(تفاصيل) حفل تامر حسني في عيد الأضحى

يستعد الفنان تامر حسني لإحياء حفل غنائي ضخم في العاصمة الإماراتية أبو ظبي، وذلك يوم 23 يوليو الجاري، الموافق رابع أيام عيد الأضحى.
ومن المقرر أن يقدم "حسني" خلال الحفل مجموعة متنوعة من أجمل أغانيه القديمة والحديثة التي يحبها ويتفاعل معها الجمهور على خشبة المسرح.
رد تامر حسني على حلا شيحة:
كان الفنان تامر حسني رد عبر صفحته الرسمية على موقع التواصل الاجتماعي الشهير "فيس بوك" على هجوم الفنانة حلا شيحة عليه وعلى بعض المشاهد في كليب "أنا مش تمثال"، الذي هو ضمن أحداث فيلم "مش أنا".
وقال النجم تامر حسني: "نهاركم جميل يا أغلى الناس.. الحقيقة عمري ما باتخيل إني أدخل في نقاش بالشكل ده مع زميل باحترمه، وكان فيه بيننا كل خير".
وتابع: "للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصياً ونتناقش بيني وبينك، فأنا مضطر أرد هنا برضه.. أولاً أنا عمري ما وعدتك إن
الكليب مش هاينزل ده ماحصلش اصلاً يا حلا.. مش أنا خالص اللي أوعد وأخلف".
وأضاف : "الحقيقة إني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتها لك، كلها موجودة".
وأضاف: "وبعدين الفيلم بقاله 3 أسابيع في السينمات والكليب موجود جوة الفيلم.. هو بالنسبة لك الحرام إننا ننزل الكليب على اليوتيوب بس؟!! إنما الكليب يتشاف جوة السينمات عادي؟! منطق غريب فعلاً يا حلا، وبعدين هو مش انتي اللي مضيتي عقد وتقاضيتي عليه مبلغ كبير علشان الدور ده بعينه؟!! هو مش انتي اللي صورتيه ومثلتيه بنفسك وبمنتهى الرضا وللاّ حد أجبرك ؟!! وللتوضيح للجمهور الكريم أنا والمخرجة الأستاذة سارة وفيق
بعتنا لك، وكنا بنتحايل عليكي تيجي تشوفي شغلك قبل إصدار الفيلم علشان لو عندك أي ملحوظة تقوليها، ماكنتيش بتردي علينا وتليفوناتك كلها كانت بتقفل في وشنا".
وتابع: "إنتي للأسف يا حلا متعاملتيش صح مع الموقف.. كان لازم تهتمي بأمرك أكتر من كدة ولو كان ليكي أي طلب تاني كنت هاعمله بكل حب، إنما انتي فجأة اختفيتي وماكملتيش تركيب صوتك في الفيلم ولا جيتي تتصوري عشان أفيش الفيلم أصلا وماخليتيناش نعرف نعمل أفيش مجمع !!!".
واستكمل حديثه قائلًا: "وبقيتي تقفلي تليفوناتك وتكنسلي علينا كلنا وبعدين أي فيلم بيبقى ليه خطة مسبقة في الدعاية وانتي عارفاها كويس ووافقتي عليها وده كليب رومانسي.. يعني معقول كنتي عايزة المنتج يشيل كل مشاهدك اللي صورتيها من الكليب، ويطلعني باغني وباقول الكلام الرومانسي ده للأستاذ ماجد الكدواني مثلاً هو ده يُعقل ؟؟!!".
وأختتم حديثه قائلًا: "أنا زعلان منك جداً يا حلا على مفردات البوست بتاعك غير الموفقة.. ومستحيل هارد بطريقتك اللي فيها تجريح واتهامات باطلة ليا احتراماً لحاجات كتير يمكن فايتاكي، بس مش هاتفوتني.. وعلى فكره أنا واثق انك عارفة إني مستاهلش منك كده وهاكتفي بالتوضيح ده وربنا يهدي الجميع ويكتب لك كل الخير.. اللهم آمين".