د. أبو الغيط ينصح بالمفاتيح السحرية للتخلّص من السمنة

الريجيم عند ناس كتير معناه حرمان من الأكل ومحاولات كتيييييييير من غير نتيجة وإحساس دائم بالإحباط..
إزاي نتغلّب على الإحساس ده، ونوصل للوزن المناسب من غير تعب وحرمان؟!
هو ده السؤال اللي هيجاوب لنا عليه د. محمد أبو الغيط، الأستاذ بكلية طب جامعة القاهرة وسكرتير عام الجمعية الطبية المصرية لدراسة السمنة، اللي هنعرف معاه في حوارنا المفاتيح السحرية للتخلّص من السمنة..
هل لازم نتّبع نظام غذائي لو وزننا زايد علشان نوصل للوزن المثالي؟
إحنا بنقول لو السمنة زيادة عن حدود معينة بتبقى حالة مرضية؛ زي السكر والضغط، ومشكلة السمنة إنها ممكن تسبب أمراض تانية؛ فالفكرة إن بعض الناس بيبقى لازم إنها تنزّل وزنها علشان تحافظ على صحتها.
وفيه حالات تانية بتكون محتاجة تنزّل وزنها علشان تحصل على شكل مثالي.
وفي الحالتين بنكون محتاجين إننا نحبّبهم في النظام الغذائي والحركي اللي لازم يتّبعوه، وحتى إن كانوا قبل كده اتّبعوا نظام غلط ماقدروش يخسوا به، وسبّب لهم إحباط وإحساس بالفشل، بنعمل لهم نظام جديد يكون مفصّل على حالتهم الجسدية والنفسية.
هل فعلا الريجيم يعني حرمان من كل حاجة بنحبها؛ ولّا ممكن نمشي على ريجيم ونوصل للوزن اللي إحنا عايزينه من غير ما نحس بأي حرمان؟
كلمة ريجيم تعني نظام نتّبعه علشان نوصل لهدف معين، يعني فيه ريجيم لعلاج النحافة، وفيه نظام غذائي لتثبيت الوزن.
اللي عايز أوضّحه إننا لو نظّمنا الأكل والحركة بطريقة سليمة فده مش هيبقى حرمان؛ لأن الحرمان هنا يضر، لأنه هيستمر أسبوع أو اتنين، وبعد كده الجسم هيبدأ يقاوم الريجيم، وده اللي بيخلّينا ما نقدرش نكمّل ونحس بالإحباط.
هل نقدر نمشي على أي ريجيم نلاقيه على النت أو أي حد يوصفه لنا؟
في أوقات كتير ممكن يبقى صح، لكن في بعض الأحيان لو أخدنا نظام غذائي بتاع شخص معيّن وطبّقناه على شخص تاني ممكن يضرّه؛ يعني مثلا لو إدينا نظام غذائي بتاع شخص سليم لشخص عنده مرض السكر يضرّه.
لكن فيه مبادئ عامة ممكن نطبقها على الناس كلها، لكن مبدأ تطبيق ريجيم من شخص لشخص ده مبدأ خطأ.
عايزين نعرف المفاتيح السحرية علشان نقدر نحافظ على وزننا وصحتنا..
- علشان نتمتع بصحة كويسة وجسم مثالي لازم نرجع للنمط الحركي والغذائي بتاع زمان؛ لأننا استجد علينا الأكلات الدسمة والسريعة والساندويتشات الجاهزة، كل ده لازم نقلله.
- نحاول نقلل من استخدام المواصلات والأسانسير في تحركاتنا، ونرجع مرة تانية للمشي واستخدام السلالم.
- الاهتمام بتناول وجبة الفطار الصبح، ونحاول نبطّل عادة تناول الأكل بالليل قدام التليفزيون، يعني نزوّد في وجبة الفطار ونقلل في وجبة العشاء.
- الإكثار من تناول الفاكهة والخضراوات الطازجة؛ دي لوحدها كافية إننا نبدأ نخس على المدى البعيد، صحيح ده مش ريجيم؛ لكنه بيحافظ على الوزن.
وفي النهاية عايز أوضح إن علاج السمنة حاجة زي علاج السكر والضعط بيستمر العمر كله، فلازم ما نحبطش وما نستعجلش، والشخص اللي عنده قابلية للسمنة محتاج إنه يهتم دايما بالحفاظ على وزنه من غير حرمان.

وبكده خلص عددنا النهارده..
تابعونا دايما مع نصايح أكتر لجسم مثالي..
سلام،،،