بوضوح

الموظف والنهضة.. وقطر والصندوق!

موافقة مجلس الشوري علي ضريبة الدخل الجديدة تؤكد أننا نسير علي خطي النهضة بمفهومها الإخواني الحقيقي، لأننا نستطيع بحسبة بسيطة إدراك عظمة هذه النهضة، فالموظف الذي كان يتقاضي راتباً 980 جنيهاً أصبحت بعد العلاوة الاجتماعية 1043 جنيهاً وبضرائب مجلس الشوري يصبح راتبه 938 جنيهاً!
يعني العلاوة حاترجع تاني لخزانة الدولة وعليها نسبة كمان من الراتب الأساسي، فمن يتراوح دخلهم بين 5 آلاف و30 ألف جنيه سنوياً تفرض عليهم 10% ضرائب ومن يتراوح دخلهم بين 30 و45 ألف جنيه سنوياً ستفرض عليهم 15% ضرائب، و20% علي من يتراوح دخلهم بين 45 و250 ألف سنوياً، أما من زاد دخله علي 250 ألف جنيه سنوياً فما فوق ستحسب عليه 25% ضرائب.
وطبعاً الغالبية العظمي من المصريين سيدخلون تحت الشريحة الأولي والثانية، ورغم وجود حكم محكمة بأن الحد الادني للدخل هو 1200 جنيه، الشوري يفرض ضرائب 10% علي كل من يزيد دخله عن ألف جنيه!
يعني الحكومة تؤجل تطبيق ترشيد الدعم علي الطاقة والبنزين والسولار وتطلع عين أبوالموظفين الغلابة، الناس المتبهدلة المقطوع عنها الميه والنور، وعيالهم بيذاكروا علي نور الشموع، اللي بيقفوا في طوابير العيش من 6 الصبح علشان يلاقوا العيش في الفرن، وبيتسحلوا في الأتوبيسات ومترو الأنفاق اللي فاصل التكييفات والمراوح علشان يوفروا الكهربا، الغلابة اللي بياكلوا الأرز الكسر من التموين (كسر الرز يعني نضافة الرز الصحيح)، نهضة دي ولا مش نهضة؟
يا سادة الحكومة معذورة فرغم تصريحات المهندس وزير التعاون الدولي المؤكدة علي توقيع قرض الصندوق خلال شهر ونصف الشهر، إلا أننا جميعاً ومعانا الحكومة نفسها عارفين كويس جداً أننا لن نحصل علي هذا القرض قبل شهور، وطبعاً الوضع الاقتصادي سوف يصبح كارثياً إذا لم نحصل علي القرض قبل يوليو القادم يعني قبل موازنة 2013/2014، إيه الحل؟.. شوية علي الغلابة إيه يعني لما تدوس عليهم حبة كمان، وشوية علي الحكومة الغلبانة تتعب حبتين سفريات ولقاءات ومفاوضات مع إخواتنا العرب يبحبحوها علينا لحد ما يحن علينا الصندوق، والحمد لله قدر راجل النظام الأوحد الشاطر في إقناع قطر بمنحنا قرض جديد بمبلغ 2.5 مليار دولار تشتري بيهم سندات وأذون بفايدة 4.5%، سوف يعلن عنه قريباً، وكمان وبفضل مجهودات الشطار برضه أقنعوا تركيا بمنحنا 540 مليون دولار، وطبعاً كل شروطهم مقبولة المهم فلوسهم تيجي قبل يوليو القادم، يعني قبل الموازنة الجديدة، يمكن نقدر نقنع البنك الدولي والاتحاد الأوروبي اللي معلقين قروضهم ومنحهم علي قرض الصندوق أننا قادرون ندبر أمورنا من غير الصندوق، يعني اشمعنا تركيا وماليزيا استغنوا عن قرض الصندوق، من غير مايستلفوا ولا شحتوا من حد وأعتمدوا علي أنفسهم وجمعوا الشعب حواليهم، وقدروا يعيشوا بلادهم في أمن وأمان سياسي واقتصادي، إن شاء الله حكومتنا الذكية ونظامنا اللي مالوش زي في الدنيا كلها يقدروا يحققوا المعجزة ويستغنوا عن الصندوق وقرضه اللي ذاللنا قدام العالم، وحاوجنا للي يسوا واللي مايسواش، وساعتها يقف رئيس الحكومة بكل ثقة ويقول: «سرقوا الصندوق يا محمد لكن قطر معايا»!