النزاهة والشفافية المتطلبة فى العمل الإدارى احنا وقعنا مع كلية الحقوق جامعة القاهرة الأسبوع الماضى بروتوكول تعاون لإنشاء دبلوم فى عمل النيابة الإدارية والمحاكمات التأديبية القصد منه هو ليس فقط الشخص عندما يلتحق بالنيابة الإدارية لابد ان يكون هو حصل على الدبلوم ولكن لرفع الكفاءة داخل النيابة الإدارية من خلال ان هيكون عملية الترقية فى حد ذاتها الإستثنائية عن طريق الحاصلين على هذه الدبلومات ودى الدراسة اللى أنا بقول حتى تصلح لنائب رئيس عندنا
محمد صلاح : سيادة المستشار بتواجهك مشاكل بتتعلق بالثقافة العامة عند الناس أنها بدأت تتقبل مسألة الرشوة ما بقتش يعنى بتعتبرها فى بعض الأحيان فهلوة وغياب الضمير شوية عن البعض نتيجة الظروف الإجتماعية بتواجهك الحكاية دى؟ حاسس بقلق ناحيتها يعنى؟ حاسس ان الثقافة العامة بتاعة الناس لو كان أفضل من كده لو فيه تدين حقيقيى مش متاجرة بالدين لو فيه تعليم حقيقة كان هيبقى شغلك أسهل من كده
المستشار تيمور مصطفى كامل : لأ ما أنا عايز أقول معلشيعنى ظاهرة التفشى عايز أقول مسألة الفساد مش فيه مجتمعنا بس وعلى فكرة أنا إشتغلت فى كثير من الدول الأفريقية بصفة عادية يعنى
محمد صلاح : يعنى احنا نحمد ربنا ونقول الحمد الله
المستشار تيمور مصطفى كامل : لأ معلش بردوا مش هنقول نحمد ربنا أنا عاوز أقول ايه ؟ ان نقل مجتمع يعنى عايز أقول فيه نوع من البحث عن وسائل غير مشروعة للحصول على المال إلى مجتمع عايز أقول نزيه كليتا دى مسألة صعبة لكن بقول هناك خطوات فعلا جديا وموجودة ودى هتكتمل بردوا من خلال عايز أقول تفعيل الإتفاقية الدولية المجتمع المدنى نمرة 2 الجزء التالت عملية وضع معايير جديدة لإختيار الموظفين والعاملين والجزء التالت كمان دور المجتمع المدنى فى الحس والثقافة وكمان عاوز أقول ايه ؟ إن أنا أخرج القاضى من ذوبقة العمل فى حد ذاته وأعطيله ثقافة جديدة بقى متعلقة بحقوق الأنسان متعلقة بالشفافية متعلقة بمكافحة الفساد وفى نفس الوقت لابد ان هو يبقى فيه الإختيار الحقيقى ليس فقط الموظف وعاوز أقول كمان على مستوى المسئوليات العليا لابد أن يكون هناك معايير معينة يستطيع منها الشخص اللى موجود فى هذا المكان إن هو عنده فعلا قدرات حقيقية على مواجهة هذه المشاكل لأن احنا فى مجتمع عاوز أقول أصبح فيه النهاردة أنترنت وأصبحت الوسائل مفتوحة
محمد صلاح : فى تقرير كدجه عملناه مع أبناءنا فى الشارع المصرى حوالين الرشوة والفساد والحاجات نشوف حضرتك وتعلق عليه؟
المستشار تيمور مصطفى كامل : تأمر يا فندم
محمد صلاح : نشوف أخوانا فى الشارع بيقول ايه على الكلام دا يعنى
تقرير
مواطنة : دلوقتى دايما أى مصلحة حكومية ما بتمشيش أصلا إلا بالفلوس لأن أصلا الموظفين ما بياخدوش مرتب يكفيهم فالبالتالى بيحسوا ان هما أصلا مش قادرين يأدوا الخدمة أحسن ليه لأنوا المرتب لو هو أصلا بيكفيهم ما كنوش أصلا هيبصوا ان هما ياخدوا فلوس أو يخلصوا مصلحة الناس أى مصلحة حكومية أنت بتروحها إن ما كنتش بتدفع فلوس ما بتمشيش مصلحتك
مواطن: كنت رايح أخلص مصلحة فى جهة حكومية بصيت لقيت الموظف قالى يعنى بمعنى أصح دوسيه خاص بيا فى جهة من الجهات الحكومية فبصيت لقيت الموظف قاللى والله هو مش موجود دلوقتى الدوسيه مش موجود دلوقتى فجت ماشى قبلينى واحد قاللى أنت خلصت معاه قلتله لا والله أنا مش فاهم يعنى خلصت معاه ايه ؟ قالى يا عم أنت خلص نفسك فدفعتله فدانى شهادة البيانات بتاعتى
مواطن: نسبة كبيرة جدا جدا من أى حد بيقضى مصالحه لازم يتم فيها حكاية رشوة ومش زى زمان أى واحد بيتوجه إلى أى مصلحة حكومية لزما يدفع أى شيئا كان علشان يقضى المصلحة بتاعته إن ما كنتش كده ممكن يقف يوم وأتنين وتلاتة
مواطن: بيحاول ان هو يأخرك ويخنقك ويقولك أقف فى الطابور أقف فى الطابور ازاييا عم؟ ماشى هقف فى الطابور بس خلصنى تلاقى مثلا ماسك الأستاذ اللى قدامه يقعد قدامه ساعة يشربله كوباية شاى مش عارف ايه فيه ناس بتبقى عندها ضمير
مواطن: فى ناس بيبقى موضوع الرشاوى دا فى دمهم هنعمل ايه فيهم مافيش فايدة؟ هما أهم حاجة عايزين يركبوا عربيات عايزين يبقى ليهم أرصدة فى البنوك بأى طريقة
مواطن: أه لازم تدفع فلوس ولو ما دفعتش فلوس هيفضل يبعتك للدور ده والدور ده وتعال بكرة وتعال بعده فلازم تدفع فلوس علشان تخلص المصلحة
محمد صلاح : ايه رأيك يا سيادة المستشار؟
المستشار تيمور مصطفى كامل : يعنى طبعا لابد ان يكون عندنا شجاعة أدبية نعترف ان فعلا يعنى عايز أقول هناك قصور فى الجهاز الإدارى لوجود يعنى بقول حفنة من الموظفين يعنى سولت لهم أنفسهم إن هما يعنى يقوموا بنوع من الضغط واخد بال حضرتك على المواطن رغم أعبائه الكثيرة لكن زى ما قلت لحضرتك ان عملية الإصلاح الحقيقى لم تأتى فقط ان الدولة تقوم بعملية تشريعات وبتقوم بإصلاحات إدارية لكن بردوا عايز أقول ايه ؟ لابد أن يكون المواطن عنده الوعى الكافى وفى نفس الوقت عاوز أقول ايه ؟ ليه قلنا الخط الساخن؟
محمد صلاح : هيطلع تانى على الشاشة
المستشار تيمور مصطفى كامل : واحد بيقدم شكوى بهذه الصورة الإدارية احنا هنقوم بتحقيق كامل مع الجهة اللى هى فيها الموظف ده
محمد صلاح : دا تطور مذهل على فكرة
المستشار تيمور مصطفى كامل : ما هو بقول لحضرتك ليه فيه مشكلة عاوزين نبعد التعاون ما بين المواطن والجهة الإدارية
محمد صلاح : ويلاقى حد بيثق فيه ميرحش لرئيسه يشتكيه
المستشار تيمور مصطفى كامل : علشان كده احنا قلنا حاجتين مسألة السرية التامة بس طبعا بتحقق ان الشخص اللى بيقدم الشكوى جدى هذا جزء والجزء التانى الهام ان أنا ببعد عن الشاكى عاوز أقول ايه كافة البيروقراطية اللى موجودة حتى يستطيع ان هو يحخصل على حقه أو المصلحة اللى هو يسعى إليها لكن زى ما بقول لحضرتك مش هننتقل من حالة فوضى كاملة إلى حالة إنتظام كامل
محمد صلاح : مرة واحدة لأ محتاجة تدرج شوية بس المهم أعمل اللى عليك بقى يعغنى المواطن يعمل اللى عليه
المستشار تيمور مصطفى كامل : المواطن لابد أن يشعر ويكون عندوا الإحساس ان عندنما يتقدم للجهة الإدارية بخدمة فهذا حقا له طبيعى لابد ان هو يحصل عليه أدى جزء الجزء التانى يكون عندوا الشجاعة والقدرة ان هو يتقدم بالشكوى لأى جهة واخد بال حضرتك حتى يستطيع ان هو يقف بجهة الإدارة إن هى تعدل عن هذا الموقف
محمد صلاح : أنا عندى شكوى على النيابة الإدارية حملهالى عدد من أبناءنا المواطنين قبل ما حضرتك تتولى رئاسة النيابة الإدارية كان يثار مشكلة تتعلق بالتعينات فى النيابة الإدارية حضرتك أكيد تابعتها
المستشار تيمور مصطفى كامل : أنا ما كنتش فى مصر لكن تابعتها
محمد صلاح : تابعتها وصلنا لى ايه ؟ ان ناس كان من حقها تدخل ما دخلتش ناس راحت لجأت للقضاء فصدر لها قرارات وناس غضبانة وناس زعلانة وأبناء مستشارين بردوا فى القضا وأبناء مش مستشارين فى القضا وصلنا لايه فى قصة التعيين فى هيئة النيابة الإدارية؟
المستشار تيمور مصطفى كامل : لأ معلش بردوا مش عاوزين فيه إعلانات وبتاع حضتك لا تتصور عدد اللى بيتقدموا للنيابة الإدارية
محمد صلاح : مكان حلو ومحترم وبيدى بردوا فلوس كويسة وبرستيج وجو يعنى وظيفة حلوة يعنى
المستشار تيمور مصطفى كامل : مقلناش حاجة هذه الهيئة بتقوم على قيم وتقاليد أولا وبعد كده كفاءة فنية دول الجزئين أللى أنا بركز عليهم عندما بتوضع شروط التعيين وبعد كده بيتقدموا الخريجين بيتقدموا للمسابقة طبقا للشروط وبعد كده بنفحص الطلبات بتاعتهم وبعد كده بيتقدموا لإمتحانات وبعد كده بيجتازوا هذه الإمتحانات لكن اللى حاصل ان فيه صعوبة كبيرة لما يكون أنا عندى 300 وظيفة وأنا متقدملى 6000 واحد لأ حضرتك بس علشان نتكلم بموضوعية طيب حاجتين عندى باخد أولا معيار التقدير لكن المسألة فى التقدير هى دى المشكلة عانينا منها فى الفترات السابقة جيد جدا جامعة القاهرة يستوى مع جيد جدا خريج جامعة إقليمية لسه منشأة
محمد صلاح : مش دا دارس حقوق ودا دارس حقوق؟
المستشار تيمور مصطفى كامل : دا دارس حقوق بس المشكلة بقى فى المستوى فى الجامعات يعنى إستحالة حضرتك لا يعقل عندى حاجة تانية بقى إدارة جديدة عندى سيدات وأبناء خريجين حاجة أسمها فيدير اللى هى الفرانكفون والفرنجفون فى الجامعات المصرية سواء فى إسكندرية عين شمس القاهرة أسيوط ودول بياخدوا دبلوم حقوق باللغة الفرنسية أو باللغة الأنجليزية هذا الدبلوم يعادل 4 مرات دبلوم كلية الحقوق العادى
محمد صلاح : بتبقى ليه الأفضليه على اللى معاه ليسانس حقوق العادى
المستشار تيمور مصطفى كامل : مشكلته بقى فى ايه فى ان تقدير دول لا يتجاوز بالمرة يعنى فى الأنجليزى ممكن يكون فيه جيد جدا الجامعة الفرنساويين عاملين معايير باريس فمعايير باريس اللى واخد جيد يساوى عندى هنا إمتياز فدول بقى حظهم يبقى أزاى؟ فاحنا دلوقتى بنعيد المنظومة الجديدة فى عملية التعيين علشان يبقى فيه شروط جديدة للتعيين عن طريق دبلوم أولا بعد الليسانس للتأهيل للعمل وبعد كده يبقى فيه مسابقة وبعد كده يبقى فيه إمتحان لا يشتمل فقط على الموضوعات التقليدية التى يدرسها فى الجامعة ولكن أيضا موضوعات تتعلق بالثقافة العامة تتعلق بحقوق الأنسان
محمد صلاح : يعنى زى ما قلت حضرتك عامل نيابة متخصصة للإعلام وللثقافة وللطرق والكبارى فلابد ان يبقى عندوا ثقافة عامة
المستشار تيمور مصطفى كامل : إذنا من خلال هذا هيبقى عندى إختيار جيد للأعضاء وقلت ان يعنى هنراعى دلوقتى نعمل ايه كلية الحقوق فيها كام واحد؟ يبقى ناخد منها كام كلية عين شمس كام؟ يبقى ناخد منها كام؟ هعمل نوع من العدالة النسبية فى عملية الإختيار
محمد صلاح : سيادة المستشار لو جتلك شكوى على الخط الساخن من وزير فى الحكومة بتحققه فيها؟
المستشار تيمور مصطفى كامل : فيه إجراءات القانون عينها والدستور بأن هو ايه الإجراءات اللى تتبع ضده علشان أستطيع أمارس فى حياله التحقيق أو المساءلة واخد بال حضرتك زى بالظبط البرلمان لما يبقى فيه مسئولية على وزير بيبقى فيه إجراءات معينة نص عليها عاوز أقول قانون البرلمان فى عملية الإستجواب والمساءلة وغيره بس أنا عندى لست مسئولا أيضا عن إجراء أى تحقيق
محمد صلاح : من الوزير إلى غفير الوزير لو فيه غفير موظف فى وزلرة مش كده؟
المستشار تيمور مصطفى كامل : هيبقى بقى ساعى أى حاجة
محمد صلاح : أه من الساعى إلى وكيل الوزارة على الخط الساخن اللى ظهر أكتر من مرة أمام حضراتكم يمكنكم الشكوى إلى هيئة النيابة الإدارية على المواطن ان يعرف حقوقه زى ما الناس بتطالب كل مواطن بإداء واجباته وقال رئيس هيئة النيابة الإدارية المستشار تيمور مصطفى كامل كلامه معانا النهاردة كان كلام جميل كلام معقول أكيد كا كلام مسئول خلص الكلام سلام نلتقى فى الحلقة المقبلة.


انقر هنا لقراءة الخبر من مصدره.