سلطة المكرونة بالتونة

أعدّها لكم: جوينا عبد الغفار
النهارده هنعمل سلطة التونة بالمكرونة، بناء على طلب أصدقائنا اللي عايزين يجدّدوا في الطريقة اللي بيقدّموا بها التونة، ووصفتنا النهارده سهلة وبسيطة جدا في تحضيرها..
سلطة المكرونة بالتونة
المقادير:
* 1⁄2 كيلو مكرونة مسلوقة
* علبة تونة قطعة واحدة مصفاة من الزيت
* 1⁄2 ثمرة كرنب أحمر مقطّع قطع صغيرة
* 1⁄2 كوب جزر مقطّع مكعبات ومسلوق
* 4 ملعقة صغيرة عصير ليمون
* 1⁄4 كوب بقدونس مفروم
* 1⁄2 كوب بسلة مسلوقة
* 1⁄4 كوب شبت مفروم
* 1⁄2 كوب مايونيز
* زعتر ناشف
* ملح وفلفل
الطريقة:
1- تبّلي المايونيز بالزعتر وعصير الليمون والملح والفلفل، على حسب ذوقك، وقلّبي الصوص ده مع التونة.
2- اخلطي المكرونة مع الجزر والبسلة والكرنب الأحمر والشبت، وضيفي عليهم صوص المايونيز والتونة، وفي الآخر ضيفي البقدونس، وقلّبيهم مع بعض، وبعد كده ممكن تقدّميها على طول، أو تحطّيها في الثلاجة شوية، وتخرّجيها قبل الأكل على طول.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،