المواطن المصري البسيط

بقلم : خالد مختار عبد الرحمن
مواطن مصري غلبان بيحلم بحرية وامان
قرر الرئيس محمد حسني مبارك تخليه عن منصب رئيسا للجهمورية
وقف المواطن المصري يهلل ويقول الله اكبر تحيا العدل و سجد يشكر ربه علي نجاح الثورة
وبدء المواطن يهيص ويغني ويضحك ويبكي كل حاجه طلعها من قلبه فعلا .
ومع اشراقة الشمس ذهب مسرعاً الي بيته ودخل متسحب للمطبخ بعد ما اطمن ان أمه مازلت نائمه لكي يأخذ المقشه والجاروف وهو بيقول مبتسماً كدا كدا هي بتشتمني كل يوم هي الشتيمة بتلصق
ووصل ميدان التحرير هو و الاف المواطنين لكي ينظفوا و يرجعوا ميدان التحرير زي ما كان
وبعد ما انتهي وذاهب لبيته
فجأه وجد مذيعة أموره انيقه واقفه امامه وبتساله
المذيعة : بعد نجاح الثورة العظيمة نفسك في ايه؟؟
ابتسم المواطن المصري وبرق عينيه وبلع ريقه واخذ نفس عميق وقال
المواطن المصري : انا نفسي ... نفسي .... نفسي فضرب ايديه علي دماغه وقال انا نسيت
اصل اتعودت ان الحكومه هي دائما اللي كانت بتقول كل حاجه وكانت دائما بتقول لينا هو في حد هيفهم اكتر من الحكومه
اصلهم اعتقلوا احلامي من زماااااااااان قولي لهم يفرجوا عن كل المعتقليين ..قوللهم يفرجوا عن كل المعتقلين
قوللهم عاوز احلامي عشان عاوز احس اني حر في بلدي عشان احس بنفسي وكياني
صح انا مش د/ احمد زويل ..او د/ عمرو موسي او البرادعي او حتي وائل غنيم
بس قوللهم انا مواطن مصري بسيط واكيد احلامي بسيطه
....وتركها وانصرف المواطن بين الضحكة والامل والدمعة اللي خرجت بعد ما كانت محبوسة سنين
المواطن المصري البسيط هو الجندي المجهول في كل الحروب
استشهد او اتصاب او راح اجمل سنين عمره في الحرب كل دا عشان حرية بلاده وحرية احلامه البسيطه
هو نفسه المواطن المصري البسيط وهو ماشي لقي طفل من اطفال الشوراع بيقوله عاوز جنية
خاف يعطيله الجنية لان يعلم ان اللي مسرحهم هيأخذه منه فاشتري بالجنية بسكويت
فلتهم الولد البسكويت بمنتهي السعادة وكأنه شعر بلحظة من طفولته الضائعة
وطبطب عليه المواطن وتركه وذهب يركب الميكروباص فاكتشف انه كان اخر جنية في جيبه فابتسم وقرر يكمل مشواره للبيت علي رجليه ورافع نظره للسماء ويقول يا رب
هو نفسه المواطن المصري البسيط الذي خرج يوم 25 لكي يقول لاء
استشهد او اتصاب او صوته راح من الهتاف وجسمه تعب من البرد وقلة الاكل والنوم والقلق
وبعد ما نجحت الثورة ذهب لبيته وجلس يتفرج علي التلفزيون وسط اسرته لانه عمره ما فكر يكون رئيس جمهورية او وزير او عضو مجلس شعب او وسط بريق الاضواء
هو يريدفقط حياة مواطن مصري بسيط
هو دا المواطن المصري البسيط
اهم واحد في بلده من غير ما يعرف او يهتم