هل من حق أمين الشرطة إنه ياخد بطاقتي؟؟

أحب إن سيادة المستشار يوضّح بعض أشكال التعسف، ويا ريت برضه يوضح هو هل من حق أي أمين شرطة إنه ياخد بطاقة الشخص في أي حالة؟؟
zaeem
في البداية أحب أن أوضح أن رجال الشرطة هم المسئولون قانونا عن الحفاظ على الأمن في الدولة دون إساءة استعمال هذا الحق، ومن صور هذا حجز أو حبس أحد دون سند من القانون أو تعريض حياة الناس للخطر سواء بالضرب أو الجرح أو القتل، فضلا عن ذلك إهانتهم بالألفاظ أو الإشارة، وكل هذه الأفعال معاقب عليها جنائيا وتأديبيا.
ورجال الشرطة بصفتهم من مأموري الضبط القضائي يحق لهم استيقاف الأشخاص لبيان هويتهم دون إساءة في استعمال حقهم، وهذا الإجراء يدخل ضمن ما يسميه القانون المنع الوقائي من حدوث الجرائم.
أولا أنا باشكر موقع "بص وطل" على مجهوده واهتمامه العالي بمشاكلنا وهمومنا، وأنا محتاجة استشارة قانونية..
الحكاية إن جهاز الشرطة عمل مشروع ستة أبراج بنظام اتحاد الشاغلين لأي حد في مزادات، وكل الشقق تم بيعها لضباط ولواءات، ما عدا الأدوار رقم ثلاثة وستة من كل برج كانوا يتم بيعهم.
وكل برج مكون من 80 شقة، وكان شرط أساسي لاستلام الشقق إن كل واحد يدفع خمسة آلاف جنيه تأمين، ويتحطوا في البنك، وكل برج ينتخب من سكانه أعضاء مجلس لإدارة شئون البرج ويبقوا مسئولين عن الفلوس 400 ألف جنيه واللي من فوائدهم (ثلاثة آلاف شهري) المفروض إنه هيعمل صيانة للمصاعد وخزانات المياه، ويدفع مرتبات رجال الأمن ومرتب البواب، ويدفع فلوس المياه والكهرباء.
المهم إن خمس أبراج ماشيين بالنظام ده وماعندهمش أي مشاكل؛ لأن نظام الإدارة عندهم حكيم وفي منتهى الأمانة، لكن المشكلة في البرج اللي أنا ساكنة فيه، من ساعة ما مسكوا الإدارة ومش بيعملوا صيانة، وبيقولوا إن الفلوس مش مكفية وفرض علينا إن كل شقة تدفع له 30 جنيه شهريا، وأصبح الدخل الشهري 30 × 80 + 3000 = 5400 جنيه، ومانعرفش هو بيصرف الفلوس في إيه؛ لأن المصاعد فيها مشاكل لعدم الصيانة، بالإضافة إن فنطاس ميه وقع نتيجة عدم عمل صيانة للقاعدة الخاصة بيه.
ولما سألنا فلوسنا بتروح فين؟ قال إنه لمّع رخام العمارة ب20000 جنيه، وكل ما نسأله فين الإيصالات يقول ما فيش، وده كلام لا يعقل ودلوقتي عايزنا:
1- ندفع 600 جنيه إجباري علشان الصيانة وإلا يقطع عننا الميه.
2- حتى جراجات البرج عايز يأجرها للسكان، وبقينا زي ما نكون ساكنين عنده.
وبيقول علشان هو أمين الصندوق لازم نسمع الكلام وإلا هيرفع علينا قضايا ويقطع عننا الميه.
المشكلة إن أنا حاسة إنه بيضحك علينا، وإن السكان في برجنا سلبيين وعمالين يقولوا لي اللي هيسرى عليهم يسري علينا وخلاص، مع إن الأبراج التانية ماعندهاش المهزلة دي وفلوسهم مكفية.
فهل هناك أي إجراءات قانونية لازم أعملها بدل ما يتمادى أكتر من كده؟
rana
من ظاهر كلامك يتضح أن هناك أشياء غير قانونية، لذلك يحق لك رفع دعوى قضائية تسمى دعوى محاسبة، أو إذا كان هناك شبهة في اختلاس، على أساس أن القائمين على الخدمة العامة تعتبر أموال المنتفعين في حكم المال العام، فممكن إبلاغ النيابة العامة لو كانت شكوكك لها دليل.. وممكن التقدم بشكوى لرئيس اتحاد الملاك بتضررك من هذا الأمر، وذلك طبقا لأحكام القانون.