عودة زوار الفجر فى عهد الإخوان.. أهالى المتهمين فى أحداث بورسعيد يصرخون أثناء التحقيق مع أبنائهم «يسقط حكم الإخوان»

فى محكمة دمياط الإبتدائية تجرى الآن وقائع التحقيقات مع 35 متهما فى أحداث بورسعيد بعد إنتقال نيابة بورسعيد لمبنى محكمة دمياط لإجراء التحقيقات.

عويل وصراخ أهالى المتهمين يملأ شوارع قرية شطا التى تقع بها المحكمة يقول حامد حامد حسن إبراهيم شقيق أحد المتهمين وحاصل على بكالوريوس حاسب آلى النهاردة الساعة 6 صباحا دخلت علينا البيت فى بورسعيد شرطة لابسة أسود ومعهم رئيس مباحث حى الزهور هانى الشافعى ومعاهم مخبرين بشقتنا بمنطقة عمر بن الخطاب عمارة 74 شقة 5 .

وحطوا الرشاشات على رقبة أبويا وإحنا على السرير وحطوا الأوالى على رقبتنا كلنا وناس مقنعين من الحراسات الخاصة ولابسين أسود وقيمونا من على السرير وأخدوا أخويا هيثم حامد حسن 25 سنة صاحب محل غيار زيت ولما سألنا عن إذن النيابة قالوا لنا مافيش إذن نيابة إحنا فى طوارىء ياحبيبى.

ونسيت أقول إنهم كسروا باب الشقة وأخويا مظلوم وشعب بورسعيد مالوش فى العنف واحنا سمعنا إن فيه 200 فلسطينى من حماس كانوا بيضربوا نار والأهالى مسكتهم وسلموهم للشرطة.

وتقول سهير محمد الشيخ 60 عاما مقيمة بمنطقة السلام عمارة 134 شقة 5 أخدوا إبنى توفيق حسن رزق 27 سنة والسيد حسن رزق 32 سنة والإتنين بيشتغلوا مقاولين أشغال بحرية النهاردة بعد صلاة الفجر صلينا ونمنا شوية لقينا باب البيت بيتكسر علينا ولقيت ناس لابسة أسود جوا فى قلب البيت ولما صرخت قالوللى أسكتى ياست إنتى ولما سألنا عن إذن النيابة قالوا مافيش أذون.

ويقول هلال شلوف 60 عاما أخذوا إبنى محمد شلوف 23 سنة طالب شريعة وقانون الفجر الساعة 5 ونص.

ويضيف على فراج 56 سنة صياد أخدوا إبنى إسلام إمبارح ظلم وتقول فتحية عوض إبراهيم 48 سنة موظفة بهيئة الإستثمار أخدوا إبنى ظلم.

وتضيف صالحة السيد زكى ربة منزل والدة المقبوض عليه محمد عادل عبد الفتاح بندق مواليد 90 وحاصل على بكالوريوس حاسب آلى إبنى كان نايم أول إمبارح الساعة 9 ومافيش إذن نيابة وكان نايم فى السرير وأخدوه وهو لابس لابس شورت وتيشيرت من تحت اللحاف.