أحمد عفيفي يكتب : حكومة .. بتستعبط .. وتاكل مال النبي!

المتخلف اللي ناقص تربية ومعندوش ذرة دم اللي صرح بأن كل طفل قتيل في حادث القطار يستحق 5000 جنيه .. قسما بالله لو أننا في بلد محترم بجد كنا حاكمناه وعلّمناه الأدب .. 5000 جنيه تمن دم ولد من ولادنا .. وكان ناقص زيادة في التخلف والاستعباط وقلة الأدب انه يقول : مبلغ مش وحش أبدا .. ومتنسوش ان فيه واحد محظوظ مات له 5 أطفال .. يعني بالصلاة ع النبي كده حيلهف 25 ألف جنيه دفعة واحدة .. والله يكون في عون اللي مات له واحد بس .. مش حياخد غير الخمساية!!

.. طيب .. انتوا بتوع ربنا وماشيين بشرع ربنا .. ماشي .. جميل.. والشرع بيقول زي ما سمعت من شيخ أزهري محترم يضرب كفا بكف من وساخة عقول بعض المسئولين .. سمعته بيقول لوائل الإبراشي ان دية القتيل 100 راس من الإبل .. او مايعادلها قيمة مادية من الذهب او الفضة .. يعني وحسب كلام الشيخ الأزهري بتاع ربنا بجد .. كل عيل مات في كارثة قطار الصعيد يستحق مليون جنيه.. يعني الحكومة الإخوانية المُرسية بتاعت ربنا لازم تدفع 53 مليون جنيه عدا ونقدا وبأقصى سرعة لأهالي الضحايا .. منين بقى .. مش مشكلتنا .. بجِملة الشحاتة اللي بدأها مرسي .. يروح يشحت من اى بلد 53 مليون جنيه عشان حق ربنا في دم العيال اللي ماتوا .. لازم الحكومة القنديلية المقندلة بنيلة تدفع تمن نومها في العسل وعدم كفاءتها وانعدام رؤيتها لمستقبل بلد ولو لشهر جي .. لازم تنكوي وتعمل ان شالله قرد ، وتدبّر هذا المبلغ لأهالي الضحايا .. تاخدهم بقى من قرض صندوق النقد .. تاخدهم من السلفة القطرية .. تاخدهم من تركيا .. من اى عفريت ازرق .. المهم لازم تتصرف ومتنمش الليل ولا النهار لحد ما يوصل حق ربنا للعيال اللي ماتت.


مش انتوا بتوع ربنا ؟ .. طيب ياظلمة .. يا كفرة .. ربنا قال ان اللي يموت بالخطأ ديته 5000 جنيه؟! .. اقسم بالله انكم فعلا معندكمش دم واللي يوافقكم على ماتفضّلتم به على أهالي الضحايا هو كمان معندوش دم .. ولو كان رئيس الجمهورية نفسه اللي مكلفش خاطره وخطف رجليه لحد اسيوط يعزي الأهالي ويوطّي قدّامهم لحد ما ضهره ينكسر من شدة الخجل .. يمكن يزيد كرمهم ويقبلوا عزاه ويسامحوه.. يروح لحد عندهم يبكي بدل الدموع دم.. مش حيبقى أغلى من دم زهور حياتهم اللي في لحظة ماتت.

يرد عليا بقى واحد حنجوري : والحكومة تجيب منين .. إحنا لاقين ناكل .. وارد عليه: بسيطة جدا .. بلاش الرئيس مرسي بتاعكم يصلي الجمعة لمدة شهر او شهرين بره قصر الرئاسة .. وان شاء الله ربنا برضه حيقبلها منه ، لو حتى صلّى في بيتهم ، مادام عمل كده عشان حق ولاد صغيرين ضحايا إهمال وغباء حكومته .. كفاية بقى خطب في جوامع وكلام أجوف ملهوش معنى وفتحة صدر ع الفاضي .. وحق الشهدا في رقبتي وانا ماليش حقوق على الشعب .. الشعب هو اللي له كل الحقوق.. كفاية بقى كلام فارغ ، وكل يوم او يومين نصحى على مصيبة جديدة .. شبعنا منك ومن اللي قبلك كلام .. ومبقاش يجيب معانا خلاص .. عينينا فتّحت والمراهق فينا بقى راجل .. واللي كان بيبلعها بمزاجه .. خلاص مزاجه اتعكر من كتر الدق على الدماغ لمّا عقولنا ورمت .. بس لسه بتعرف تفكر وبتعرف مين اللي بيتكلم جد ، ومين اللي بيستعبط وعايز ينضرب بالجزمة القديمة.

ارحمنا بقى ياريس مرسي .. يا رئيس كل المصريين.. روحنا بقت في مناخيرنا .. ومش طايقين دبان وشنا .. ارحمنا يرحمك ربنا.. اوعى تفتكر ان صبرنا على مبارك 30 سنة معناه اننا ممكن نصبر عليك انت كمان 30 سنة .. وعشان كده قاعد تعك وحاطط في بطنك بطيخ الصيف كله .. لأ مش حيحصل .. اللي بيقوم من رقدة طويلة وربنا يعافيه .. بيكره الرقدة تاني .. وممكن يدفع حياته ببساطة جدا عشان يفضل واقف على رجليه ومصحصح .. او اللي بعد منه يفضلوا واقفين ومصحصحين.

متريّحش اوي يا مرسي وتنخدع في عيال مصر وشبابها .. قسما بالله لو قاموا تاني .. حيجيبوا عاليها واطيها .. وكل اللي وقعوا فيه بسذاجة وعدم خبرة جابت الإخوان وجابتك معاهم .. مش حيقعوا فيه تاني .. متريّحش اوي يا مرسي .. وخاف بجد .. على نفسك ماشي .. على البلد ماشي .. المهم انك تخاف من بكره.. بكره يا مرسي اللي قرّب ع الأخر!!