عبد الرحمن الأبنودي يكتب: من كل بستان «أغنية ليلة حنة»

يا تاجر الصبر
1

يا تاجر الصبر ما تْخِلِّشْ فى ميزانك..
من حُوجْتى للصَّبر ساكن جنب دُكَّانَك
قلبى يمامَة تهِجّ تهِجّ وتجينى
لا يهمها من أنينى أو دموع عينى
فاعمل لى تحويجة من صبرَك وإحسانك!!
2

يا تاجر الصبر ما انت شايفنى مش صابر
الكسر فيّا.. أنا المكسور وانا الجابِر
الحلم خدنى نسيت اصحى له من تانى
كإنى لا نِمت ولا فيه حد صحَّانى
الصبر ما يفوتْش ع اللى دمعهم حاضر!!
3

باسمع دموعهم سَمَع.. دمع الفقير ليه صوت
دمْعَه بطول السنين.. من الميلاد للموت.
الفُقرا ربّك عشانهُمْ هُمَّ.. خلَق الصبر
والصبر واخدينه فى قلوبهم لحدّ القبر..
ماهو لولا صبر الفقير إزاى حياته تفوت؟
4

يا تاجر الصبر.. خَلْق بتنتظر ع الباب
إِمْلا الحُمول صَبْر وماتسألش ع الأسباب
الصبر لو كان بفايده نبوسوا أجفانك
ونسوق محبتنا ودُعانا.. لدكَّانك
يا تاجر الصبر إطلع مرّه مش كداب!!
5

صابر على الدنيا مش باشكى عطش ولا جوع
لو ماشافتْنى عينيك صوت الدموع مسموع
مال النخيل ع المصاطب خُدْ مكان فى الضِّل
علّمنى أصبر على الغريمين عدْو أو خِلّ
واذا ما شُوفْناشْ نتيجة نغَيَّر الموضوع!!..