المشهد الذي ابكى الملايين

داخل بسرعة ليه؟؟؟شدك اوى العنوان؟؟؟طيب ياسيدى ممكن تتابع للاخر؟؟ ممكن... ممكن يعنى؟؟ اووك
حاجة مستفزة جدا اما تتفسح مابين اليوتيوب والموقع الاجتماعى الشهير فيس بوك وتلاقي فيديو مكتوب عليه "المشهد الذي ابكى الملاين" السؤال لصاحب الاسم الجميل ده اللي محطوط فوق الفيديو.
هل انت شوفت الملايين وهما بيبكوا؟ طيب بلاش موضوع شوفت ده ..هل التعليقات المصاحبة للفيديو اللي سيادتك منزلة تعدت رقم المليون فأصبحت ملايين طيب ازاى برضه والتعليقات اتكتبت بعد التسمية الجميلة دي ؟
ولو كان باسم تانى وبدلت الاسم بعد ملايين التعليقات اللي سيادتك شوفتها اومال ..انا مشوفتهاش ليه ؟ تقريبا التعليقات مزادتش عن 20 تعليق.. ولو فرضنا برضه ان التعليقات يمكن يمكن تعدت المليون وانا مش واخد بالي عرفت ازاى اللي بيعلق دا بيبكى؟
وعلي نفس الطريقة ..تلاقي المنظر الذي هز قلوب الغرب ...لاحول ولا قوة الا بالله طيب وانت حسيت بالاهتزاز ده ازاى..ولو فرضنا فعلا ان عندك طريقة معينة تحسبلك اهتزازات قلب البنى ادمين في الغرب
خد الموضوع منك كام ساعة ولا انت بتحسبها بمقياس ريختر؟
خش ومش هتندم!
انا عايز افهم يعنى هو الندم ده مش بيكون علي امور حياتية مهمة لصاحبها بيتخذ قراره وبعد كده بيكتشف انه اخطأ فيعقب اكتشاف الخطأ ندم..
ايه بقا الحاجة اللي في الفيديو ده ممكن تشعرنى بالندم او بأنى اخطأت في قرار ال"PLAY"؟
اسامى مستفزة جدا ...اصحابها مقتنعين جدا انهم كده بيجذبوا الناس..
كل ده كوم والناس اللي فاكرة نفسها متدينة ومحترمة وواعظة يتخذوا طرق ملتوية للعظة مثلا يضع اسم جنسي مثير للفيديو وبالداخل تلاقي اغانى دينية وشيخ بيتكلم عن الزنا وانه فاحشة والعياذ بالله وهكذا...وفي اخر الفيديو يوجهلك السؤال ..الشهير "مش كنت ممكن تموت وانت بتتفرج علي الحاجات دى"
بس من الواضح جدا ان اسلوب الجذب ده اسلوب حياتى دارج من الدرجة الاولي ..لما تفتح باب شقتك وتلاقي ورقة عرض لسوبر ماركت واسعاره ويكتب في اعلي الصفحة بالخط الكبير اوى اوى سلسلة محلات ابوآدم..
وهو في حقيقته محل واحد بباب واحد وتلاجتين ليه التضخيم ده...
وتلاقي سوبر ماركت فعلا كبير بقا ويحطلك سعر بخس جدا لسلعة معينة مثلا يقولك كيلو السكر بجنيه واحد ورغم ان الاعلان لسه جايلك سخن من المطبعة وان عربيتك لاول مرة تمشي علي ميه وعشرين عشان تلحق وتوصل للمحل في اول ساعة من ساعات العرض ويقولك اصل السكر خلص!!!
لما تمسك جرنال اسبوعي لعروض البيع والشراء وتلاقي الشركة العربية للعقارات تعلن عن وحدات سكنية بمدينة نصر عباس العقاد بالتقسيط مقدم يبدء من 19000 وقسط شهري 500 جنيه...جذب جذب يعنى بالجيم مش بالكاف واخدالي بالك ياحاج محمد؟
وتاخد نفس العربية اللي مشيت علي ميه وعشرين لاول مرة يوم السكر وتتجه لمقر شركة العقارات وتكتشف
ان 19000 ربط كلام بس ياسيدى ودفعة ربع شهرية 50000 ونص سنوية 60000 وارقام غريبة وكتيرة كده وتسئله ممكن يشوفها تكتشف انك بتعدى وانت رايح علي عباس العقاد لكن هي فين تقريبا بتبقي في اربعة ونص...
الطريقة دى لو ركزت هتلاقيها متبعة حوالينا في كل حاجة من اعلانات في التلفزيون للجرايد للمجلات وحتى في الفيس بوك...يعنى محاوطينك محاوطينك!!
السؤال اللي بيطرح نفسه فين الاقي المكان اللي مفهوش الجذب الكذاب؟