يوميات أم مفروسه / الحلقة الحادية عشر--النخبة / بقلم رنا هاشم

أنا قررت أنحرف
نعم يختي
أه و ربنا
يعني أيه مش فاهمة يخربيت سنينك يا مجنونة
قررت أتعامل مع صفحات التواصل الاجتماعي بإنحراف
دهشة أقرب إلى نظرة الهبل على وش نادين
طيب ممكن تفهميني أكثر صاحبتك متخلفة معلش
أقولك
أغلبنا بيدخل تويتر و الفيس بوك بيكون يا أما متابع صامت أو متابع هاديء
ردوده محسوبة بالورقة والقلم
أو قرن شطة سوداني حراق ضارب على التايم لاين
يحصل أن يبئا في موضوع ما .. يا أما تردي بقوة أو تصمتي
مش قادرين نتواصل مع النخبة اللي هما مين بئا
المثقفين وخريجين الجامعات الأجنبية لأن مجرد ما يحصل الأختلاف و ده
الطبيعي ان الكل مختلف على أي حاجة بيقولها التاني , مختلف حتى على نفسه
وما شاء الله تحسي أن الدنيا بئت بالألوان
تراشق الفاظ .. حفر كلامية لكل من الأخر ومن ثم يبدأ التفوه بلغة الشارع
وده قاموس لوحده الله اكبر الله اكبر
و خدي بالك أول ما تعترضي ينولك من الحب جانب يا أما لأنك متخلفة فكرياً
عنهم أو مش من مستواهم السامي والبرجوازين طافحين على التايم
وكأن مفيش حاجة أسمها أختلاف الرأي أو تقبل رأي الأخر الحاجات العبيطة
اللي علمتهالنا أهالينا دي الله يسامحك يا بابا بتاع الأنا مش كنت علمتني
شتمتين أفيد بدل كنوز المعرفة اللي موديانا ورا دي
تيجي تتكلمي كلام منطقي ممنهج يتعاملوا معاكي أنك حاجة نيه شبه الأرنب
المحشي كوسة مسلوقة أع أع أع
تاخدي يا بلوك يا بما معناه ايه الهبلة دي
بدأتي حضرتك تشتمي وتتفاعلي أكثر بالسب والقذف العلني وبالشكل اللي يريحك
بالعربي بالأنجليزي بلغة الشارع كما تشائين أفعلي بس المهم أن تفعلَ و أن
تفخرَ
هتاخدي شير و ريتويت بعدد شعر راسك
و تبئى مش من الكفار
و الستات و البنات الله أكبر عليهم
بالك مرة بنت في طب لقيتها بترد على التايم لايم على واحد بيحب فيها مسمي
نفسه أسم دوا بتاع اللي هوا ... ما علينا المهم
فبتعلمه مقامه و ربنا حصلي تلوث بصري وغشلقة في العين لمدة يومين أصلها
لو بنتي كنت ضحيت بيها في العيد على باب البيت
أما لو كان الأختلاف مع ست .. قشطة
حرب شعواء من اللي بالي بالك وكيد النسا بتاع الحواري يشتغل
وفي الاخر تكون حاطالي الأفاتار بتاعها كأن مسقط راسها
جزيرة نيس وهي و ربنا أخرها جزيرة راس الحداية
أختلفي كده وممكن ترد عليكي بما انها من طينة غير الطينة بألفاظ الشارع
بس بالانجليزي علشان مستواها السامي
هتقوليلي مين سامي هخبط راسك في الحيط
رديتي بما يرضيها تبقي حلوة و عثل عثل
وغير المغضوب عليهم ولست من الضالين
و بناء عليه
قررت أنحرف
أشتم علناً و أكون من النخبة
نادين حالياً على وشها أكبر نظرة بلهاء في العالم
والله البت دي تاخد جايزة على وش العبط اللي هي مركباه ده وهي بتقول ,,,
أنت أتجننتي يا مَلك
ضحكة شريرة جداً على وش مَلك
مش حاجة تفرس ؟؟