حديث المدينة

سألت وزير صحة مصر أزي صحة مصر وقد أجاب الرجل وفتح قلبه واكتشفت من خلال ما يعانيه أن هناك أمراض أخرى يخشاها في مصر منها عدم الوعي منها اللا مبالاة منها الجهل منها تقبل أي شئ دون غربلة، منها الإحساس بالقدوم وبالإقبال على نوعية من الدواء تفسد حياته وتسممه وقد تقتله، سألت وزير صحة مصر عن صحة مصر فاكتشفت من خلال الحوار أن الناس في مصر أيضا لهم ضلع فيما يمكن أن تصل إليه هذه المعادلة الطبية والصحية ، سألته عن الصيدلة وعن طريقة أخدنا للأدوية، سألته لماذا يذهب الناس إلى أوروبا بحثا عن مستشفى نظيف ومحترم وممرضة أكثر إحتراما ،سألته وأجاب في حديث المدينة
مفيد فوزي : موقف الدولة ايه من زيادة أعداد المرضى بفيروس "سي"
د.حاتم الجبلي : شوف الدولة عملت في آخر 4 سنيين اللي ماعملتوش في تاريخها ، عملت 3 حاجات ..شكلت لجنة قومية يرأسها د. وحيد دوس وفي 4 أساتذة مصريين بجانبه و2 أجانب ضمانا للحيدة وحطت استراتيجية قومية لمقاومة الفيروسات الكبدية بصفة عامة ودي كانت الخطوة رقم 1 ، الخطوة رقم 2 من خلالها بدأنا نعالج المواطنين بالإنترفيرون ، احنا بنصرف كل طلعة شمس 2.2 مليون جنيه علاج بالإنترفيرون كل طلعة شمس
مفيد فوزي : هل هو العلاج الناجح نهائيا؟
د.حاتم الجبلي :هو الوحيد المتاح دلوقت
مفيد فوزي : ده مستورد؟
د.حاتم الجبلي : آه مستورد ، عندنا الاتنين ،عندنا 80% منه مستورد و 20 % منه الحقيقة في شركة محلية الحقيقة نتائجها مجربين على 20 ألف مريض نتائجها شكلها كويس يعني لسه معنديش النتائج النهائية
مفيد فوزي : هل في بزنس دخل في الحكاية دى تورط فيه دكاترة وأساتذة عظام؟
د.حاتم الجبلي : يوه ه ه طبعا من غير منقول أسماء
مفيد فوزي : مش عايز أقول أسماء
د.حاتم الجبلي : إنما طبعا
مفيد فوزي : دخلوه ليه البزنس ده؟
د.حاتم الجبلي : الشركات بتصرف
مفيد فوزي : هل هي نفس بشرية؟
د.حاتم الجبلي : يا أستاذ مفيد شركات الأدوية دي يعني ما شاء الله شركات غنية جدا وعايزة تبيع منتج زي أي منتج
مفيد فوزي : خليني أسأل سؤال آخر هل شركات الأدوية أحيانا بتلعب لعبة..أقولها أزاي .. خليه تجرح هل بتخش في منحي سياسي؟
د.حاتم الجبلي : يجوز مش منحى سياسي لكن بتخش في منحى تجاري، تجاري ربما في بعض الأحيان يتعدى على مصلحة المريض
مفيد فوزي :ربما يتعدى على مصلحة المريض!
د.حاتم الجبلي : آه في دوايين في العالم اتوقفوا عندنا واتوقفوا في العالم بعد ما استخدموا فترة طويلة من الزمن ليه لأنه ثبت أن لهم آثار جانبية سيئة لكن الدعاية للأدوية دي كانت في القمة
مفيد فوزي :حضرتك لما لغيت قائمة من الأدوية هل كان لديك البديل قبل الإلغاء؟
د.حاتم الجبلي :إلغاء واللا خفضت الأسعار؟
مفيد فوزي :لأ باتكلم على اللي لغيته قلت ده محظور؟
د.حاتم الجبلي : لآ ده محظور دول عندي بدائل طبعا
مفيد فوزي :في بدائل؟
د.حاتم الجبلي : آه طبعا أمال ايه
مفيد فوزي :في إعلام الناس بهذه البدائل؟
د.حاتم الجبلي : عندنا بنزل احنا الإعلان وبنقول للناس دي البدائل لكن ارجعوا للطبيب عشان يختار لكوا أفضل بديل ،لأن احنا برده متقدرش تقوله آدي ال 6 دول لأن كل جسم بيتفاعل مع الدوا بطريقة مختلفة ، فاحنا بنقوله دايما ارجع للطبيب يقولك ايه أحسن بديل من البدائل المتاحة دي
مفيد فوزي :عملية التخفيض؟
د.حاتم الجبلي : تخفيض الدوا
مفيد فوزي :آه كان هاجسه ايه عند حضرتك؟
د.حاتم الجبلي : بص احنا أنشأنا وحدة لمتابعة تسعير الدوا في العالم عندنا هنا في الوزارة فأي دولة في العالم بتخفض سعر دوا بناخد الريبورت بتاعها وبنشوف خفضته ليه وما دام مستوى المعيشة فيها أعلى منا فبنخفضه احنا بنفس الدرجة
مفيد فوزي :عايز أقولك على اعتراف شخصي وأرجوك تنتقدني اذا كان هذا في بعض الأحيان أنا ألجأ لدواء أجيبه معايا من ألمانيا
د.حاتم الجبلي : يقولك أصل المصري مش فاعل، مش كده
مفيد فوزي :آه
د.حاتم الجبلي : شوف الكلمة دي الحقيقة
مفيد فوزي : وأنا لا أشك إطلاقا في مصريتك لكن أرجوك أن تكون شديد الموضوعية لأن المحتوى بتاع الدوا هو لا يكون بنفس الدرجة بتاع الدوا الألماني وإلا نبقى
د.حاتم الجبلي : خليني أرد عليك رد منطقي عشان أقنعك
مفيد فوزي : وأنا مصغي لك
د.حاتم الجبلي : أول حاجة احنا بنصدر دوا لسبعين دولة فالدوا بتاعنا بيخش في اختبارات معملية في السبعين دولة دولا بيشوفوا اذا كان الدوا ده فاعل واللا غير فاعل دي الخطوة الأولى، الخطوة التانية أنا لما سمعت الكلام ده في 2006 اتفقت مع أحد المعامل المتخصصة في فرنسا وبعتلها عينة عشوائية لميناها من الصيدليات وبعتناها مفيش غير دوايين فقط هما اللي طلعوا مش مطابقين من أكتر من 100 دوا ، إنما خلينا بقى نتكلم عن السياسة فاحنا عشان نضمن متبقاش القضية مرتبطة بوجودي أنا أو من سيأتي بعدي قلنا لازم المصانع تلتزم بالجودة فحطينا اشتراطات الجودة حاجة اسمها " G M P " أو جودة ممارسة التصنيع الجيد وبعتناها لكل الشركات، في شركات ملتزمة بيها من زمان وفي شركات مكنتش ملتزمة وقلنا لهم احنا حنفتش عليكوا اللي حنلاقيه مش ملتزم حنقفل خطوط الإنتاج وفعلا قفلنا خطوط إنتاج حكومية وخاصة ، الشركات ابتدت تصحصح فطلعنا قرار وزاري جديد قلنا أي مصنع دوا بحلول 2020 لا يحصل على إعتماد دولي سواء من F D Aأو كبديل له الاتحاد الأوربي أو الياباني أو الإعتماد الإسترالي حنوقف الإنتاج بتاعه في البلد حنوقفه تماما، فالمصانع بقى خايفة على نفسها فراحوا من خلال الوزارة هنا تعاقدوا مع حاجة اسمها "Irish medical board" ده انت عارف في ايرلندا 40% من الدوا بيتصدر لكن لازم ياخد الإعتماد ده ، فجم بعد كفاح بعد سنة وافقوا
مفيد فوزي: هل نجحت زراعة الكبد في مصر
د.حاتم الجبلي : آه جدا جدا
مفيد فوزي: يعني السؤال هو الجسم ماعدش يبرفض هذا الجهاز الجديد
د.حاتم الجبلي : شوف احنا بدأنا زراعة الكبد في مصر في 2001 النهاردة احنا عندنا ما لا يقل عن 800 حالة وعندنا 10 مراكز مفيش حد في المنطقة ولا في أفريقيا ولا دول كثير من العالم عندها هذه الخبرة خاصة إن احنا بننقل من متبرع حي ما بننقلش.. ، لسه القانون الجديد لا يسمح من واحد حديث الوفاة لكن احنا كل اللي بنعمله من متبرع حي ، المشكلة في زراعة الكبد
مفيد فوزي: يعني ايه متبرع حي؟
د.حاتم الجبلي : بياخدو الفص اليمين
مفيد فوزي: ويقدر يعيش بالفص الشمال؟
د.حاتم الجبلي : الكبد يكون كبد كامل جديد خلال 6 شهور ، حضرتك لما تعمل له سونار أو أشعة مقطعية متكتشفش أنه ده كان زارع كبد ، اتاخد منه نص الكبد بتاعه
مفيد فوزي: اللي متاخد منه ده بيدفع له فلوس واللا متبرع
د.حاتم الجبلي : لأ المفروض يبقى متبرع
مفيد فوزي: ده لأبنه واللا مراته
د.حاتم الجبلي : القانون الجديد ده بقى لا يسمح بموضوع الفلوس ده خالص خالص
مفيد فوزي: مفيش مساومة
د.حاتم الجبلي : عارف في القانون الجديد لو واحد ثبت أنه واخد فلوس يتسجن ، وعارف لو كان المتبرع اللي هو واخد فوس لو مات الوسيط في هذه العملية يعدم وبعدين الحقيقة يعني قانون صارم جدا ،يسمح بالتبرع للأقارب فقط ولغير الأقارب في لجنة حيرأسها د. عوض تاج الدين
مفيد فوزي : جميل
د.حاتم الجبلي : أستاذ كبير وراجل عنده إستقلالية واللجنة من أساتذة محترمين جدا واللجنة دي الوحيدة في مصر اللي لها الحق في إستثناء حد من الخضوع لموضوع الأقارب
مفيد فوزي: يعني تعتبر زرع الكبد في مصر نجح
د.حاتم الجبلي : جدا أنا باعتقد أنه ناجح واحنا عندنا أساتذة وجراحين من أعظم ما يكون،هي مشكلة زراعة الكبد عشان تبقى عارف حاجتين في الجراحة نفسها ، توصيل الشرايين وتوصيل القنوات المرارية ببعضها ، يعني انت بتاخد كبد جديد له قناة مرارية وله شرايين والراجل اللي هو اتشال منه الكبد البايظ عنده الناحية التانية من القناة المرارية ومن الشريان أخد الغرز هنا دي هي أخطر حاجة
مفيد فوزي: هي دي العملية نفسها؟
د.حاتم الجبلي : دي اللعبة الكبيرة في العملية
مفيد فوزي: عاشوا الناس الي عملوا؟
د.حاتم الجبلي :في سنة واحدة عدت النسبة 91%
مفيد فوزي: أنا باسأل ليه لأنه أنا باعرف ناس كتير عندهم فيروس "سي" وعندهم تصور أنه لا أمل
د.حاتم الجبلي: لا لا فيروس "سي" بص أنا طبعا مش متخصص لكن عايز أقول لحضرتك حاجة، فيروس"سي" لو جه ل 100 واحد 30 واحد منهم حيختفي الفيروس من غير ما يعملوا أي حاجة ولا يتعالجوا ولا أي حاجة ، يفضل ال70 ، ال 70 دول 70 % منهم الفيروس مش حيعملهم أي حاجة يفضلوا كده عايشين طبيعي ويموتوا من أي سبب تاني، المشكلة بقى في عدد صغير في الآخر ده اللي بيخش في مرحلة فشل كبدي
مفيد فوزي: ويجيله سرطان؟
د.حاتم الجبلي : فشل كبدي أو سرطان هما دول المشكلة الكبيرة
مفيد فوزي: أعداد فيروس "سي" في مصر بتزداد وحدث إتهام أنه السياسة الصحية وراء هذه الزيادة؟
د.حاتم الجبلي: شوف حضرتك احنا أول مرة، يمكن أنا ما لحقتش أقول الحتة دي، أول مرة بنعرف الأعداد الحقيقية لمرضى الفيروس "سي" النشط في مصر كان في 2008 وهما 9.8% من السكان اللي هو 7.5 مليون واحد
مفيد فوزي: مرضى بفيروس "سي"؟
د.حاتم الجبلي : إنما تعالى بقى نحللهم تحت سن 30 سنة الانتشار أد ايه وفوق سن ال30 الإنتشار شكله ايه، تحت سن ال30 من 15إلى 30 نسبة الإنتشار 3% بمعنى أن الأجيال الجاية إنتشار فيروس "سي" فيها بينخفض، فوق سن 30 سنة بتصل معدل الإنتشار للمجموعة السنية اللي زي سني أنا من 55 ل 60 نسبة الإنتشار 33% يعني واحد من كل 3 في سني أنا مصاب بفيروس "سي"، ليه الكلام ده لأن في أواخر الخمسينيات وفي الستينيات وأوائل السبعينيات كنا بنستعمل السرنجة الإزاز وكانت البلهارسيا نسبة انتشارها في مصر واخدة ثلث السكان بس ثلث السكان دول كان يعتبر 70% من سكان الريف فكان يروح الوحدة الصحية يدولوا حقنة دوا دوا نفس السرنجة بيدخلها في واحد وفي التاني في التالت فيروس "سي" ما كنش معروف احنا اكتشفناه سنة 87 بعد ما القصة دي انتهت فلما ابتدينا نحلل ولقينا فيروس "سي" عند الناس ابتدينا نرجع بقى ايه السبب لحدوث هذا المرض اتضح بقى قصة البلهارسيا ،عشان تلاقي المرض منشر جدا في المجموعة السنية اللي عدت ال30 سنة ومنخفض للغاية في اللي أقل من 30 سنة
مفيد فوزي: هل لديك رقم إحصائي دقيق عن مرضي الإيدز في مصر؟
د.حاتم الجبلي : عندنا الرقم الرسمي 2900 حالة تقريبا
مفيد فوزي: والحقيقة؟
د.حاتم الجبلي : الحقيقة تضربه في 5 دايما
مفيد فوزي:في 5؟
د.حاتم الجبلي : فما زال الرقم عندنا منخفض جدا
مفيد فوزي:مفيش إحصاءات دقيقة علمية؟
د.حاتم الجبلي :ما هو الرقم اللي باقوله ده الحالات المسجلة بالتعاون مع منظمة الصحة العالمية
مفيد فوزي:لكن حقيقة الأمر أضربه في 5؟
د.حاتم الجبلي: دي حاجة متعارف عليها عالميا لما يقولك أنا عندي 100 ألف حالة تضربهم في 5 يبقوا 500 ألف حالة
مفيد فوزي: سبب إنتشار الأيدز في مصر ايه؟
د.حاتم الجبلي : إنتشار الأيدز في مصر أعتقد بيبقى له سببين اعتقد السبب الأولاني الناس اللي بتاخد مخدرات بالحقن وبتستخدم نفس السرنجات ده السبب الرئيسي وربما بعض الممارسات الجنسية الغير سليمة تكون السبب التاني
مفيد فوزي: اتقاللي أنه في الأقصر في كمية كبيرة من المرضي؟
د.حاتم الجبلي : لأ معنديش التوزيع الجغرافي فما أقدرش أرد على حضرتك
مفيد فوزي: الإعلام والصحافة في رأي وزير الصحة، ايه مؤاخذاتك؟
د.حاتم الجبلي : الحقيقة أنا عندي حاجة كفكر الأول أقولك الأول ايه توجهي وبعدين أقولك وجهة نظري، أنا توجهي دون الدخول في تفاصيل أنه الإعلام الحر والمستنير في غاية الأهمية حتى للمسئول، ليه لأنه بيكشف له العورات في الحتة اللي هو مسئول عنها بطريقة موضوعية بدون أي تحيز، ده إذا كان هذا أمر موضوعي ، وبالتالي هو فعلا سلطة رابعة ولازم نحافظ عليها وعلى إستقلالها بكل السبل الممكنة، مقابل هذا بقى لا يحدث سوء إستغلال من الإعلام لتصفية حسابات أو الدخول في مهاترات أو نشر معلومات غير دقيقة، أنا باشوف دلوقت أنه كثير من الإعلاميين في القطاع الصحي بينشروا معلومات كويسة وبيدونا، مثلا يقولك الوحدة الصحية في المكان الفلاني مش شغالة كويس وفي عيوب فنية، أقوم باعت فريق تاني يوم الصبح أتأكد وفعلا بيطلع كلام في الغالبية صحيح فبيساعدونا ان احنا نراقب ونفتش، إنما في بعض الأحيان الواحد بيتضايق لما يكتشف أنه في معلومة نشرت غير دقيقة، مثلا زي التحور بتاع الفيرس H1N1 بتاع انفلونزا الخنازير،معلومة تخض الناس إنما هي معلومة مش دقيقة نسبت إلى منظمة الصحة العالمية ونسبت إلى مارجريت تشان إنما هي مش دقيقة
مفيد فوزي: مش دقيقة؟
د.حاتم الجبلي : دقيقة لأ ودي بتخلق نوع من البلبلة خاصة الصحة في مصر أي حاجة صحية في مصر لما تصدر عن مصدر غير دقيق ممكن تعمل بلبلة عند الناس
مفيد فوزي: بالمناسبة العمل العام العام والعمل الخاص لماذا هناك دائما من يتجه نحوك بشئ من عدم الحرص على العمل العام؟
د.حاتم الجبلي : بمعنى ايه؟
مفيد فوزي: يعني بمعنى أنت تعمل الآن كوزير للصحة ومع ذلك هناك باستمرار في الخلفية كده على بلاطة "دار الفؤاد" ليه الناس في مصر بيبقى عندهم هذه النظرة ممكن تصحح لي المعنى ولا أعتقد أن ده يدينك
د.حاتم الجبلي : أنا أصلا ده اللي أنا كنت باشتغل فيه أنا كنت أستاذ جامعي وبعدين اشتغلت في القطاع الخاص يعني معروف أن أنا جاي من القطاع الخاص، هي النقطة أنه أنا ماخليش وزارة الصحة تجامل دار الفؤاد على حساب مصلحة المواطن المصري
مفيد فوزي: هل في علاج على نفقة الدولة راح إلى دار الفؤاد؟
د.حاتم الجبلي: آه راح فعلا حسب القيمة دار الفؤاد كان ترتيبها 213 يعني المستشفيات الخاصة كان هي واخدة رقم 213 من ناحية القيمة اخدت 2مليون و900 ألف جنية في مستشفيات اخدت 60 مليون و70 مليون ودار الفؤاد بيروحها فقط وده متوافق مع القانون حالات الكبد
مفيد فوزي: على وجه التحديد؟
د.حاتم الجبلي: آه لأن ده مش موجود في القطاع العام بالكمية المتوافر فيها في دار الفؤاد، إنما هي القصة البعض بيستخدمها كنوع من الإرهاب المعنوي للوزير، لما نجيبله دار الفؤاد يقوم يكش منا، أنا ما تفرقش معايا لأن أنا عارف إن أنا ما باغلطش وعارف الحدود واضحة جدا وبالتالي أنا لست مكسوف إن أنا أقول إني جاي من القطاع الخاص، لأنه الحمد لله بعد 4 سنين ونصف في الحكومة أنا كل توجهاتي كانت لصالح محدودي الدخل، الإسعاف ما خدمش الأغنياء خدم مصر كلها، الوحدات الصحية ما بتخدمش سكان الزمالك وجاردن سيتي احنا بنخدم الناس اللي في الريف، القوافل الطبية احنا عاملين فوق ال 5ألاف قافلة عالجوا 13 مليون بني آدم ببلاش في آخر 4 سنين، المستشفيات احنا كل تركيزنا على المستشفيات العامة اللي هي بيسموها الأميري زمان أو المركزي ما دخلناش في المستشفيات اللي هي بتاعة المدن الكبيرة ، يعني احنا السنة دي يا أستاذ مفيد من أول يناير لحد أغسطس فتحنا 19 مستشفي مفيش فيهم ولا واحدة في القاهرة
مفيد فوزي: كله بره
د.حاتم الجبلي: كله بره ولسه إنشاء الله سيادة الريس يفتتح لنا بعض المستشفيات، عندنا 3 مستشفيات في بني سويف واحدة في الفشن وواحدة في ناصر وواحدة في الواسطى، عندنا الأقصر العام، عندنا مركز قلب في مرسى مطروح
مفيد فوزي: فسر لي ليه في ضجر عند الناس؟
د.حاتم الجبلي: ليه في ضجر ؟ من ناحية ايه
مفيد فوزي: من ناحية الصحة العامة خصوصا في مستشفيات الدولة
د.حاتم الجبلي : الإنفاق
مفيد فوزي: ايه مؤاخذاتك على أطباء مصر بعضهم يعني؟
د.حاتم الجبلي: عدم الالتزام بالعمل الحكومي
مفيد فوزي: تقصد أن هما بيهربوا منه
د.حاتم الجبلي: آه بيزوغوا يروحوا يمضوا الصبح ويجروا على عياداتهم
مفيد فوزي: تحليلك ايه؟
د.حاتم الجبلي: تحليلي أنه ماكنش في رقابة من زمان وأصبح هو ده النمط العام للشغل
مفيد فوزي: العيان الفقير يموت مبكرا في مصر؟
د.حاتم الجبلي: لأ الكلام ده مش دقيق، قطعا في حالات النظام ما بيغطيش 100% ، لكن أنا أقدر أقولك دلوقت لا طبعا احنا دلوقت ما بنتعاملش كدولة متخلفة صحيا، احنا حد نقاط القوة عندنا في مصر النهاردة، حضرتك يمكن سمعت أخيرا عن أهداف الألفية الإنمائية وكان الجمعية العامة للأمم المتحدة في نيويورك بتراجع في سبتمبر أداء الدول، مصرهي واحدة من 4 دول فقط من 180 دولة في العالم اللي حققت الأهداف الإنمائية الثالثة قبل معادها بأربع سنين احنا وبوليفيا والإكوادور والصين
مفيد فوزي: إذا عرفت أنه في دراسة بتقول إن مشاهد التدخين والمخدرات هي 2047 مشهد في حوالي 33 مسلسل وده في نهاية الأمر له آثار سلبية على الناس وفي 2033 مشهد بيستخدم الشيشة، نفسي أعرف موقفك ايه من الشيشة ومن هذه المسلسلات؟
د.حاتم الجبلي: أنا حارد عليك عملي برده، احنا منعنا التدخين خالص في اسكندرية
مفيد فوزي: ازاي؟
د.حاتم الجبلي: هناك في محافظ ناشف ومنضبط جدا مضينا معاه بروتكول في شهر يونيو وقلنا للمواطنين في شهر سبتمبر حنبدأ تطبيق النظام ماحدش كان مصدق، يوم 11 سبتمبر بعد العيد مباشرة اتطبق النظام حضرتك خد العربية كده وامشي من محطة الرمل للمنتزة اتحداك لو لقيت شيشة واحدة
مفيد فوزي : شيشة في اسكندرية مفيش؟
حاتم الجبلي: آه فابتدوا ايه يأجروا الشقق اللي فوق القهاوي بس المحافظ مش سايبهم يعني وعملوا مظاهرة قدام المحافظة وبتاع..
مفيد فوزي: عشان الشيش؟
د.حاتم الجبلي: آه عايزين الموضوع يرجع بأي طريقة، بس احنا عندنا قانون رقم 154 لسنة 2007 ده قانون ملزم والناس عندها ضبطية قضائية وطلعنا اللائحة بتاعته، فالنظام ماشي في اسكندرية، المحافظ سمير فرج نفس القصة في الأقصر
مفيد فوزي: ألا تخشى أنه الشيشة تنتقل للبيوت ويكون تأثيرها أخطر على الأطفال والرضع؟
د.حاتم الجبلي: احنا عملنا مسح مع منظمة الصحة العالمية والجهاز المركزي للتعبئة والإحصاء السنة اللي فاتت 56% من تدخين الشيشة في مصر في المنازل
مفيد فوزي: ايه حدود سيطرتك على ده؟
د.حاتم الجبلي: لأ مالناش أي سيطرة
مفيد فوزي: ما تقدرش؟
د.حاتم الجبلي: دي حرمة
مفيد فوزي: لكن نفسيا زعلان عليه؟
د.حاتم الجبلي: طبعا، احنا عندنا هدف حاطينه لمدة 5 سنين من 2010/ 2011 لغاية 2015 أن الأماكن العامة في 2016 ميكونش فيها تدخين
مفيد فوزي: والمواصلات العامة؟
د.حاتم الجبلي: كله، الأماكن العامة أيا كانت أندية ، جامعات، مطاعم، مواصلات، أي حاجة
مفيد فوزي: هل نفس الشيشة بيساوي 30 سيجارة؟
د.حاتم الجبلي : معنديش فكرة ، لكن احنا خلي بال حضرتك داخلين في الفترة اللي جاية في مصر في ال 50 سنة الجاية فيما يعرف بالأمراض الغير معدية احنا في مصر اتقدمنا جدا صحيا على عكس ما يقال
مفيد فوزي: ازاي أمراض وغير معدية؟
د.حاتم الجبلي: أقولك بقى ، سنة 60 لو ترسم خريطة الأمراض في مصرتجد أن 80% من الأمراض كانت بتتنقل من بني آدم للتاني زي البلهارسيا وزي فيروس "سي" بتاع الحقن وزي الانكلستوما والاسكارس الحاجات اللي نسيناها، و10 % كانت أمراض غير معدية زي ايه؟ هي 4 مجموعات السكر ، أمراض القلب والأوعية، السرطان وأمراض الجهاز التنفسي زي الربو،اللي هي الأمراض اللي لوعندك ما تتنقليش ، السكر ما بيتعديش، ال50 سنة الجاية حيبقى 85% من الأمراض غير معدية و5% معدية والباقي حوادث، احنا الآن لازم نستعد ليه بقى؟ لأن تكلفة علاج الأمراض الغير معدية عشرات الأضعاف من المعدية، التانية بتجيب فاكسين ب50 قرش وتطعم الواحد ما يجيلوش شلل الأطفال تطعمه ما يجيلوش درن، الحاجات دي خلاص بتنتهي ، مرض فلازم احنا نركز على 3 محاور فقط لمواجهة الأمراض الغير معدية، نشجع الناس على الحركة بدل ما تركب عربيات تمشي أو تعمل كل يوم رياضة نصف ساعة ،غذاء صحي آمن ما يقعدوش ياكلوا بقى السمن والزيت والزبدة، ومنع التدخين، هي دي ال3 محاور فقط الرئيسية اللي بتواجه بيها الأمراض الغير معدية
مفيد فوزي: خليني أسألك عن ألبان الأطفال والهرمونات اللي بتخش فيها
د.حاتم الجبلي : والله احنا بنراجع دي مراجعة دقيقة،احنا ما جلناش هذا الكلام حقيقة ما جلناش الكلام ده خالص سواء الألبان المدعمة والغير مدعمة لأنها بتخضع لرقابة شديدة جدا في المعهد القومي للتغذية وكذلك في ادارة الصيدلية,لأ معندناش دي دي مش موجودة عندنا
مفيد فوزي: يعني تعتقد أن أمهات مصر الآن اللي شافتك على الشاشة يدركوا أنه في أمان تام بالنسبة لألبان الأطفال، طيب سوء التغذية اللي بيعمل التقزم عند الأطفال؟
د.حاتم الجبلي: آه دي مشكلة كبيرة، شوف حضرتك التقزم كان عندنا في 25% من الأطفال تحت سن 5 سنين سنة 2005 ، زاد في 2008 بقى حوالي 29% ، بس التقزم ده اللي هو الطفل ما يوصلش للطول الطبيعي المناسب لسنه بسبب سوء التغذية ده يقدر يتعكس يعني أول ما تغذي الطفل كويس يختفي التقزم
مفيد فوزي: يعني قابل للنمو؟
د.حاتم الجبلي: آه هو اعتقد أكتر حاجة أثرت في 2008 هو إرتفاع الأسعار الشديد جدا بتاع الأغذية اللي بدأ في شهر مارس ، لوتفتكر من مارس لأكتوبر 2008 كانت الأسعار ولعت بتاعة الدرة والقمح لما القمح وصل لت 550 دولار الطن فدي قللت من استهلاك الأسر للأغذية السليمة فحصل خلل
مفيد فوزي: خلل في التغذية؟
د.حاتم الجبلي: الحقيقة كنا في مجلس المحافظين رئيس الوزراء مهتم جدا جدا بتغذية الأطفال جدا يعني معتبرها قضية محورية بالنسبة له
مفيد فوزي: من أين تأتي الزيادة السكانية في مصر؟
د.حاتم الجبلي: أعتقد الزيادة السكانية تأتي من أسباب كتير جدا
مفيد فوزي: جغرافيا منين؟
د.حاتم الجبلي: من الصعيد، من ريف الصعيد، احنا عملنا دراسة عملتها كلية الإقتصاد والعلوم السياسية وعملها مركز المعلومات ودعم اتخاذ القرار قالت أنه 25 % من سكان مصر يعني ربع سكان مصر مسؤلين عن 41% من الزيادة السكانية
مفيد فوزي : 25% مسؤلين عن 41%
د.حاتم الجبلي: آه دولا القاطنين في ريف الصعيد ، وبالتالي احنا عندنا حملة أو نظام دلوقت بناء على ، طبعا سيادة الريس دي بالنسبة له هو بيقول دي أم القضايا دايما يسميها أم القضايا، خدنا توجيه جامد جدا في بداية 2010 وعملنا احنا برنامج وطبعا وزارة السكان طلعت وتنظيم الأسرة اخد منحنى جديد عملنا برنامج وعرضناه على رئيس الوزرا في 19 أغسطس وبنطبقه على 881 قرية في الصعيد على مدى السنتين الجايين
مفيد فوزي: خليني أدخل معاك بصراحة أكتر هل المرجعية الدينية بتلعب دور في الزيادة السكانية؟
د.حاتم الجبلي: آه حاليا لو شيخ زاوية أو واعظ في حتة بعيدة آه بتلعب دور طبعا بيقولوا لهم سيبكوا من الكلام الفارغ ده
مفيد فوزي: أيوه
د.حاتم الجبلي: لكن لما بنييجي نبص للتركيبة السكانية في مصر تجد أن عدد الأطفال في الأسرة الواحدة في المدن الكبيرة نتيجة الضغوط الإقتصادية قل ، في القاهرة 1.7%
مفيد فوزي: لأ سيبك من القاهرة ، ال 25% المسؤلين عن ال41% من الزيادة السكانية
د.حاتم الجبلي: دول بقى عندهم متوسط العيال 3.6
مفيد فوزي: أنا قابلت ناس كتير جدا عندهم 10 و11
د.حاتم الجبلي: آه من ده كتير في الفيوم وبني سويف وكلما كانت المحافظة أكثر فقرا زادت الأعداد
مفيد فوزي: عايز أسألك عن حاجة أعتقد أنه من المهم أن أسألها لك، الناس في مصر بتهمس همسات غريبة وهذه الهمسات أنا جمعتها بشكل جيد لكي أضعها أمامك ،أن نقابة الأطباء في مصر لا تعاقب الأطباء الكبار على أخطاءهم وأرجوك أن تكون موضوعي ولاتجامل أحدا
د.حاتم الجبلي: بص هو آليات عشان تعاقب لازم يبقى عندك آليات عندك قانون
مفيد فوزي: خليني أعيدها تاني عشان تعاقب لازم يبقى عندك آليات زي أيه؟
د.حاتم الجبلي: يعني النهاردة احنا عندنا اللي يغلط بنوديه النيابة على طول، عشان بس أفكرك أيام انفلونزا H1N1 كان في ست جاية اعتقد من بورسعيد أو بلبيس وراحت مستشفى اللي هو الصدر ورفضوها وبعدين قعدت تلف على المستشفيات وبعدين رجعوا أخدوها تاني بالليل وماتت تاني يوم، اتحكم على ال4 دكاترة دول اللي احنا بلغنا النيابة ضدهم بالسجن ما بنهزرش احنا في الحتة دي
مفيد فوزي: هناك أيضا يقال أن استخدام البلاستيك في مصر يتنامى وهو كارثة كلوية من الكلى
د.حاتم الجبلي: آه صح، البلاستيك بصفة عامة فيه أنواع آمنة وأنواع غير آمنة؟
مفيد فوزي: لازم الناس تعرف لأن أنا بنتي بتقول لي ايه ما تنقل الميه في قزايز
د.حاتم الجبلي: أنا لقيتهم عندنا في البيت بيملوا من الفلتر في قزايز بلاستك من اللي هما استعملوها قبل كده قلت لهم لأ ابقوا خدوا قزايز قزاز
مفيد فوزي: مصر كلها بتستعمل قزايز بلاستيك في الميه
د.حاتم الجبلي: لأ غلط ، هو أنت تقدر تستعملها مرة مفيش مشكلة لكن تفضل تستعملها 6 اشهر أو سنة بيحصل تفاعل بين الميه وبين البلاستيك
مفيد فوزي: أنت عارف الناس في مصر تجيب وتخزن
د.حاتم الجبلي: بس ده غلط أنا باقول لك القزاز هو أصح حاجة
مفيد فوزي: مازال البلاستيك خطر؟
د.حاتم الجبلي: آه خطر
مفيد فوزي: إختلاف معامل التحاليل في مصر يؤذي المريض وأحيانا في أمريكا وأوربا يقولك أركن الحاجات دي واعتمد على التحاليل بتاعتنا؟
د.حاتم الجبلي: حاقولك ليه أولا احنا إلا حديثا فقط ابتدت المعامل تبحث عن الإعتماد الدولي
مفيد فوزي: يعني ايه اعتماد دولي؟
د.حاتم الجبلي: يعني أن أنت بتطبق كافة المعايير والضوابط المتعارف عليها عالميا يعني ايه بقي، يعني أن انت مثلا الجهاز اللي بتحلل بيه الدم كل يوم الصبح لازم تعايره بطريقة معينة، الكواشف الي أنت بتستخدمها في
التحليل ما يكونش مر على إنتاجها فترة زمنية معينة
مفيد فوزي: ده الجهاز اللي عندي في البيت
د.حاتم الجبلي: لأ في المعمل، إن الفني اللي بيشتغل على الجهاز يكون مدرب التدريب الكافي اللي يمنعه أنه يعمل حاجة غلط
مفيد فوزي: حضرتك في وسط الكلام قلت أنهم بيستخدموا الكيميائي؟
د.حاتم الجبلي: الكيميائي آه وهكذا من الأمور
مفيد فوزي: خليني أسألك من الذي يعادي التأمين الصحي الجديد؟ من الذي يأخذ منه موقف نفسي مضاد؟
د.حاتم الجبلي: ممكن شركات التأمين الخاصة، ممكن مش باقول هما اللي بيعادوا يعني احتمال،ممكن بعض أصحاب المستشفيات الخاصة لأن حتحط رقابة شديدة جدا عليهم، ممكن بعض الناس اللي هما الأثرياء اللي عندهم برامج تأمين صحي في الخارج أو في الداخل مكلفة وأنت بتفرض عليه أنه يخش في النظام ده، حيقولك أنا مالي طب ما انا أنا مبسوط من اللي عندي أنت بتفرض عليا ليه، بس احنا بنفرض عليه لأن ده تكافل أنت عندك قدرة وبتاخد من القادر تصرف بيها على الغير قادر، بتاخد من اللي صحته كويسة تصرف على اللي صحته تعبانة، فمفيش بقى قصة لأ أصل أنا عندي التأمين الفلاني فمش دافع لكوا، هما دول الجهات اللي ممكن تعمل مشاكل في الموضوع
مفيد فوزي: إن بعض العاملين في الصيدليات يتصرفون أحيانا كأطباء في غياب قانون الصيدلة، يهمسون بهذا
د.حاتم الجبلي: منتهى الخطورة ، الصيادلة ودي بقى ثقافة بقالها عشرات السنين خاصة في المناطق الشعبية عندنا حاجات لطيفة كده يقوله ايه مجموعة البرد سمعت عنها دي أي واحد يروح أي أجزاخانة في أي حي شعبي واحد جاتله انفلونزا يقوله خد مجموعة البرد، دي فيها أدوية مضادة للحساسية بتقفل المناخير افرض الراجل ده بأه عنده مرض قلب تروح قفلاله شريان القلب تخلص عليه
مفيد فوزي: مصيبة
د.حاتم الجبلي: مصيبة ليه لأنه محدش كشف على الراجل أنت شايفه قدامك كويس يعني عمال يكح ويعطس بس أنت مش عارف أنه عنده مشكلة فلما أدي له حاجة عشان تضاد للحساسة فتقفل الشرايين عشان مناخيره تفتح ممكن تخلص عليه في حاجة تانية، فدي زي ما تقول ايه استسهال وثقافة اتوجدت أنك أنت تغيرها مش حيحصل بين يوم وليلة، الأخطر بقى أنا معنديش مانع الصيدلي يعمل كده لأنه راجل دارس صيدلة 6/7 سنين وراجل رفيع المستوى في المعرفة ويقدر يعرف التفاعلات بين الأدوية المختلفة وبالتالي له رأي، إنما أنك تبقى صاحب صيدلية تروح تجيب لي واحد دبلوم زراعة أو دبلوم صنايع وتقعده جوه وهو اللي يلبس البالطو الأبيض وهو اللي يدي الأدوية دي بقى اللي مش مقبولة
مفيد فوزي: إن قانون الصيدلة في مصر د.حاتم سيعيد للعلاج الشئ الكثير
د.حاتم الجبلي: احنا خلصناه على فكرة
مفيد فوزي: ابتدا مناقشته في مجلس الشعب؟
د.حاتم الجبلي: لسه لازم يتعرض على لجنة سياسية وتشريعية في مجلس الوزرا بعدين يتعرض على مجلس الشعب كل ده هيأتي بعد قانون التأمين الصحي، احنا عندنا 4 قوانين بعد التأمين الصحي، عندنا قانون الصيدلة وعندنا قانون التنمية المهنية المستدامة وقانون التمريض
مفيد فوزي: أنت راضي عن الممرضة في مصر؟
د.حاتم الجبلي: بعضهم متميزين جدا لكن الأغلبية محتاجين تطوير
مفيد فوزي: أقولك على فولكلور أحد الأشخاص اعتاد أنه حتى لما يجيله انفلونزا يسافر بره ويتعالج يعني قادر فقلت له أنت بتسافر بره ليه؟ قاللي أبد يعني هو أنا بدور في الحقيقة على دوا محترم وممرضة أكثر إحتراما، هل ده وأنت بتسافر بره وترى وتعلم هل ده حقيقي؟
د.حاتم الجبلي: احنا عندنا مشكلة في التمريض سببها الآتي أن 90% من الممرضات عندك كانوا خريجي مدارس ثانوي يقعدوا أولى وتانية وتالتة ثانوي وهي عندها 16/17 سنة يرموها في المستشفى ولا حد يعلمها ولا حد ينمي مهاراتها ولاحاجة، النظام ده لغيناه أصبح التمريض 5 سنين بتدرس أولى وتانية وتالتة ثانوي وبعدين أولى وتانية بعد الثانوية العامة تخصص دي حترفع مستوى الأداء وأول دفعة اتخرجت في أكتوبر اللي احنا فيه ده، دي النقطة الأولى ، النقطة الثانية إن احنا بنتوسع في كليات التمريض مع الدكتور هاني هلال في كل محافظة دلوقت بنحاول نفتح كلية تمريض إن كان واحدة أو اتنين ، بنفتح للقطاع الخاص أنه هو يخش كليات التمريض، المغربي فتحوا في الجامعة البريطانية وساويرس فتحه في الجونة
مفيد فوزي: هل عليها أقبال؟
د.حاتم الجبلي: مليان على الآخر
مفيد فوزي: هل حزنت عندما ظهرت صورة الممرضة في مسلسل زهرة
د.حاتم الجبلي: ده أنا قلبت الدنيا ده أنا مسكت النقيب في التليفون قلتله أيه يا عم اللي أنت شايفه ده، أنا مشفتش في زهرة دي غير نص ساعة في أول يوم رمضان، فلقيت ممرضة بتسرق الدوا وعندها دولاب في البيت بتبيعه للناس وتستنى الناس لما يسيبوا المستشفى وتلم ورا شنطهم الأدوية وتتباهى بهذا ازاي يعني، الراجل اللي أخرج التمثلية دي كان فين
مفيد فوزي: النموذج ده مش موجود؟
د.حاتم الجبلي: الشهادة لله يعني إن وجد فهو أقلية شديدة جدا دلوقت
مفيد فوزي: هل ممكن أن تتعرض الدراما لمثل هذه القلة واللا أنت كنت تقصد أنه لا ينبغي التعميم
د.حاتم الجبلي: طبعا لا ينبغي التعميم الخطأ موجود في كل مهنة ما، حاقولك تجربتي الشخصية معلش يا أستاذ مفيد أنا لما بدأنا في دار الفؤاد قلنا حنجيب ممرضات أجانب بعد 5 سنين أقدر أقولك إن تجربتي مع المصريات أفضل جدا من الأجانب دي حقيقة الممرضة المصرية المتعلمة كويس بعشر ممرضات أجانب بس ايه اللي هي تكون تفكيرها سليم بتحب مهنتها، أولا بيحبوا يتعلموا جدا خريجات المعهد العالي للتمريض بيحبوا يتعلموا جدا ، بس مشكلتهم لما يتعلموا جدا وياخدوا شهادة يحطوها ورا مكتبهم كده وما يحبوش يشتغلوا تقولك أنا إدارية، لأ إدارية لأ
مفيد فوزي: د.حاتم الجبلي وزير الصحة مما تشكو قوميا؟
د.حاتم الجبلي: أشكو قوميا...أملي أن الناس تركز على العمل والجودة أكثر وتتكلم أقل
مفيد فوزي: مما تشكو معنويا؟
د.حاتم الجبلي: معنويا أشكو من المساس بالسيرة الشخصية للناس
مفيد فوزي: مما يشكو وزير الصحة صحيا؟
د.حاتم الجبلي: كنت أشكو من خلل في الغدة الدرقية لكن الحمد لله راح
مفيد فوزي: راحت خلاص؟
د.حاتم الجبلي: آه راحت
مفيد فوزي:عالجتها
د.حاتم الجبلي : آه
مفيد فوزي: بتيجي من ايه؟
د.حاتم الجبلي: قالوا من الStres الضغط خلل في الجهاز المناعي من حوالي سنة
مفيد فوزي: كانت عندك قبل الوزارة؟
د.حاتم الجبلي: لا لا
مفيد فوزي: يعني هي من متعلقات الوزارة؟
د.حاتم الجبلي: الله أعلم، قالوا خلل في الجهاز المناعي نتيجة ضغط عصبي
مفيد فوزي: هو الضغط العصبي يعمل خلل في الجهاز المناعي؟
د.حاتم الجبلي: آه يعمل وبالتالي اتكونت أجسام مضادة فضلت تهاجم في الغدة الدرقية خلتها تفرز فوق قدرتها الطبيعية
مفيد فوزي: بتعمل ايه عشان تقاوم الضغط؟
د.حاتم الجبلي: باستمتع بحفيدتي أحلى حاجة في الدنيا أصل ولادي مشيوا خلاص، واحد في أمريكا وواحد
مفيد فوزي: بتضحكك؟
د.حاتم الجبلي: آه دي ملهاش حل
مفيد فوزي: بتتفرج على حاجة في التليفزيون تضحكك؟
د.حاتم الجبلي: أه طبعا عارف لحد دلوقت بشوف القصري اللي هو يقولك نورماندي تو، مثلا اسماعيل ياسين
مفيد فوزي: اسماعيل ياسين يضحكك؟
د.حاتم الجبلي: آه يضحكني جدا في الجيش والطيران والحاجات دي حاجات مسلية جدا
مفيد فوزي: بتضحك بالليل؟
د.حاتم الجبلي: أنا اتفرج على الكورة أو حاجة كده ما اتفرجش على التوك شو أبدا
مفيد فوزي: إذن بتتفرج على المسرحيات الضاحكة بتتحمس للكورة ولا تتفرج على التوك شو وتستمتع بحفيدتك ده كان أحد أسباب العلاج من الغدة الدرقية؟
د.حاتم الجبلي: ده ساعدني جدا
مفيد فوزي: وحقيقتها أنها جاءت بسبب الضغط؟
د.حاتم الجبلي: ده اللي اتقالي
مفيد فوزي: ولم تكن موجودة من قبل وأنت دون كرسي الوزارة
د.حاتم الجبلي: حاجة حلوة قوي