أنا الشقيان ..بقلم: محمد عناني

أنا الباكي وأنا الشاكي وأنا التعبان
أنا الماشي في ملكوته وأنا الهيمان
أنا اللي شربت لكعاني هموم شقيان
ورغم إني ببان عايش ففي النسيان
لا عَارف ليا يوم مَطرح ولا عنوان
على كعابي ألف الكون وأنا حيران
وجوا روحي نار قايده وفيه بركان
في دنيا قاسيه وإغتالت لكل حنان
وفيها الرحمه محبوسه ورا قضبان
وشوش بأشوفها كدابه بخدع بتبان
وتعلا بكل ألاعيبها فوق الجدعان
ورغم آلامي والعتمه في كل مكان
ورغم الليل مع طوله مع الحرمان
وعمر سنينه ما تعدى تقيل عدمان
بين آهات وبين توهه وبين أحزان
فرحه تيجي تاخد إيدي أنا الغرقان
تريحني تفرحني توديني لبر أمان
وأحس بروحي بوجودي أنا إنسان
ولسه قلبي فيه حلمي وبيه عمران
بكره بضيه حيجيني وشمسه تبان
يصحا أملي من تاني أعيش فرحان