نصائح مصفف الشعر "محمد يونس" للعناية بالشعر

أنا سعيدة جداً إني معاكم النهارده، ومعايا ومعاكم مصفف الشعر "محمد يونس"..
والنهارده حلقتنا هتكون مختلفة شوية؛ لإن المرة دي أنا اللي هعمل اللوك الجديد...
وهنشوف مع بعض خطوات عمل تسريحة رقيقة ممكن تعمليها لو عندك مناسبة أو سهرة...
وكمان هنتكلّم مع مصفف الشعر "محمد يونس" عن أكتر المشاكل اللي البنات بتعاني منها مع شعرها، وهي مشكلة ضعف الشعر ومشكلة الشعر الخفيف..
أسباب ضعف الشعر
فيه أسباب كتيرة لضعف الشعر، ومن الأسباب الرئيسية اللي بتسبب مشكلة الشعر الخفيف؛ هي الربط العنيف للشعر واستخدام الزيوت في دهان الشعر والقشرة وكمان التغذية السيئة، وخاصة إن معظم الأكل اللي بناكله اليومين دول مليان بنسبة كبيرة من الهرمونات اللي بتأثر جداً على طبيعة الشعر.
حددي سبب المشكلة قبل العلاج
لازم قبل ما ناخد أي علاج، نحدد السبب في المشكلة وبعد كده ناخد العلاج المناسب، وحتى لو استعملنا الفيتامينات فيفضل إننا نستخدم الفيتامينات اللي بيتم وضعها على فروة الرأس، ويا ريت نبتعد تماماً عن الفيتامينات اللي بتتاخد عن طريق الفم؛ لإنها ممكن تضر حاجات تانية في الجسم.

نصائح للعناية بالشعر
بينصح مصفف الشعر "محمد يونس" كل البنات إنهم يبعدوا عن الشامبوهات اللي بتكون شامبو وبلسم في نفس الوقت؛ لإن ده من أسباب ضعف الشعر، ويُفضّل إنها تستخدم الشامبو لوحده والبلسم لوحده.
كمان لازم ياخدوا بالهم من إنهم ما يغسلوش شعرهم بمية سخنة جداً؛ لإن الحرارة العالية دي بتضعف الشعر وبتسبب تساقطه، وبلاش كمان استعمال زيوت للشعر بعد الحمام؛ لأن تزييت الشعر ده بيمنع فروة الرأس من إنها تفرز زيوتها الطبيعية، لكن لو أي بنت عايزة تدي لشعرها شكل لامع ممكن تستخدم السيرم.

إضغط لمشاهدة الفيديو:
وفي النهاية أتمنّى إن اللوك يكون عجبكم..
وتكونوا استفدتم من النصائح اللي قولناها النهارده..
واستنونا في حلقات تانية كتير،،،،