كرويات.. أهلاوي اتجوز زملكاوية.. "ستتها"!

لا تتعجب إذا تولى الفنان هاني شاكر تدريب الزمالك!.. ولا تندهش إذا تم اختيارك ضمن منتخب مصر للمشردين.. ولا تستبعد أن تشاهد الدوري المصري حصرياً على قناة SPACE TOON رغم اعتزال الكابتن ماجد!!
يقولون إنها (الساحرة المستديرة)..
لكنها تثبت دوما إنها (الساخرة المستديرة)!
هذه هي آخر كلمات صديقي الاستاذ محمد مصطفى الكاتب الصحفي بأخبار اليوم الذي أصدر كتابا رائعاً ساخراً مليء بالمقالات الساخرة صاحبة "الدم الخفيف" ومنها على سبيل المثال "الدنيا كورة × هوا"..
وفي مكالمة تليفونية دارت بيننا باركت له واستأذنته أن انقل لكم كام مقالة "خفيفة".
في صفحة 71.. وتحت عنوان أهلاوي اتجوز زملكاوية.. " ستتها "!
إذا أجرينا استفتاء بين المصريين، عن أقرب مجالين لقلوبهما، ستكون النتيجة 99,99% الكورة والنكت!.
ولا تعلق على نتيجة الاستفتاء.. اشمعنى ده!
لعبة (هات وخد) بين المجالين، ملأت مواقع الإنترنت والمنتديات بمئات النكت والفوازير الكروية، منها اللاذع اللي (في الجون)، ومنها منزوع الدسم، ولك الحكم والاختيار والتقييم.
- حارس مرمى اتخانق مع مراته.. راح شايطها (أيد ورجل)!
- ليبرو ماشي في الشارع مع مراته.. فجأة رجع للخلف 10 خطوات.. مراته سألته: أنت رجعت كده ليه؟.. قالها: عشان أبقى كاشف الشارع كله!
- نفس الليبرو كان ماشي في نفس الشارع مع مراته.. فجأة طلع لقدام 10 خطوات.. سألته: ليه؟.. قالها: عشان أكشف الأوف سايد!
- واحد مسطول بيلعب كورة أخد الكورة على صدره.. طلعها من "مناخيرة"!
- واحد راح شركة طيران عشان يحجز تذاكر ماتشات الأهلي في اليابان.. المضيفة سألته: ذهاب وإياب؟.. قال لها: لأ خروج المغلوب!
- فريق غبي بيلعب ماتش مهم جالهم بنالتي في آخر دقيقة، دخل أحسن لعيب عندهم وشاط الكورة آوت.. ليه؟.. عشان التعادل في مصلحتهم!
- ليه أبوتريكة بيلبس (22)!!.. عشان (21) ضيقة عليه!.. طب ليه مايلبسش (23)
عشان "فلافيو" كان لابسها ووسعت!
- طب ليه الأطفال بيحبوا أبوتريكة عشان (صانع ألعاب)!
- ليه مدرب تشيلسي مش بيلاعب (بالاك) أساسي؟.. عشان تامر حسني بيقول ريح (بالاك)!
- ليه بتوع مانشيستر يونايتد بيصحوا من النوم بدري؟ عشان عندهم (سكولز)!
- لاعب كورة مصاب.. التحق بمعهد الموسيقي العربية.. قسم العزف على (وتر أكيليس)!
- واحد راح لدكتور نفساني، قال له: يا دكتور أنا تعبان جداً وكل ليلة با شوف حلم غريب
أن فيه فريقين من الأرانب بيلعبوا ماتشات كورة على استاد القاهرة.. والجمهور مالي
الاستاد و بيشجع جامد.. الدكتور قال له: حالتك بسيطة خالص -خد الحباية دي- ومن
النهاردة مش هاتشوف الحلم ده تاني.. الراجل قال له: طب ممكن آخد الدوا من بكره.. عشان النهاردة النهائي!
- أهلاوي اتجوز زملكاوية.. (ستتها)!
- مجموعة (نمل) بيلعبوا ماتش.. بيلعب معاهم (صرصار) ليه؟ لاعب محترف!
- فيه نمله ماسكة رأسها ليه؟ لسه مضيعه بنالتي!
ودي كانت أخر حاجة في الصفحة 74.. أنا عن نفسي استمتعت بوجبة خفيفة وسط زحام "القرف والغلاسة الكروية"، والمشاغبات الغير محترمة عبر الفضائيات "الأهلية".
ولا ننسى الشكر لأبو مصطفى وعقبال الكتاب الألف بنفس الدم الخفيف.. ونستأذن في كام مقاله أخرى بعنوان..
"هاني (فلانتين) زمالك!
"هاني شاكر مديراً فنيا للزمالك!"
ال(بيبو 9001) شهادة ضمان اللاعب المصري!
"في السكس يارد.. (+18)!
"مونديال المشردين".. الكورة هي الحل!"