جمعيات التمويل الأجنبى الأسود

قال إيه منظمات حقوقية!! قال إيه توفيق أوضاع!!
ما معنى توفيق أوضاع؟!.. لابد يا سيدى أن يصدر التصريح لها حسب شروط الجمعية فى وزارة التضامن.
يا سيدى أغلب الجمعيات الملوثة عاملة تصاريح قانونية جداً.. ولكن تحويل الأموال لها بالعملة الصعبة جداً من الخارج تتم من تحت الترابيزة وغير معلن عنها والطرق كثيرة والدولار يكسر أى رقابة وأى قانون.
لابد من تنفيذ القانون الذى أصدره رئيس الجمهورية بدون مجاملات وخيار وفقوس ومصالح ورشوة مقنعة وغير مقنعة.. أصل القانون عقوباته قوية ورادعة.. أتمنى ألا يوضع على الرف بجانب زمايله.
يا عمنا.. أصحاب الجمعيات يوفقون أوضاعهم حسب القانون بأوراق مضبوطة شكلاً ولكن مضروبة موضوعاً ومضموناً.. أمام القانون تمام وبعيدين كل البعد والعياذ بالله عن المال الأجنبى والخيانة.
ولكن الحقيقة مرة.. حيث إنهم متورطون جداً.. وابحثوا من أين لهم هذه الأملاك والمكاتب والسيارات والبدل الإنجليزى والسيجار الكوبى.
إنهم يوزعون الأموال على ضعاف النفوس فى الأحزاب والتجمعات ودمروا الحياة السياسية فى مصر ودمروا الأحزاب.
الوفد.. الحزب العريق بدأ يأخذ خطوات جادة لتوفيق أوضاعه والضرب بيد من حديد على رؤوس الخونة عبدة الدولار واليورو وخدامين السفارات المانحة.
وذلك حرصاً على تنقية الحزب ممن يتعاون معهم حتى يتطهر الحزب ويقدم العمل السياسى المحترم لصالح الوفد وصالح مصر فهو الحزب الأقدر على القيادة والأقدر على خدمة المواطن المصرى وذلك من منطلق رصيده التاريخى وخبرته المؤسسية والسياسية والاجتماعية ويتصدر الآن المشهد السياسى.
إن الهدف الرئيسى لأصحاب الجمعيات الممولة السيطرة على الأحزاب من خلال التوغل بين الأعضاء واستغلال معاناة الشباب المادية ويستقطبون ضعاف النفوس منهم ليشكلوا لوبى يحركونه نظير دفع مبالغ زهيدة لجلب المعلومات من القرى والنجوع ومصر كلها لتقدم فى تقارير للسفارات المانحة لتصرف الشيكات بالملايين للسادة والخونة.
تعقد ندوات وورش عمل بحجة تنمية الديمقراطية ورسم سياسات العمل السياسى والتدريب السياسى داخل مصر وخارج مصر.
طبعاً ناس عمرها ما زارت الأهرامات.. جالها فرص تسافر أوروبا بلوشى أكل وشرب وطيران وفسح ومصروف جيب بالعملة الصعبة.. والله فيهم ناس يادوب بيركبوا التوك توك.
يا حكومة.. يا فايزة أبوالنجا.. أنا عارف إنك بورسعيدية جدعة ومحترمة ولكن سكوتك على موضوع أمن قومى مثل هذا.. لن يغفر لك التاريخ.. كملى جميلك فنحن جميعاً رجلنا والقبر فقد عدى العمر ومصر تحتاج آخر قطرة دماء لتقف مرة أخرى.
ترلة وسواق وجوزة
يا سلام ع المزاج العالى.. والله يا بلية حتة الحشيش النهاردة قطعية محترمة سلطنة المداغ تمام.. والدركسيون فى إيدى زى الحلاوة.. تقولش اتسلطن معايا.. ها ها ها ها.
وكمان بدال البنزين بيسحب لوحده.. وكأنه بيشد فى الجوزة!!
بلية.. أنا جعان يا ولة.. عايز حتة لحمة مشوية أحبس بيها.
أصل الحشيش الإكسترا بيفتح المخ ويجوع كمان يا ولة.
بس فيه عيب صغير يا بلية.. متضايق منه قوى ومش لاقيله حل.. عينه بتغمض فجأة وأشخر.. هاها والدركسيون زى الحلاوة كأنه متسلطن.. وربك بيسترها.. هاهاها.
خلى بالك يا أسطى قدامك لجنة.. فتح عينيك واصحى.
ولا يهمك دول حبايب الأسفلت.. كله بحسابه.. دول ناس بتتفاهم على طول.
حاسب يا أسطى.. حااااسب.. كنت حتودينا فى داهية.. العربية خرجت عن الطريق.. الله يخرب بيت السلطنة.
هاهاها.. مش بقولك الدركسيون زى الحلاوة الشعر.. متسلطن معايا يا ولة متسلطن.
عزيزى القارئ.. نهارك وليلك سعيد.. ميعادنا فى حلقة تانية من مسلسل أموات الأسفلت مع ترلة وسواق وجوزة.
المنسق العام لحزب الوفد