( كلمتين للمجلس العسكري )

بطالب . .
كل الي مروا جوا قلبي
يشهدوا اني مدان . .
وان صاحبي خد لي صوره غلطه مره ف الميدان
واني خاين او عميل او بلطجي
واني ضد الحكم / عيل ثورجي
بهدلوني
كل دا لاني ببساطه قولت لأه
وان لسه القطر محتاج الف زقه
وانكم من فتره وانتم كذابين
يطلع الباشا بعظمته
بالسيفين والنسر يلقي بالبيان
يأمر الشعب العظيم صاحب الثوره المجيده
يعترض لكن ف بيته
مش ف "حركه" مليونية
فات علينا شهور كتير
والمشاكل هي هي
كهربوني بفولت عالي
واشنقوني بسلك ع المتحف
اجعلوني لغيري عبره
واجعلوني
اجعلوني
أعتذر لجناب فخامة اللواء . .
عن كل شئ
صار ف ثوره للأسف ماحضرتوهاش
غلطه اني ف يوم صحيح صدقتكم
- دمنا . .
كان حبركم . .
جوا تقرير المباحث .
_ف لوسمحتم_
قدموا كل الي يثبت
اني ضمن البلطجية . .
قدموا اشياء تدينني
ف المحاكمه العسكرية
احبسوني لاني قولت الحق بس
طبطبوا على كتفي بالسوط التخين
هرتجف وابكي واقول يارب حس
شيل بإيدك ظلم بايت من سنين
ادبحوني كبش للثوره
قولوا عني :
اني خاين او جاسوس
واني متمول وواخد كوم فلوس
ياجناب المجلس العسكري
يا اله الصمت والكدب العظيم
هامش : لسه بردوا الشرطه لامه . .
والمباحث هي هي بعد تغير المسمى !
جمعوا البيانات
واتحروا عني من البداية
نزلوا مخبر ورايا
يبقى ضلي !
كتبوا . .
_ف ملفي ف الامن الجديد_
ان انا السلفي الشيوعي الناصري
و ان انا العاشق لشكل الليل القاهري . .
غموا . .
عيون الشمس عني
واقطفوا الضحكه الي فيا
اكسروا جناحي اليمين واقطعوا دراعي الشمال
نزلوا صورتي "مسجل" ف الحوادث
واشكروا ظابط مباحث ف الخبر
وادولوا ترقية !
لمعوا غصن الزتون اللي فوق كتف المشير
نزلوا صورته ف لوحة للشرف !
مين عليه بالاتهام يقدر يشير . .
شئ صحيح اصبح بيدعو للقرف !!
قدموا . .
جثث الولاد ف بوكيه !
واكتبوا ف اهداء . .
مرفقه ب الفين جنية
منحه للشهداء !
من فضلكم :
بلغوا كل اللي لابس بدلته الميري . .
واللي قاعدين ف المكاتب بالبدل
_بيقسموا الفتافيت_
اني مش ضد القباحه !
لكني ضد ان البلد تفضل لغيري مستباحه !!