كنا متفقين مش هنجيب أطفال غير بعد 3 سنين

أنا مشكلتي محيراني أوي، أنا متزوجة من حوالي 5 شهور عن حب والحمد لله، وكنا متفقين أنا وجوزي إننا نفكر في الأطفال بعد 3 سنين؛ عشان نكون عشنا حياتنا وحسّنّا وضعنا المادي، عشان نعرف نربي الطفل ده.
بس بعد الزواج هو ابتدى يحنّ للفكرة كل ما نقعد مع أخوه وابنه اللي ماتمش سنة، أو كل ما نخرج مع أطفال.. ومانكرش إن أنا كمان حنيت ليها شوية؛ بس برضه دي حالة ومشاعر لمجرد الفكرة، ومن غير تفكير واقعي.
أنا اللي مخوفني إني كل ما بافكر هو أنا هاجيب طفل ليه؛ باقول لنفسي: عشان جدتي كبيرة ونفسها تشوف حفيد، وعشان حماتي -بعد ما حمايا توفي- ابننا هيسعدها ويشغلها، وعشان مامتي تفرح بأول حفيد، وعشان جوزي نفسه في طفل؛ بس عمالة أفكر في سبب أقوله عشاني، مش لاقية.
مش عايزة أعيش باقي عمري باقول لو ماكنتش جبته كنت عملت كذا وكذا، وبيعذبني إني عارفة إن الأطفال نعمة كبيرة أوي من ربنا، وأنا بابعد عنها وباهرب منها؛ بس إحنا لسه ماعشناش!
بعد الفرح بشهرين حمايا توفي، وقعدنا شهرين مع حماتي، ولسه راجعين لحياتنا الطبيعية في بيتنا؛ يعني الاسم متجوزين من 5 شهور؛ بس لسه بادئين نعيش مع بعض.
أنا خايفة بس مش مانعة الحمل، وسايباها على ربنا؛ أكيد الوقت اللي هييجي فيه "لو ربنا أراد لنا الأطفال" هيبقى أحسن توقيت مهما كان؛ بس أنا خايفة من نفسيتي.

R.E


لو عايز تفضفض لنا دوس هنا