الثوره بعدت يامينا

كل اللي خاض
اللعبة يستاهل
..نفس المباني القديمة
خاليه م الداخل
وملعب الأوباش
مليان خارج داخل
.مفيش مكان للغلابة
أزاي هنغير الحاصل
,ومن زمان الصراخ
للعب في الصندوق
بسكوت حلاوة و عفش
أزاي تفوت .هتموت
فلول وسابقه الريح
علي وعد م العسكري
وأنت اللي خوفك سرح
راجع لنفس المكان
صفر الحساب والجبر
بتواجه المفتري
أتبدلت سحنته
من وش كاره وجودك
لوش ناشف طري
بيدوقك الاثنين
اختار وفوت ع الخط
صندوق يجيب التحالف
والتاني ع الكتلة .
والوفد في الإعلانات
بيداري ع اللعبة
أما الفرادى
فدي لعبه لها شرطه
وتنط في الصناديق بالزور
ييجي قرطه
ويلبسوك اللجام
ويعلو بردعتك
لاقلبك اللي فرح
هيكون بديل عنك
ولاعقلك اللي سرح
في الوقت هيدلك
كل اللي فهمو اللعبة سابقينك
عرفوا بان العساكر
شفطت الليلة
دابوا غرام في العساكر
وزينوا السكة
وأنت اللي واقف لوحدك
بتفسر الملعوب
لاحد سامع كلامك .
ولا تنجي م المكتوب
شوف مينا لما افتكر
ان المظاهرة حلال
خرج من حي شبرا
في مظاهر زي زمان
واخد خطيبته معاه
بيصلح اللي مال
قتلوه في اول مواجه
وعاونهم الغربان
وشيعوه بالكذب
والكفر والبطلان
ودهسو فوق لسانه.
وشيعوه جثمان
الثورة بعدت يامينا
بأيدنا مش عسكر
إحنا اللي سيبنا الميدان
لعبه في أيد أزعر
سمعنا نص الخطاب
والباقي للعسكر
هللنا يوم التخلي
سيبنا الميدان كله
خدعونا باللي اتقال
وعظموا للشهيد
هللنا وفرحنا
ولما طال الطريق
خنقونا في الزحمة
........
لسانا في الميدان
جوانا غضب الأمس
..ميهمناش العساكر
خلاص كرهنا الهمس
الجاي اخطر واوعر
وواضح زي نور الشمس
الشعب عرف الطريق
وخداعه بقي شيئ صعب
وفي الميدان واقفين
مستنين الرد
اللي سرق ثورتك
قاعد ومتهني
..وأنت بحته حلاوة
قاعد ومتسلي
فوق يا ابن عمي
وقابلني ف الميدان تاني
صبح ومسي تلقي
نفس الو شوش تاني
الديب وشله أسامي
متغركوش أسماء
نفس الو شوش والأماكن
والسحنة والأشكال
في الجامعه نجحت فلولهم
وبكره في البرلمان
لازمنا تاني
نجهز ثوره ضد الظلم
كل المصاروه
بروح الوحدة يتلمو
لو خرجت الغربان
هتلاقي قوتنا
وهنطرد الخفافيش
ونصلح الأوضاع
الحل هوه العدل
زي الشعار اللي اترفع
في ثورتك عالي
العيش دليل الأمان
والحرية هدفك
والعدل يبقي الهدف
في الشغل والمسكن
وانت اللي واقف
مزنهرفي طابور العيش
ولسه في المحكمة
ثوار ف ايد الجيش
والحكم للعسكري
مش للقضاة والحق
لاحريه شفتها
ولا البطالة تغيب
لساها بتدمر
بالهمة راس واديين
الثوره تاهت يامينا
وبأدينا نرجعها