شباك على الثورة

من أرضنا هل الإيمان والدين
عيسى ومحمد ثورتين خالدين
والعلم ثورة ومن هنا قامت
والفن والحرية والتمدين
ثوار نهزك ياتاريخ تنطلق
نحكم عليك يا مستحيل تنخلق
نؤمر رحابك يافضا تمتلئ
والخطوة هنا تسبق المواعيد
وطول ما أبو شعب العرب
فى الأبد
الثورة قايمة والكفاح دوار
ثوار ثوار ولآخر مدى
ثوار

الله يرحمك ياصلاح ياجاهين يا ماكان نفسى تكون معانا النهاردة عشان تغنى للثورة وتعلمنا نغنى وراك. شوف مع إنك أصغر منى بسنة لكن سبحان الله أنا دايماً باقول عليك أخويا الكبير وده مش معناه انى بأصغر سنى زى الست العانس والعياذ بالله لكن صدقنى إنى بعد ما شبعت من أبونا بيرم بصيت يمين وشمال مالقيتش غيرك شربت منك لحد ما ارتويت يابوبهاء وأنا لسة فاكر موضوع الكفالة و مستحيل أنساه وفاكر لما صافى ناز جت لى المعتقل وقالت لى:
هباب الطين ده اوعى تعرفه تانى
ضحتك وقلت لها:
ليه بس قلبك أبيض.
صرخت فى وشى انت حتفضل طول عمرك أهبل عمر ما صلاح جاهين ضحكت سيدفع لك الكفالة بعد ما الكلب خد مبلغ الكفالة وشرب به بيرة ولما لاموه قال لهم بمنتهى البساطة يعنى هو نجم لو خرج من السجن بكفالة حيعمل إيه؟ ما هم مافى يوم حياخدوه تانى.
ضحكت تانى وقلت لها:
ياصافى ياحبيبتى انا باعتبر الولد ده ابنى.
قلت لى:
ويوسف شاهين ابنك برضه؟ يوسف شاهين أنا ماطلبتش منه حاجة أنا فقط قلت له نجم.. أخد إفراج بكفالة خمسين جنيه تتصور قال لى إيه قلت لها:
قالك إيه؟
قالت لى:
قال لى أنا فقير زى أى حد.
وبعدها دخل عليه صلاح جاهين وقال له:
مالك يايوسف؟
قال له:
صافى ناز هى اللى عملت فىَّ كده دى بهدلتنى ياصلاح وفوجئت بصلاح جاهين بيتصل بىَّ ويقول لى.
نجم له عندى خمسين جنيه.. ممكن أبعتهم لك ضحكتك وقلت لها:
شفتى بقى جوزك مداين شيخ شعراء العامية المصرية ضحكت وقالت لى:
آخد منه الفلوس ولا ترجع تتخانق معايا.
قلت:
خديهم وادفعى الكفالة وبرضه ح أرجع أتخانق معاك الله يرحمك يابو بهاء ويرحم زمان الشعر والحلم وياريتك كنت معانا فى زمان الثورة.