ماسكات بالزيوت الطبيعية لشعر أتقل وأطول

أعدّتها للنشر: آية خالد
أهلا بكل بنات "قمر 14" في حلقة جديدة من "جمالك من الطبيعة مع رانيا"، والنهارده هنقدّم لك ماسكات بالزيوت الطبيعية علشان شعر أتقل وأطول وصحي وجذّاب..
ماسك زيت الخروع بالثوم لتساقط الشعر
المقادير:
كوب زيت خروع
راس ثوم مفرومة بقشره
الطريقة:
- اخلطي كوب زيت الخروع مع راس التوم بعد ما تفرميها، ولكن لازم تكون بقشرها، وسيبيهم في زجاجة لمدة من شهر ل3 شهور، لحد ما يتعتّق وبعدين صفّيه، واستخدميه على جذور الشعر بعد ما تغسليه، بشكل منتظم جدا؛ لأنه زي المضاد الحيوي لازم تثّبتي مواعيد استخدامه؛ سواء هتستخدميه مرة أو مرتين في الأسبوع.

إضغط لمشاهدة الفيديو:
ماسك زيت السدر لتطويل الشعر
المقادير:
5 ملعقة كبيرة زيت السدر
ملعقة كبيرة زيت اللوز الحلو
ملعقة كبيرة زيت جوز الهند
ملعقة كبيرة زيت الكاموميل
3 ملعقة كبيرة زيت جرجير
ملعقة كبيرة زيت خروع
ملعقة كبيرة زيت زيتون
ملعقة كبيرة زيت الثوم
الطريقة:
- ضيفي مجموعة الزيوت على بعضها وقلّبيها كويس، وحطّيها في زجاجة، واستخدميها كماسك لشعرك مرة أو مرتين في الأسبوع، وحطّيه على شعرك لمدة ساعتين على الأقل، وهتلاحظي النتيجة بعد شهر من المداومة عليه؛ لأنه بيساعد جدا على تطويل الشعر ولمعانه وتغذيته.

إضغط لمشاهدة الفيديو:
ماسك زيت السدر وزيت الصبار لعلاج قشرة الشعر
المقادير:
ملعقة زيت صبار
ملعقة ونصف زيت السدر
الطريقة:
- اخلطي الزيوت على بعضها كويس أوي، وحطّيها على شعرك لمدة ساعة أو ساعة ونص مرتين في الأسبوع، وده بيعالج القشرة وبيغذّي الشعر وبيساعد على تطويله.
ماسك لبن جوز الهند لعلاج تساقط الشعر
المقادير:
ليمونة
3 ملعقة كبيرة لبن جوز الهند
الطريقة:
- اعصري الليمونة على لبن جوز الهند، وقلّبيهم مع بعض كويس جدا، وحطّيهم باستخدام فرشاة الصبغة على فروة راسك، لحد ما تتأكّدي إنك حطيتي على كل جزء من شعرك، واقعدي بيه لمدة ساعة واشطفي شعرك.

إضغط لمشاهدة الفيديو:
ماسك المريمية لتغميق لون الشعر
المقادير:
2 ملعقة كبيرة مريمية مطحونة
3 ملعقة كبيرة زيت المريمية
ملعقة كبيرة زيت الجرجير
ملعقة كبيرة زيت الزيتون
ملعقة كبيرة زيت السمسم
الطريقة:
- اخلطي المكوّنات على بعضها، وحطّيها في زجاجة، وسيبيها لمدة أسبوع أو 10 أيام، وبعدها استخدميه على فروة راسك وشعرك لمدة 3 ساعات مرتين في الأسبوع لمدة 3 أو 4 شهور، وهتلاحظي فرق كبير في لون شعرك.

إضغط لمشاهدة الفيديو:
لوسيون الليمون للبشرة والشعر
المقادير:
1⁄4 كوب ماء
بشر ليمونة كبيرة
الطريقة:
- اغلي بشر الليمون في الميه لمدة ساعة، واحتفظي بيه كلوسيون في زجاجة في التلاجة، وتقدري تستخدميه لشعرك ولفروة راسك، وسيبيه لمدة ربع ساعة واشطفي شعرك، وبالنسبة للبشرة فممكن تستخدميه كقابض للمسام، وكمان ممكن تعملي بيه مساج لبشرة جسمك، وبعدين تشطفيه.

إضغط لمشاهدة الفيديو:
وبكده تكون خلصت حلقتنا النهارده..
استنونا في الحلقة اللي جاية..
سلام،،،