اصبري قليلاً ولو الطلاق مقدّر ففي بدايته أفضل

أنا مشكلتي إني مكتوب كتابي من حوالي 5 شهور وأنا اللي اخترته ووقفت أمام كل الناس وأهلي كمان، علشان يوافقوا على كتب الكتاب؛ مع إن كل اللي حواليّ كانوا رافضين تماماً لأننا ما كناش مخطوبين إلا من 4 شهور بس، ومعرفتي بخطيبي كانت عن طريق زمالة في العمل، ووافقت عليه لأنه كان على خلق ومتدين، ولم أنظر إلى حالته المادية؛ بل اكتفيت بالأخلاق والدين.
المهم خطيبي طلب كتب الكتاب علشان يقدّم على شقة بالقسيمة؛ يعني كتبت كتابي من غير شقة، والمشكلة إنه لغاية دلوقتي وبعد مرور حوالي 5 شهور ما فيش شقة ولا فلوس ولا أي حاجة، وحصلت مشاكل كتير بيننا؛ لأنه كان عايزني أرضى إني أتجوز مع أمه وإخواته، وكمان هنفرش الشقة بالتقسيط.
وبعد ما كنت حاسة بأمل في بكرة؛ لقيت الدنيا اتقفلت في وشي، وهو ما حاولش يحسّن ظروفه، ولا عمل أي حاجة خلال الفترة دي كلها.
ولما قررت الانفصال رفض بحجة إنه مش هيقدر يستغنى عني، ووعدني إنه هيتغير وهيعمل كل اللي في وسعه.
وأنا مش عارفة أعمل إيه.. أنفصل عنه وأبقى مطلقة؟؟ مع العلم أني أسكن في منطقة شعبية وكلمة مطلقة هتبقى صعبة أوي، ولا أدي له فرصة تانية وأجرّب.. يمكن يعمل حاجة؟
أرجوكم ساعدوني.. أنا حاسة إني اتدمرت ومش عارفة أعمل إيه؟؟
البنت الشقية
لوعايز تفضفض لنا دوس هنا