احمد عفيفي يكتب : قاتل هبة ونادين .. «ابن حلال» !!

والله فيه شبه شديد جدا بين محمد رمضان الممثل وبين محمود العيساوي اللي اتعدم من شهر تقريبا بعد إدانته في القضية الشهيرة المعروفة بمقتل هبة ونادين .. ومحمد رمضان ممثل جيد جدا على فكرة وبيعكس بحرفنة أوجاع وهموم المواطن الغلبان اللي لا له في الطور ولا الطحين .. عايز يعيش وياكل لقمة حلال ويستر عياله واهل بيته .. عشان كده عمري ماحسيت انه بيمثل .. وكأن هو فعلا انسان غلبان .. لقي فرصة كويسة فمسك فيها وقال يارب ارزق.

المهم .. موضوع مسلسل " ابن حلال " هو نفسه موضوع هبة ابنة ليلى غفران ونادين صاحبتها .. والاتنين اتقتلوا في شقة بالشيخ زايد في 6 اكتوبر .. والمتهم في جريمة القتل شاب شكله غلبان .. ميعرفش يقتل فرخة .. لكن وحسب التحريات وشهادة الشهود ثبتت الجريمة عليه ، ومن شهر واحد بس اعدموه بعد ست سنين.

والشهادة لله من ساعة الجريمة دي ماحصلت وانا مش قادر اقتنع ابدا ان الواد الغلبان ده اللي اسمه محمود عيساوي هو اللي قتل هبة ونادين بطريقة بشعة مش ممكن تكون بدافع السرقة ابدا .. ولو تفتكروا .. الجريمة دي كانت بعد جريمة مقتل سوزان تميم في دبي والمتهم فيه السكري وطلعت مصطفى .. وكان كتير مننا عنده قناعة تامة ان ممكن جدا يكون رجل الاعمال طلعت مصطفى وراء جريمة القتل بتحريضه وتكليفه محسن السكري بالتنفيذ ..

وفعلا ثبت بالدليل القاطع ان رجل الاعمال الملياردير حرّض ودفع ملايين للسكري عشان يقتل له سوزان تميم .. سيناريو طبيعي ومنطقي تقدر تصدق أحداثه .. راجل معاه فلوس بالهبل .. ونسوان حلوة وزي القمرات بتحب هى كمان الفلوس والمليون يبقوا عشرة .. الراجل الغني حب الست الحلوة .. اخدت منه اللي هى عايزاه وراحت تحب واحد تاني .. قام صاحبنا " نأحت " عليه كرامته وصعبت عليه فلوسه .. قام أجّر اللي يقتلها عشان يشفي غليله منها.

ده بالنسبة لسوزان تميم وطلعت مصطفى والسكري .. لكن فين المنطق اللي يقنع ان محمود عيساوي الواد النقاش ولا السباك حب يسرق شقة في الشيخ زايد قام قتل بنتين .. وده اللي المسلسل بيتعرض له وبيحاول يكشف الحقيقة اللي لو اتكشفت وقتها او بعدها كانت حتوقعّ ناس كتير اوي وحتورط ناس كتير اوي .. وحتقلب التربيزة على دماغ ناس كبيرة اوي .. والبلد مش ناقصة وجع دماغ دلوقتي .. واخلصوا بقى واعدموا الواد العيساوي وسك ع الموضوع واكفي ع الخبر ماجور.

حينتهي على ايه المسلسل ؟ مش عارف .. حتظهر الحقيقية وينتصر الحق ؟ .. مش عارف .. حيتعدم رمضان زي ماحصل في الحقيقة ؟ .. برضه مش عارف .. لكن اللي لافت نظري حاجة تانية خالص .. وهى خاصة ببلال فضل .. ومسلسله اللي بيقول ان الحكومة منعت عرضه عشان بيتعرض بشكل سخيف لانتهاكات الشرطة .. ومتهيألي مهما كان مسلسل بلال فضل " اهل اسكندرية " قال ماقاله مالك في الخمر في حق رجال الشرطة ، مش ممكن حيكون ابدا زي مسلسل " ابن حلال " اللي بجد يخليّك تكره الشرطة واللي خلفّوها خصوصا انه مش محدد وقت زمني لأحداث المسلسل ، فممكن يكون اللي انت بتشوفه على الشاشة هو اللي بيحصل دلوقتي بعد الثورتين وبعد السيسي ما مسك كمان.

عشان كده انا عندي قناعة ان عدم عرض أهل اسكندرية مالهوش علاقة بموضوع المسلسل والشرطة ، لكن له علاقة بمين اللي كتب المسلسل ومين اللي بيمثله .. يعني بصريح العبارة كده المسألة متعلقة ببلال فضل كشخص والأخت بسمة الممثلة والسيد عمرو واكد الممثل .. والتلاتة في عين العدو ضد اللي حصل في 30 يونيو وضد الحكم العسكري وضد حتى نفسهم .. يعني باختصار واحد زي بلال فضل اصبح غير مرغوب في وجوده حاليا .. مع انه – وهذه مهمة جدا – كان مرضي عنه ع الأخر في فترة مابعد الثورة الاولى وماقبلها بشوية .. واتفتح له الباب على مصراعيه بشكل غير منطقي وغير مستساغ ليكتب سيناريوهات افلام ومسلسلات وينتشر سي بلال فضل ويبقى في اقل من سنتين مليونير .. مش زي مليونيرات حيتان " يعني معا يجي 4 مليون وشوية .. مش وحشين .. يمشي الحال برضه" المهم افتح افتح افتح ..


واكتب اكتب اكتب ياعم بلال .. واقبض اقبض اقبض ياراجل ياطيب .. وبس كفاية عليك كده .. لقد أديت مهمتك على أكمل وجه واخدت حقك كامل ومكّمل ، واتشهرت وبقيت تيجي في التليفزيون ولبست تيشرتات جديدة ومستوردة من عند " زارا " بتاع الناس الهاى لايف الاغنياء .. وكده خلصت خلاص .. تعالى بقى على جنب واركن وعيش عيشة اهلك .. فواضح انك صدقت نفسك وانك بجد كاتب كبير .. مش احنا اللي صنعنا منك كده لغرض ما .. على رأى المثل " خلصت حاجتي من عند خالتي " .. خالتي انا مش خالتك فرنسا ياعم بلال.

وبعدين نقطة تانية وهامة جدا كنت حنساها .. انت مش في مسلسل اهل كايرو اللي كان من سنتين مطلّع ضابط الشرطة اللي هو خالد الصاوي اجدع راجل في الدنيا دي كلها وضابط شريف ومحترم ومفيش منه اتنين وخلتنا نحب ضباط الشرطة من ادبهم ورقتهم وخفة دمهم كمان .. اشمعنى بقى لما رحت لأهل اسكندرية خلّيت ضابط الشرطة " كخه " ووحش وابن ستين في سبعين ومتقلعوش من رجلك ؟ .. يبقى انت دماغك ياعم بلال فيها حاجة مش حلوة .. وعموما واضح ان دورك انتهى لحد هنا .. وبيني وبينك اللي انت اخدته الاربع سنين اللي فاتوا مش قليل ابدا يابلال .. احمد ربك .. غيرك كتير رقص وغنّى وعمل اكتر من المطلوب ولا اخدش اللي انت اخدته .. يابلال يا ابن عم فضل. !