الفيس شغال أريال

بقلم : صالح شيحة
أيها القارئ إذا بدأت فى قراءة هذه السطور فإعلم على الفور إن أنا واد مش تمام وناكر للجميل لأن صاحب الفضل عليا بعد ربنا فى اللى أنا وصلته ده وهو إن حضرتك تقرأ لى هذا المقال ...أنا دلوقتى هغلط فيه وأقول عيوبه ....الأول قبل ما نغلط نقول المميزات : تقدر من خلاله تحقق حلمك زى ما أنا قدرت ... ومن خلاله تقدر تعرف أخبار أصدقائك و أقاربك البعاد عنك ...ومن خلاله تقدر تعرف أخر الأخبار فى لحظتها وقبل لحظتها كمان ....وقبل لحظتها دى بتفكرنى بموقف عملته وأنا صغير ....كان فيه فى شارعنا حريقة فى بيت مهجور زى الخرابة كده وبيطلع منه دخانة لدرجة خلت إن فى ناس كتير من الشارع سابت الشارع ....اللى راح قعد عند حماته واللى راح قعد عند أمه ....المهم عملت فيها أنا الواد بن البلد ورحت نقطة المطافى فى بلدنا عشان يجوا يطفوها ...لقيتهم بعتوا معايا عسكرى عشان يتأكدوا إن فى نار ولا لأ وبعد ما إتأكدوا خدوا رقم بطاقتى وركبت معاهم عربية المطافى ورحنا ويادوبك المياه خلصت... الناس لمت الخراطيم والنية يمشوا مع إن النار مكنتش إنطفت وللأمانة العساكر عملوا اللى عليهم والحمد لله كلهم كانوا مزنوقين وعلى قد ما قدروا ...وفى نفس الليلة سهران بتفرج على فيلم أجنبى لقيت فى مطافى وصلت لبيت بيفكر يتحرق ...
نبدأ بقى قلة الأصل ....معلش يا فيس ...أنا أسف بس لازم أحذر القراء منك زى ما قلتلهم إن ليك مميزات أنت ليك بردة عيوب ...والعيب اللى هقوله النهاردة إنك ساعات بتركب أريال وتخلى البنات والصبيان يكلموا بعض ويضحكوا على بعض ...
وهى دى عادة المصريين دايماً يأخذوا من الغرب الحاجة الضارة بس ويسيبوا الحاجة الحلوة ...ليه الطلبة مش يستخدموا الفيس فى زيادة ثقافتهم العلمية مش الثقافة الثانية ...
ودلوقتى إيه الحل للخروج من الحفرة دى...أنا شايف إن لازم الأب والأم يزودوا الرقابة والأم كمان تزود الرقابة على جوزها لإما تأخذ بالها من نفسها شوية ...أو حل تانى إشغلوا بال أبنائكم بحاجة تانية ....