أحمد عفيفي يكتب :عم الشيخ مظهر .. صليت العشا ولا عندك هوا؟

مشكلة 25 يناير مش ان اللي قاموا بيها في البداية ناس متأجرة ولا كان يهمهم مصر ولا يحزنون .. هما بس قبضوا ونفذوا مخطط معين معتمد من بره .. ولا مشكلتها ان الإخوان نطوا عليها وركبوها من ضمن المخطط برضه .. مشكلة 25 يناير في اللي ركبوها من سكة تانية .. " اصل الركوب كان من كذا سكة " .. اللي قالك مولد وصاحبه غايب .. واللي قالك مادام اقدر اخش واقلّب عيشي ماخشش ليه .. ياعم كله قاعد ياكل ويملي بطنه .. يعني هى جات على أمي انا!
مين دول بقى .. مجموعة الثورجية اللي غزوا الشاشات الفضائية بعد الثورة .. اللي بقى ضيف دائم ع البرامج .. يخرج من ستوديو يروح ستوديو ونفس البقين اللي بيطرشهم هنا يطرشهم هناك .. زي مثلا الله يمسيه بالخير عمرو حمزاوي .. اللي زهقنا شكله ونكشة شعره من كتر ماشفناه .. وزي مثلا معتز بالله عبد الفتاح اللي ركب هو كمان وبقى مذيع ومحلل سياسي وعمل في سنتين بس اللي ماقدرش يعمله في عمره كله .. وبرنامج هنا وبرنامج هناك .. وبعدين منصب كبير حسب ماعرفت في جريدة الوطن واقبض يامحترم وستّف الالافات جنب بعضها .. وامسك دايما العصاية من النص .. لو مرسي زفت متقلش عليه زفت اوي عشان ادخل لجنة المائة بتاعت الغرياني ودستور مرسي " المعفن " واتصور في التليفزيون جنب الغرياني واقول في البرنامج بتاعي " ما انا قبضت بقى " .. انه دستور توافقي وفيه حاجات حلوة كتير.
هى مشكلة .. تلاقي مثلا ممثلة اتحجبت واعتزلت التمثيل .. كتر خيرها .. هى حرة .. تقوم القنوات الفضائية - بعته غير مسبوق - تجري وراها عشان تقدم برنامج ديني مستغلين اسمها ونجوميتها قبل ما تتحجب .. يعني الغرض تجاري بحت والاسم ان انا بقدم برنامج ديني .. والممثلة دي ممكن جدا تكون حتى مش بتقرا جرايد الصبح ولا عمر اللي خلفوها فتحت كتاب ولا حتى بتاع ابلة نظيرة .. تعرف ايه بقى هى عن الدين عشان تبقى مذيعة وتناقش رجال دين كبار في امر ما؟ .. انما تقول ايه .. رزق الهبل ع المجانين !
لكن مين بقى اللي فعلا غايظني وفاقع مرارتي وهو السبب اللي خلّاني اكتب مقال النهارده ؟ .. اقولكم : عم الشيخ مظهر شاهين امام مسجد عمر مكرم واللي اطلقوا عليه إمام الثورة المصرية .. وكأنه الامام الخميني مثلا .. انا هنا مش بشكك خالص في وطنية عم الشيخ ولا إخلاصه للثورة والشارع المصري ..
لكن .. الراجل من بعد الثورة الاولى بتاعت 25 يناير هوبا نط وراح داخل على الفضائيات كضيف من الضيوف الدائمين زي عمرو حمزاوي .. ولقى نفسه بيقبض حلو من هنا ومن هنا .. قام صحي الصبح وهو بيحلق دقنه " حلاقة عادية يعني زينا كلنا " .. بص في المراية لقى نفسه وسيم وحليوه .. وحكاية التليفزيون دي لها بريق وشهرة جميلة .. قام ايه قالك اشتغل مذيع .. اللي بقت دلوقتي مهنة من لا مهنة له .. طيب ايه مؤهلاته عشان يكون اعلامي ومذيع قادر على ادارة حوار واستضافة ناس من هنا وهناك .. ولا حاجة .. لكن فلوسها اكتر بكتيييييير من كونه ازهري ووظيفته إمام مسجد عمر مكرم .. طيب ماشي ياعم الشيخ ياحليوه .. الله يسهل لك .. اقبض انت كمان وحط على قلبك " ماهى سبوبة بنت كلب .. وسجعة وحلوة مشربش ليه " .. بس تتفلسف وتروح قايل كلمتين في منتهى العبط وانت راجل دين ، مع اني اشك جدا في كم معلوماتك الدينية والشرعية ، .. وتفتي بأن اللي متجوز اخوانية يجوز له تطليقها .. وبعدين قال يعني انت حقّاني اوي ومتحبش الظلم تقوم قايل : بس يدّيها كل حقوقها الشرعية زي الكتاب مابيقول.
يخرب بين دماغك .. انت جبت أم الفتوى دي منين ؟ .. ياراجل ده مفيش اسرة في مصر مفيهاش واحد اخواني .. فلو طلع الواحد ده واحدة ست ومراتي ، اقوم اطلقها عشان خاطر عم الشيخ مظهر شاهين قال كده .. لأ وشوف البجاحة وهو بيقول : مراتي .. ولا مصر؟ .. عشان نرد عليه طبعا : مصر هى امي ونيلها جوه دمي وشمسها في سماري وشكلها في ملامحي .. ملعون ابو مراتي بنت الكلب الاخوانية اللي نايمة جنبي بقالها اربعين سنة وانا معرفش انها " كافرة ".
طيب .. حامشي معاك في هذا العته والغباء لأخره .. خلاص مراتي وطلقتها .. في ستين داهية .. حتى لو مش اخوانية ، حاطلّع عليها اشاعة انها اخوانية بنت كلب عشان اطلقها وانا مرتاح الضمير .. انما لو بنتك هى كمان إخوانية .. " ماهو المثل بيقول اقلب القدرة على فمها تطلع البت لامها" .. اطلقها هى كمان ؟ مينفعش .. يبقى اتبرى منها مثلا ؟ .. ولا ايه رأيك اقتلها واخلص من همها ومصاريف تعليمها وجوازها وتشويرها والذي منه .. طيب بلاش بنتك .. اختك اخوانية .. حتعمل ايه ياعم الشيخ يابتاع الاونطة .. ابّلغ عنها امن الدولة ولا اجيب سكينة واجز رقبتها ؟ .. طيب بلاش مراتك ولا بنتك ولا اختك .. خلينا في أمك ياعم الشيخ مظهر .. والكلام ميزعلش حد .. حافترض مجرد فرض ان الست والدة سعادتك ياعم الشيخ يا سكرة اخوانية .. حتعمل ايه ويّاها ؟ .. لأ وكمان إخوانية متشددة .. بتمشي في المظاهرات وترفع اشارة رابعة .. طبعا معندكش رد الا اذا قلت لي مصر هى امي .. وامي هى مصر .. مش ممكن اقتل دي ولا دي .. ولا اتبرى من دي ولا دي!
اسمع ياعم الشيخ ياللي الصبح لابس جبة وقفطان .. وبالليل ياختي عليك قمر بالبدلة والكرافتة .. كل عيش وبقلاوة وسيب قناة وروح قناة ، واللي يدفع اكتر انا خدّامه .. بس بلاش هبل وحياة والدك .. مش ناقصة عبط .. لو مراتك اخوانية .. طلقها انت حر .. ولو اختك او بنتك او امك اخوانيات .. ولّع فيهم بجاز .. بس تطلع في التليفزيون وتقول الكلام العبيط الاهبل ده .. عيب .. بوس ايدك وش وضهر انك عرفت تسلّك أمورك وبقيت مذيع .. لكن تستعبط فيها وتسوق الهبل ع الشيطنة .. حارجعك تاني كما كنت ..
الا بالمناسبة صليت العشا حاضر ولا كان عندك برنامج هوا؟
..مساء الفل ياعم الشيخ!